1 Korinto 2
2
Gmarang jyujika Kiristo
1Mtswai, mneyah ku yamu ciida we ini ku pooda rmabang malu kari ma egu pntasan gmarang lneing Utux Baro yamu. 2Ado so ni ka lnglungan mu, meeniq ku ckceka namu we ini ku kela maanu, wano ba Yesu Kiristo ma pnttuwan jyujika ka heya ka klaun mu. 3Meniq ku yamu hiya ciida we muuwic ku, miicu ku ma pkrkerang ku. 4Kiya de ini mu daani paru niqan knkela rmengo ka kari mu ma gnarang mu. Pnooda mu beyax Bgihur Utux pgkela yamu. 5Kiya de so uxe pstama kkela seediq ma pstama namu beyax Utux Baro ka snhiyan namu.
Pntuura Bgihur Utux Baro
6Ani so kiya, meeniq nami seediq mkela lmngelung ka yami we rmengo nami niqan knkela uri. Kkela nii we uxe pneeyah bobo dxeral saya, uxe pneyah beyax mpqlahang ma seediq knkela mpkuuka. 7Gisu nami srengo nii we kkela lneing pneyah cuuxal, knkela lneing Utux Baro. Kiya ka Utux Baro we smseman na peeyah berah pnrdingan bbege na pkledax ita ka Knkela nii 8Knkela nii we ini kela ka mpqlahang bobo dxeral nii. Nasi daha klaun de kani daha ptani jyujika ka Bukung lmedax da. 9Mntena so ga spatis Patis:
“Pnsrmalan seediq sgaalu Utux Baro we
uxe ntaan doriq, uxe qnbhangan birac ma
uxe lnengelung lhebun seediq uri.”
10Wano Utux Baro spooda na Bgihur Utux pgkela ita ka noda nii. Ado mkela ani maanu ka Bgihur Utux. Ani betaq truma lnglungan Utux Baro we klaun na kana. 11Wano ba Bgihur ga ckceka seediq, ima ka maha mkela ooda seediq ho? Mntena so nii, wano Bgihur Utux Baro, uka ani ima ka mkela ooda Utux Baro. 12Wada ta ngalun we uxe bgihur bobo dxeral, pneyah Bgihur nuUtux Baro. 13Rmengo nami noda nii we uxe pnooda kari tnugesa knkela seediq, mnoda kari tnugesa Bgihur Utux. Mooda kari tnugesa Bgihur Utux pgkela nami ooda nBgihur Utux. 14Seediq nbobo dxeral we ini angal pndungus ooda Bgihur nuUtux Baro. Ngalan na mngataq ka nii ma ini na dheki mkela. Ado quri Bgihur Utux we asi ka mooda Bgihur Utux kika dhekan mkela. 15Seediq nBgihur Utux we mkela kana ani maanu. Kiya de heya we ini klai ani ima ka heya.
16“Ima ka wada mkela lhebun Bukung ho?
Ima ka dehuk tmgesa heya ho?
Kiya de ita we niqan ta lhebun Kiristo ka ita.”
Currently Selected:
1 Korinto 2: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
