1 Korinto 3
3
Theyaq Utux Baro Meepah
1Mtswai, cuuxal ge wada maku ini ngali seediq nBgihur Utux rmengo yamu. Wada maku ngalan seediq nbobo dxeral. Meniq namu ckceka Kiristo we ngalan maku rabu. 2Wada maku pmahan nunuh ma ini maku qdali ido. Ado ciida we ini namu tduwa mekan na. Ani saya uri we ini namu tduwa nana. 3Ado ida namu nbobo dxeral nana. Ckceka namu we niqan snhuur ma mtgdiyal. Uxe namu ida nbobo dxeral ma uxe namu ida muyu noda seediq muudus bobo dxeral na peni? 4Rmengo ka duma namu: “Yaku we nPoro ku.” Duma na we rmengo: “Yaku we nuApollos ku.” So kiya de uxe namu ida mntena seediq bobo dxeral na peni? 5So kiya de mnmaanu ka Apollos ho? Mnmaanu ka Poro ho? Yami we ida nami mqeepah Utux Baro kana ka yami. Spooda na yami wada namu snhii. Kana nii we mnoda bnege na pndungus knkingal nami wada nami meepah. 6Yaku we mhuma na. Apollos we posa qsiya. Wano Utux Baro ka pkdakil na. 7So kiya de uxe pusu ka mhuma ma mposa qsiya. Wano Utux Baro ka mpkdakil na. 8Mntena ka mhuma ma mposa qsiya. Kiya de maangal snadu mpuyu bqerus qneepah txtaxa daha nanak. 9Ado yami we mtheyaq nami meepah Utux Baro. Yamu we qnpahan Utux Baro ma sapah Utux Baro.
10Mnoda ku huwe bnege Utux Baro, mntena ku mdudul mpsalu sapah niqan knkela. Mhedu ku pheyu pusu sapah de meyah smalu bobo na hiya ka taxa seediq. Kiya de asi ka qmlahang bale mphuwa mesa smalu ka txtaxa daha. 11Ado pnheyu pusu sapah nii we kika Yesu Kiristo. Kiya de uka ani ima mtduwa ngalan pusu sapah. 12Nasi dmoi king, ging, btunux qrari, qhuni ma speriq ssmalu bobo na hiya ge, 13mptuura ka qneepah txtaxa daha. Ado maha ptrwaun puniq ka qneepah daha. Puniq nii we meyah psepung hmuwa ka snmalu daha. 14Nasi mgdehu bale ka snmalu daha bobo pusu nii de maha mangal snadu ka heya. 15Nasi sqmaun ka snmalu daha de maha mgqiya bale. Kiya de heya nanak we ririh mnoda ckceka puniq mpkuudus.
16Sapah Thmkuwan nuUtux Baro ka yamu ma ga ckceka yamu ka Bgihur Utux Baro we ini namu klai peni? 17Nasi smeeliq Sapah Thmkuwan nuUtux Baro ka ani ima we qada Utux Baro ka heya. Ado mrtaso ka Sapah Thmkuwan nuUtux Baro. Sapah nii we kika yamu. 18Ani ima we iya qberiq yamu nanak. Yaku we niqan knkela bobo dxeral nii nasi mesa lmngelung duma namu we nuuqu malu mngataq. Kiya de so namu maha niqan knkela. 19Ado knkela bobo dxeral we ngalan mngataq Utux Baro. Mntena ga spatis Patis:
“Bukung we spkelu lmngelung qqberiq ka seediq niqan knkela we tmebuk nanak heya.”
20Rmengo dungal:
“Mkela lnglungan seediq niqan knkela ka Utux Baro,
ado skbrhuwan ka kiya.”
21Maanu so kiya de ani ima we iya tndahu seediq. Ado nnamu ka kana ani maanu. 22Kiya de ani Poro, ani Apollos, ani Kepas, ani kana bobo dxeral, ani kndesan, ani hhuqil, ani ooda saya, ani ooda nexal uri we ida nnamu kana. 23Yamu uri we nKiristo ma Kiristo we nuUtux Baro.
Currently Selected:
1 Korinto 3: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
