1 Korinto 9
9
Pusu Beyax Snkgulan
1Yaku we uxe ku ga ptraguh peni? Uxe ku snkgulan peni? Uxe mu ntaan ka Yesu Bukung peni? Uxe yamu ka qneepah mu ckceka Bukung peni? 2Nasi peeyah taxa seediq mita, uxe ku snkgulan ka yaku. Nasi so spooda yamu de snkgulan ku ka yaku. Ado meniq ckceka Bukung we yamu ka pnskraya pgkela yaku ka bale ba snkgulan.
3So quri seediq smnetur kenan we nii ka cniyuk mu quri dheya. 4Ye uka beyax nami mekan ma mimah peeyah gnrangan miyan malu kari ho? 5Uka beyax ta msuupu madis mqedil nami niqan snhiyan msuupu mremux ma mlatac, mntena so duma snkgulan ma mtswai Bukung ma Kepas peni? 6Wano yaku ma Brnabas ka uka beyax nami ini qeepah ho? 7Ima ka psramal nanak uqun mosa supi ho? Ima ka mhuma lipas ma ini ekan heyi na ho? Ima ka tmabu dapa ma miric we ini imah nunuh daha ho?
8Moda ku lnglungan seediq rmengo ka so nii peni? Uxe mntena nii ka rnengo gaya peni? 9Mntena ga spatis gaya Moseh hiya: “Qmtemaq miriq mugi ka dapa ciida we, iya gmuki ka quwaq na.” Dapa ka lnglungan Utux Baro peni? 10Uxe kana ta ka srengo na kana peni? Bale ba ita ka srengo na! Ado mphuma we asi ka mooda sntangan na mphuma. Pqburung na we asi ka mooda sntangan na mosa maasu mugi ka qqburung na. 11Wada miyan rmehak rehak nBgihur ckceka namu de mangal miyan danga heyi peeyah yamu we sgcuqi ka so nii ho? 12Nasi niqan beyax daha maangal peeyah yamu ka taxa seediq de uxe naka miyan mgkala dheya ka yami peni?
Kiya de ini miyan doi beyax so nii. Ani maanu we krinah miyan knremun so uxe shetur ka malu kari quri Kiristo. 13Ga qmeepah quri Sapah Thmkuwan ka seediq we ida peeyah sapah thmkuwan ka uqun daha. Qmeepah spuhan ka seediq we sugan snapuh we ini namu klai ho? 14Mntena so nii ka pnosa kari bukung, mpgarang malu kari we ida asi ka pneeyah malu kari ka kkuudus daha.
15Kiya de uxe mu dnoi ka kana beyax kkuudus nii. Matis ku patis nii we uxe ka aangal mu beyax kkuudus nii peeyah yamu. Ado ani ku mhuqil we uxe mu qada ani ima ka stndahu mu. 16Ani ku gmarang malu kari we uka ba ka stndahu mu. Ado uka mu ba yeexan. Nasi ku ini garang malu kari de smtali ku bale da! 17Nasi ku moda ba lhebun mu nanak qmeepah nii we niqan ka cniyuk na bbege. Nasi ini oda lhebun mu nanak we ida gaga mege qqpahun mu da. 18So kiya de maanu ka cniyuk ngalun mu ho? Kiya ka gmarang ku malu kari ciida we ini seeliq pila mangal malu kari ka seediq. Kiya we peeyah malu kari ka pusu beyax kkuudus mu we ini mu qhdei dmoi.
19Ani ku ga mtraguh we ini ku qlhangi seediq. Yaku nanak ka smruwa ku mtnqliyan hbaro seediq, kiya de krrinah mu psnheyi hbaro seediq. 20Quri seediq Yudaya we wada ku ma seediq Yudaya ppsnhei mu seediq Yehudah. Quri ga qnlhangan gaya we wada ku ma seediq ga qnlhangan gaya ppsnhei mu seediq ga qnlhangan gaya. Ani ku uxe ga qlhangi gaya pndakar ka yaku. 21Quri seediq uka gaya ma seediq ku uka gaya ppsnhei mu seediq uka gaya. Bale ba meeniq ku berah Utux Baro we uxe ka uka gaya, gisu ku qlhangan gaya Kiristo. 22Quri muuwic seediq we wada ku ma seediq muuwic ppsnhei mu muuwic seediq. Quri ka so maanu ka seediq we wada ku mntena heya ka yaku uri. So kiya de eyux mu ppsnhei seediq. 23Sqeepah mu ka ani maanu we ririh malu kari. Kiya de spuun mu maasu ka knmalu malu kari nii.
24Tmalang seengan ka seediq we hbaro. Kiya de 1 bale ka maangal snadu we ini namu klai peni? So kiya de aangal namu snadu we kbeyax tmalang ka yamu uri. 25Ani ima ka tmalang sseengan we asi ka qmlahang kana ani maanu. Dheya we maangal bunuh snadu mpsburo ka dheya. Kiya de ita we aangal ta bunuh snadu uxe mpsburo ka ita. 26So kiya de tmalang ku we uxe ku uka dngusun. Kmemux baga mtgdiyal ciida we uxe ku nii mtgdiyal saso. 27Shetur mu ka heyi mu ma so maha mtduwa ba muyu. Kiya de ani ku wada gmarang kari txtaxa seediq we mpsciyuk yaku ka sqada da.
Currently Selected:
1 Korinto 9: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
