1 Korinto 8
8
Uqun Snapuh Tikung
1Quri snapuh tikung ge, niqan knkela ka kana seediq we klaun ta. Maanu so kiya we knkela we psparu seediq. Wano gnaalu ka mtduwa pgdehu seediq. 2Nasi, niqan mkela ku ka yaku, mesa lmngelung ka seediq ge, bale ba ini na klai ka asi na ka klaun. 3Nasi gmaalu Utux Baro ka seediq we ida klaun Utux Baro ka seediq nii da.
4Quri mekan snapuh tikung ge, ida ta klaun, uka kesun mnmaanu bobo dxeral ka tikung. Klaun ta uri, wano 1 ba Utux Baro uka ani ima di. 5Ani ga so niqan kesun daha duutux ga baro ma ga bobo dxeral, mntena so ckceka daha we hbaro ba ka utux daha ma bukung daha. 6Maanu so kiya we wano 1 ba ka Utux Baro ta. Kiya ka Tama, heya ka pnyahan kana ani maanu. Wano 1 ba ka Bukung, kiya ka Yesu Kiristo, mnoda heya ka kana ani maanu. Ita uri we mnoda heya meniq ta ka ita uri. 7Ani so kiya we uxe kana ka niqan knkela so nii. Duma seediq we tgluhe daha thmuku tikung betaq saya de ngalan daha so bale ba snapuh tikung ka uqun wada daha uqun. So kiya de muuwic ka lhebun daha de srtiqan ka lhebun daha da. 8Bale ba we uxe uqun ka psdaling Utux Baro ita. Ado ini ta ekan we uka ka snliqan na uri. Mekan ta uri we uka rrihan uri.
9Kiya de so ka pntraguh namu we so uxe namu mpbtunux skrbutan dmuuwic seediq we qlahang ka yamu. 10Nasi isu niqan knkela ka tleung mekan sapah tikung ka taan ani ima, nasi muuwic ka lhebun seediq nii de uxe maha krinah mekan uqun snapuh tikung ka heya da peni? 11So kiya de wada shuqil Kiristo ka mtswai ta muuwic nii ge, moda knkela su ma maha mtakur ka heya da. 12Moda namu so nii pqnaqah mtswai namu, pqluqah muuwic lhebun daha de ririh su wada pqluqah Kiristo. 13Maanu so kiya de nasi uqun ka pskripuc mtswai mu ge, so ku uxe pskripuc mtswai mu we uxe ku meekan heyi ani betaq knuwan.
Currently Selected:
1 Korinto 8: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
