1 Nooda 28
28
Tmgesa Ssalu Sapah Thmkuwan ka Dawid
1Dawid we pssliun na Yerusalem ka kana qbsuran mdudul Israel, mdudul pnswayan rdrudan, dqbsuran mdayo meepah qbsuran paru, mdudul 10'00 heyi ma, 1'00 heyi, dmklawa tnbugan qbsuran paru ma lqlaqi qbsuran paru, qbsuran mdayo nniqan qbsuran paru, dmpahung supi ma, kana dmpahung supi niqan beyax. 2Mheyu ka Dawid ma rmengo: “Mtswai mu, seediq mu! Qbahang kenan! Kmsalu ku ba sapah thmkuwan, pposa mu kulu pnsdhegan Utux Tmninun, ngalun cpilan papak Utux Baro. Dungal we mhedu ku psramal qyqeya ssmalu uri da. 3Kiya de, rmnengo kenan ka Utux Baro: ‘Isu we iya salu sapah thmkuwan pnoda ngayan mu. Ado supi su mccebu ka isu ma, pnsdara su hbaro seediq.’ 4Kiya de, Utux Tmninun, Utux Baro nuIsrael we gmnao kenan mqbsuran paru Israel betaq ani knuwan peeyah kana tnsapah tama mu. Ado ngalun na pusu mdudul ka Yehudah, gmnao tnsapah tama mu ckceka tnsapah Yehudah. Yaku ka kuxul na meniq lqlaqi tama mu ma, pheyu kenan ma mqbsuran paru Israel. 5Utux Tmninun we pdngusan ku na hbaro ba laqi ma, Selomoh ka geegan na peeyah lqlaqi mu ptluungun na tluungan qbsuran paru qlhangan mpqlahang Israel. 6Rmengo kenan ka Utux Tmninun: ‘Mpsmalu sapah thmkuwan ma nniqan mu ka Selomoh laqi su. Ado ngalun mu laqi gmao ka heya ma, yaku we mmaha tama na. 7Nasi ida so saya tqlahang ba muyu kana gaya pndakar ma gaya bneku mu ka heya de, ida ku mpsdehu ani betaq knuwan ka qlhangan na.’ 8Saya, meniq namu doriq kana seediq Israel, pnsliyan Utux Tmninun, gaga tgberah bhangun Utux Baro ta ge, asi namu ka muyu ma migin kana gaya pndakar Utux Tmninun, Utux Baro namu. Tai so maangal namu dxeral malu nii ma, shiti namu lqlaqi laqi namu betaq ani knuwan.
9Selomoh laqi mu! Klai ka Utux Tmninun, Utux Baro su. Pskingal lnglungan su qmeepah heya. Ado mkela lhebun seediq ma kana lnglungan seediq ka Utux Tmninun. Migin su heya de, ida su mpsdiyal. Nasi su smtheya heya de, mpaalix sunan ani betaq knuwan ka heya. 10Saya, qlahang bale ka isu, ado Utux Tmninun we gnao sunan mpsmalu sapah thmkuwan ngalun mrtaso nniqan. Kbeyax ma qhedu ba smalu.”
11Kiya de Dawid we wada na spgkeela Selomoh kana ka sneengan na mrtaso sapah thmkuwan. Kiya ka sbesuk, sapah, repun, sapah tntunan, sapah tgtruma ma, pusu mrtaso truma. 12Kana sneengan tnugesa Bgihur: Nganguc, spsapah mtqiri na hiya, repun psaan qyqeya ddooyun sapah thmkuwan Utux Tmninun ma, mrtaso qyqeya ddooyun smapuh. 13Ddaun qmeepah msapuh ma dseediq Lewiy, lmlamu qqepah truma sapah thmkuwan Utux Tmninun ma, mpqlahang kana qyqeya ddooyun msapuh, 14Dungal we pgkela maha khenu ka king ma ging ddooyun smalu smapuh, 15pcmagan ptmean king ma ppsaun camo king, mpuyu knchdilan pcmagan ma camo king. Pcmagan ptmean ging ma ppsaun camo ging, mpuyu knchdilan pcmagan ma camo ging ddooyun daha knkingal. 16Ssmalu ging psaan smapuh ma king psaan pang smapuh. 17Ddooyun king ssmalu daquc, sara, pngerah mahan, pngerah king, mpuyu knkingal knchdilan pngerah king ma, pngerah ging, mpuyu knkingal knchdilan pngerah ging. 18Khenu ka king smlean psaan skenux psqama ma, rulu tluungun kirubing, palic daha we mubung kulu pnsdhegan nuUtux Tmninun. 19Rmengo ka Dawid: “Kana sneengan qqeepah nii we, Utux Tmninun we pnoda na patis pnatis baga spkeela ku na hiya.”
20Rmengo laqi na Selomoh ka Dawid: “Kbeyax ma pniqi pahung mooda ka isu! Iya kiicu ma iya pkrkerang uri, ado nii theyaq sunan ka Utux Baro Tmninun, Utux Baro mu. Uxe mqada sunan ma uxe malix sunan betaq mhedu su smalu sapah thmkuwan Utux Tmninun. 21Qtai! Niqan ka msapuh ma seediq Lewiy, mooda qmeepah oda qqpahun sapah Utux Baro. Dungal we niqan ka dseediq mkela ba qmeepah ani maanu, mpqaras ba dmayo sunan meepah ani manu, dungal we qbsuran mdudul ma, kana seediq we mpqbahang kana kari pnosa su uri.”
Currently Selected:
1 Nooda 28: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
