1 Nooda 5
5
Lqlaqi Mslutuc Reuben
1Lqlaqi laqi Reuben tgqbsuran ba laqi Israel. Reuben nii we smrutiq qlapo tama na. Kiya de ngayan tgqbsuran laqi de, wada sbege lqlaqi mslutuc Yosehu laqi Israel. Kiya de, patis ngayan rdrudan daha de, ini puyu so knparu knkawas daha matis. 2Ani mgkala mtswai na knparu beyax ka Yehudah we, mpneyah heya ka qbsuran paru uri ma, sbege nanak Yosehu ka ngayan tgqbsuran laqi. 3Lqlaqi mslutuc Reuben tgqbsuran laqi Israel we so nii: Xanok, Palu, Xecron ma Karmiy. 4Lqlaqi mslutuc Yoel we: Laqi na Semayah, laqi na Gog, laqi na Simiy, 5laqi na Mikah, laqi na Reayah, laqi na Baal ma 6laqi na Beerah. Beerah we qbsuran mdudul pnswayan Reuben ma, wada qrapun Tiglat Pileser qbsuran paru Asur. 7Ngayan seediq pnswayan pusu rudan mtswai na we, wada ngalun pusu rdrudan na Yeiel, Jekaryahu, 8Bela. Bela we laqi Ajaj, Ajaj we laqi Sema, Sema we laqi Yoel. Meniq Aroer betaq Nebo ma Baal Meon ka Yoel. 9Meniq nklaan hido betaq yayung Euhrates ayus tadus brenux hiya ka heya. Ado egu riyung ka tnbugan daha meniq Gilad hiya. 10Soro ciida, mnccebu dseediq Hagar ka dheya. Wada poxun baga daha ka seediq Hagar. Kiya de meniq kana dxeral quri nklaan hido Gilad, meniq kobu seediq Hagar ka dheya.
Lqlaqi Mslutuc Gad
11Lqlaqi mslutuc Gad we gaga meniq sipo Reuben dxeral Basan betaq Salkah: 12Gaga ngalan pnswayan pusu rudan we Yoel, mdayo pnswayan pusu rudan we Sapan. Dungal we Yanay ma Sapa gaga meniq Basan. 13Spuyu ta tnsapah, mtswai daha we 7 heyi: Mikael, Mesulam, Seba, Yoray, Yakan, Jiya ma Eber. 14Laqi Abihayil kana ka nii. Abihayil we laqi Xuriy, Xuriy we laqi Yaroax, Yaroax we laqi Gilad, Gilad we laqi Mikael, Mikael we laqi Yesisay, Yesisay we laqi Yaxdo, Yaxdo we laqi Buj. 15Axi lqlaqi laqi Guniy, laqi Abdiel ka pnswayan pusu rudan. 16Dheya we meniq Gilad, Basan ma lualang daha ma, kana dxeral Saron betaq ayus ssiyo. 17Meniq Yotam qbsuran paru Yehudah ma Yarabeam qbsuran paru Israel ciida, wada spatis patis pusu rudan hiya kana ka seediq nii.
Dsupi Reuben Gad Menaseh Pnswayan Pusu Rudan
18Dseediq supi Reuben, Gad ma, dmeka Menaseh we mkela dmoi qqeerung, hlmadac ma budi. Mkela mosa mccebu ka mbbeyax we 4 mang 47'60 heyi. 19Mccebu seediq Hagar, Yetur, Napis ma, Nodab ka Dheya. 20Dyagan Utux Baro mccebu ciida ka dheya. Seediq Hagar ma kana smnegul seediq Hagar we wada sbege baga na kana. Ado mlawa, smtama Utux Baro mccebu ka dheya. Kiya de cmiyuk dnurun daha ka Utux Baro. 21Gneeluk daha tnbugan seediq Hagar we, 5 mang ka dapa bukung, 25 mang ka miric, 20'00 ka dapa roba, 10 mang ka seediq. 22Hbaro bale wada daha phqilun ma spaaux, ado Utux Baro pusu ba pncbuwan nii. Kiya de meniq dxeral Hagar betaq wada qrapun ciida ka dheya.
Dmeka Pnswayan Rudan Menaseh
23Dmeka pnswayan rudan Menaseh we meniq dxeral peeyah Basan betaq Baal Xermon, Senir ma, dgiyaq Xermon. Mrana bale ka seediq daha. 24Ngayan pnswayan pusu rudan daha we so nii: Eper, Yisiy, Eliel, Ajriel, Yirmeyah, Hodaweyah ma, Yaxdiel. Supi mnpahung ba, niqan ngayan ma, gaga ngalan pusu rdrudan kana ka dheya. 25Kiya de, dheya we wada niqan qnquwan noda Utux Baro npusu rudan daha ka dheya. Muyu duutux seediq hiya mnhemuc msuupu mtaqi. Dseediq nii we, kiya ka wada phqilun Utux Baro meniq berah daha. 26Maanu so kiya de, Utux Baro nuIsrael we pstutuy lnglungan Pul qbsuran paru Asur, kiya ka lhebun Tiglat Pileser qbsuran paru Asur. Heya we wada na glekun madis ka seediq Reuben, Gad ma, dmeka pnswayan rudan Menaseh, desun na betaq Xelax, Xabor, Hara ma ssiyo yayung Gojan ani betaq saya.
Currently Selected:
1 Nooda 5: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
