1 Korinto 7
7
Quri Msterung
1Quri so wada namu spatis kenan ka ooda, nasi ini smdaling mqedil ka rseno we naka malu. 2Kiya de so uxe namu mmhemuc msuupu ge, rseno we ngali mqedil, mqedil uri we osa rseno. 3Rseno ma mqedil na we asi ka mssruwa bale. 4Ado mqedil we ini tduwa qmlahang heyi na nanak, rseno na ka qmlahang. Kiya uri ma rseno we ini tduwa qmlahang heyi na nanak, mqedil na ka qmlahang. 5Iya lixi qmlahang ka kmmesa rseno ma mqedil. Wano ba pskingal lhebun dmurun ma mssruwa de kiya ka tduwa tnnais ini psuupu. Bobo de asi ka mtheyaq msuupu dungal. So uxe srdilun Satang ka yamu mooda ini baka knremun namu dmudul yamu quri naqah. 6So nii ka rnengo mu we uxe ku ka posa kari, gisu ku kmremun. 7Nasi mntena yaku ini aangal mqedil ka seediq. Kiya de knkingal heyi we niqan pndungus nangal daha peeyah Utux Baro. So nii ka duma. So ga ka duma.
8Ini psterung ma mqedil mqrinuc ka rngagun mu, nasi ida mntena kenan ini psterung ka dheya we naka malu. 9Kiya de nasi ini baka ka knremun namu we asi ka msterung. Msngsungu mbesu lhebun we nuuqu msterung ka malu.
10So wada msterung ka ddudul mu rmengo. Bale ba we uxe yaku ka rmengo. Bukung ka posa kari: Mqedil we iya alix rseno. 11Nasi malix we asi ka ini sgeeru, uxe uri we asi ka mosa mmsbleyaq rseno na. Rseno we iya qada mqedil.
12Duma msngari na seediq hiya we yaku ka mprengo, uxe rnengo Bukung kiya. Mtswai rseno ge, nasi niqan ka mqedil na ini snhii, ida smruwa ba mpsuupu meniq rseno na de ini tduwa malix mqedil na ka rseno. 13Mqedil ge, nasi niqan rseno na ini snhii, ida smruwa ba mpsuupu meniq mqedil na de ini tduwa malix rseno na ka mqedil. 14Ado ini snhii ka rseno we mooda mqedil na prtaso. Ini snhii ka mqedil we mooda rseno na prtaso. Nasi uxe so kiya de ida ini mrtaso ka laqi namu. Kiya de saya de mrtaso ka dheya da. 15Nasi kmmalix ka ini snhii seediq we spooda nanak lnglungan na aalix na! Nasi niqan ka so nii we iya htrani hiya ka ita mtswai rseno ma mtswai mqedil. Ado aangal namu msbleyaq mtheyaq pnlawa Utux Baro ka yamu. 16Isu mqedil we ma su mkela sa uxe su mdoi baga rseno su ho? Isu rseno we ma su mkela sa uxe su mdoi baga mqedil su ho?
Pskere Dmoi Qpahun Pnlawa
17Ani so kenu we, txtaxa heyi namu, ptnaani pndungus nsugan na yamu ka Bukung ma pnlawa na yamu ka Utux Baro moda ka yamu. So nii ka dnudul mu rmengo kana pssliyan. 18Tena wada ptgaya psalak ka duma na de splawa Utux Baro. Heya de iya osa pkuuka pnskere ptgaya psalak. Ini ptgaya psalak berah ka duma na de splawa Utux Baro. Heya de iya osa ptgaya psalak. 19Ani ptgaya psalak ma ani ini ptgaya psalak we uxe nii ka pusu. Pusu na bale we wano thei gaya pndakar Utux Baro de kiya di. 20Pnlawa ta na ciida we maanu ka txtaxa heyi ta we asi ta ka meniq txtaxa heyi ta. 21Mlawa sunan ka Utux Baro we ida su tnqliyan ciida na ho? Iya pslhebun. Kiya de nasi su mtduwa mtraguh we malu ba migin ptraguh. 22Ado ida tnqliyan ka seediq pnlawa Bukung ciida we wada rwahan Bukung. So kiya uri ka seediq ida mtraguh pnlawa ciida we tnqliyan Kiristo. 23Paru ba bnaruy Utux Baro ka yamu. Iya osa ptquli seediq. 24Mtswai, maanu so kiya de ida so pnlwanan na txtaxa heyi namu ciida we meeniq berah Utux Baro we ida asi ka meeniq txtaxa heyi namu.
Kmbburux ma Mqrinuc
25Quri ini psterung ka seediq we uka pnosa kari Bukung kenan. Kiya de mnoda ku huwe Bukung ma dehuk ku mtduwa stmaan ma so nii ka lnglungan mu. 26Gisu saya ka paru mqraqil. Qntaan mu nanak we nuuqu malu ida so kika. 27Ga su niqan mqedil we iya lngelung aalix. Nasi su uka mqedil we iya pkeyux mangal. 28Nasi su mangal mqedil we uxe niqan qnquwan noda. Nasi mosa seediq ka weewa uri we uxe niqan qnquwan noda. Ani so kika dseediq nii we moda mqraqil ka heyi daha. Ini ku kmpooda yamu so nii mooda mqraqil.
29Mtswai, nii ka rengo mu, ini qbsiyaq ka ali da. Peeyah saya niqan mqedil we ngali so uka mqedil. 30Tsdamac lmingis we ngali so ini tsdamac lmingis. Mqaras we ptnaani so ini pqaras. Maruy we ptnaani so uka ani maanu qyqeya. 31Mqqaras bobo dxeral nii we ngali so uxe nii mqaras bobo dxeral nii. Ado mphrinas ka nii taan bobo dxeral.
32So namu uxe sslhebun ka yamu. Ini psterung na we noda Bukung ka gisu na slhbenun. Gisu lmngelung mphuwa mesa psqaras Bukung. 33Wada msterung we gisu pslhebun ooda bobo dxeral. Gisu lmngelung mphuwa mesa psqaras mqedil na. 34Kiya de ida maha tgdaha ka lhebun na da. Ini psterung ma weewa we slhbenun quri ooda Bukung qbsuran. So maha mrtaso heyi na ma lhebun bgihur na. Wada rseno ka mqedil we ga slhbenun quri bobo dxeral. Gisu lmngelung mphuwa mesa pqaras rseno na. 35Rmengo ku so nii we grrihun namu, uxe ku hmetur yamu. Srengo mu we pnduwa namu moda ma pskingal lhebun namu muyu Bukung.
36Nasi niqan ka seediq lmngelung Ini ku nduwa ba quri lqlaqi na de betaq wada ka knkawas pstreengan weewa na we nasi na uka ba yeexan we spooda nanak lnglungan na msterung. Uxe qnquwan noda ka nii. 37Nasi niqan mkere bale ka lhebun seediq, uka ka kesun uka brahan noda. Asi ka spooda dheya nanak, lhebun na we ini kmposa psterung weewa na de ida malu ka so nii uri. 38Maanu so kiya de ida malu ka psterung ta weewa ta. Ini ta psai rseno uri we ida mgkala malu kiya.
39Muudus cida na ka rseno na we mqedil de ida ga sbekuy. Nasi wada msange betaq ani knuwan ka rseno na de mtraguh ka mqedil da. Heya de tduwa mosa rseno dungal. Asi ka mosa rseno ga ckceka Bukung na. 40Kiya de lnglungan mu yaku we nasi ida ini psterung we mgkala mbleyaq kiya. Gisu ku tlungan Bgihur Utux Baro ka yaku nanak uri.
Currently Selected:
1 Korinto 7: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
