1 Nooda 23
23
1Rudan ba ka Dawid, mttuku ka ali de, pheyu Selomoh laqi na mqbsuran paru Israel ka heya.
Qpahun Seediq Lewiy
2Dawid we pssliun na kana ka qbsuran mdudul, msapuh Israel ma, seediq Lewiy. 3Ndaan smepu kana ka hmrinas 30 knkawas drseno seediq Lewiy we 3 mang 80'00 heyi daha. 4Mpqlahang oda sapah thmkuwan Utux Tmninun we 2 mang 40'00 heyi. 60'00 heyi ka mqbsuran mdudul ma dmpsgao. 540'00 heyi we mpqlahang rhengun, dungal we mpdoi tubu snmalu Dawid mptndahu Utux Tmninun. 6Dawid we tgtruun na meku ka seediq Lewiy, kiya ka lqlaqi laqi Gerson, Qahat ma Merariy.
7Gerson we Ladan ma Simiy. 8Qbsuran laqi Ladan we Yexiel, dungal we Jetam ma Yoel, 3 kana daha. 93 laqi Simiy we Selomit, Xajiel ma Haran. Pusu rdrudan Ladan ka nii. 10Laqi Simiy we Yahat, Jina, Yeus ma Biriyah. Laqi Simiy kiya. 11Yahat we tgqbsuran laqi, bukuy de Jija. Ini qhbaro ka lqlaqi laqi Yeus ma Biriyah, kiya ka ngalun 1 pusu rudan ka dheya.
12Laqi Qahat we Amram, Yichar, Xebron ma Ujiel, 4 daha. 13Laqi Amram we Aharon ma Moseh. Wada psnakun ka Aharon, prtaso na psaanak ka qyqeya mrtaso ma, so msapuh malu kenux, mqeepah berah Uutx Tmninun, mpooda ngayan na smbleyaq betaq ani knuwan ka heya ma lqlaqi na. 14Quri so lqlaqi Moseh seediq utux we gaga spatis pnswayan rdrudan Lewiy kiya. 15Laqi Moseh we Gersom ma Eliejer. 16Laqi Gersom we Sebuel. 17Laqi Eliejer we, tgqbsuran we Rexabyah. Uka laqi na rseno ka Eliejer, kiya we hbaro ka lqlaqi laqi Rexabyah. 18Laqi Yichar, tgqbsuran we Selomit. 19Laqi Xebron, tgqbsuran we Yeriyahu, bukuy we Amaryah, tg3 laqi we Yaxajiel ma, tg4 laqi we Yeqamam. 20Tgqbsuran laqi Ujiel we Mikah, bukuy we Yisiyah.
21Laqi Merariy we Maxliy ma Musi. Laqi Maxliy we Elajar ma Qis. 22Wada mhuqil ka Elajar we, uka laqi na rseno ma wano laqi mqedil ka niqan, dlaqi na mqedil we mosa seediq dlaqi Qis mtswai daha rseno. 23Laqi Musi we Maxliy, Eder ma Yeremot, 3 daha.
24Kana bobo lqlaqi laqi Lewiy nii we, gaga ngalun pusu rdrudan, pnooda lutuc tama ma, pnooda knhbragan laqi rseno mgkala 20 knkawas wada spatis ka ngayan ma, meeyah meepah oda sapah thmkuwan Utux Tmninun. 25Rmengo ka Dawid: “Utux Tmninun, Utux Baro nuIsrael we, wada psbleyaq seediq na ka heya. Heya we meeniq Yerusalem ani betaq knuwan. 26Maanu so kiya, seediq Lewiy we uxe mpheal kobu ma kana qyqeya ddooyun.” 27Pnuyu kari nhdean Dawid, wada spegun kana ka mgkala 20 knkawas seediq Lewiy. 28Qqpahun daha we mdayo lqlaqi laqi Aharon meepah oda sapah thmkuwan Utux Tmninun, mpqlahang nganguc sapah ma, dtnsapah truma, msino kana qyqeya mrtaso, mooda oda ddaun sapah thmkuwan. 29Mpsramal mege pang, nemu mugi, pang uka tgeda, nuduh ma nemu mugi pgmaxan abura curung. Dheya we seengun daha knchdilan ma kneegu ka ssapuh. 30-31Mgrebu ma gbiyan klaali, ali sngayan, tgplaale ali idas ma, ali smseman we, mpuyu gaga mbege snapuh psqmaun Utux Tmninun klaali ma, mpheyu tndahu Utux Tmninun ka dheya. 32Qmlahang kobu ma sapah thmkuwan Utux Tmninun, mqeepah lqlaqi laqi Aharon mtswai daha, mooda oda sapah thmkuwan ka dheya.
Currently Selected:
1 Nooda 23: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
