1 Nooda 21
21
Smepu Seediq Israel ka Dawid
(2 Sam 24:1-25)
1Meyah cmebu Israel ka Satang ma, pstutuy Dawid mosa smepu seediq Israel. 2Rmengo Yoab ma dqbsuran mdudul seediq ka Dawid: “Osa, sai smepu ka seediq Israel, peeyah Beerseba betaq Dan. Yahi ku hiya tmgesa, so mu klaun ka khbragan daha.” 3Cmiyuk ka Yoab: “Tai so Utux Tmninun we prnaun na msn1'00 mnrana ka seediq Israel. Pusu tnsapah ma qbsuran paru mu! Uxe tnqliyan pusu tnsapah mu kana ka dheya peni? Ma su posa kari moda oda so nii, ma su nii mege qnquwan noda Israel ho?” 4Kiya de ida pkeyux ba posa kari Yoab tthei rnengo na ka qbsuran paru. Kiya de mlatac mosa ka Yoab ma, mkkesa mtqiri kana qlhangan Israel, mnhedu de mbrinah meyah Yerusalem. 5Yoab we rngagan na Dawid ka knhbragan seediq: Seediq Israel mtduwa dmoi hlmadac we 1'10 mang heyi. Seediq Yehudah mtduwa dmoi hlmadac we 47 mang. 6Wano ba seediq Lewiy ma seediq Binyamin ka ini spegi, ado ini skuxul kari pnosa qbsuran paru ka Yoab.
7Qnnaqah meeniq doriq Utux Baro ka noda nii, kiya de mege pqraqil Israel ka Utux Baro. 8Rmengo Utux Baro ka Dawid: “Paru ba qnquwan mu noda ka oda mu nii. Saya, braho su ngali ku hiya ka qnquwan noda mu nii. Ado knngataq ba ka noda mu so ni.” 9Utux Tmninun we rmengo Gad mpgeela kari nDawid: 10“Sai rmengo ka Dawid: ‘Rmengo so nii ka Utux Tmninun: 3 ka bege mu pqraqil sunan, geegi 1, kiya ka bbege mu sunan.’” 11Kiya de, mosa Dawid hiya ka Gad ma, rmengo heya: “Rmnengo so nii ka Utux Tmninun: ‘Tduwa su gmao: 123 knkawas ka mkrayan, uxe uri we ini baka mccebu pais ma, 3 idas sdrapun hlmadac supi, uxe uri we 3 idas daan hlmadac Utux Tmninun, kiya ka snkgulan Utux Tmninun we mpaha mnarux punu moda phuqil kana qnhlangan Israel ho?’ Lnglungi saya, klaun mu mosa cmiyuk smkagul kenan.” 13Rmengo Gad ka Dawid: “Rriqu mu ba lnglungun. Nuuqu ku asi huqil ckceka baga Utux Tmninun ado niqan msngari ka huwe na. Uxe ku ba meeniq baga seediq icil.”
14Kiya de Utux Tmninun we pknrexun na mnarux punu ka seediq Israel, kiya ka wada mhuqil 7 mang ka dheya. 15Utux Baro we smnkagul snkgulan mosa smeeliq Yerusalem. Hani mpselaq ciida, qmita ka Utux Tmninun de, asi kmpriyux ka lnglungan na ma, ini na pyahi ka pkdira. Rngagan na ka snkgulan na mmaha smeeliq alang: “Baka da, sange da!” Gaga mheyu sbetan mugi Arnan seediq Yebus hiya ka snkgulan Utux Tmninun ciida. 16Mtutuy doriq na ka Dawid we, qtaan na gaga mheyu cenga karac ma dxeral, baga na we gaga dmoi hlmadac hnugeluq peeyah rudu, gisu mquri bobo Yerusalem ka snkgulan Utux Tmninun. Dawid ma rdrudan mqlahang we mlukus lukus nuqah ma tgtemaq dxeral thmuku. 17Rmengo Utux Baro ka Dawid: “Mnosa smepu seediq we uxe yaku peni? Yaku ka wada niqan qnquwan noda ma mnoda paru ba qnnaqah. So kiya de qmneepah maanu ka dmiric nii ho? Utux Tmninun, Utux Baro mu! Tai su so mpcebu kenan ma tnsapah mu, iya hrigi mnarux mpunu ka seediq su.”
18Kiya de rngagan snkgulan Utux Tmninun ka Gad mmaha rmengo Dawid, so mosa pheyu 1 spuhan meniq sbetan mugi Arnan seediq Yebus hiya. 19Muyu kari Gad ma thei kari rnengo ngayan Utux Tmninun mosa ka Dawid. 20Mquri bukuy qmita karac ka Arnan ma, wada asi tgleing ka 4 laqi mntheyaq heya. Kiya we ida ini sange smebuc mugi ka heya. 21Mosa Arnan hiya ka Dawid, qmita ka Arnan ma, qtaan na ka Dawid de, asi latac peeyah sbetan mugi ma meyah tgtemaq thmuku heya. 22Rmengo Arnan ka Dawid: “Pbrigi ku heya ka dxeral sbetan su mugi nii, puyu mttuku bbrigun smbaruy kenan, ssmalu mu spuhan Utux Tmninun bobo na hiya, kiya ka tduwa hmetur mnarux punu gaga ckceka seediq.” 23Rmengo Dawid ka Arnan: “Ngali ka ssbetan mugi nii! Tai so mpuyu malu qnita doriq pusu tnsapah mu ma qbsuran mu moda. Qtai! Mbege ku dapa ngalun snapuh psqama, qyqeya ssebuc mugi ka qhuni pthuun, ngalun snapuh pnhgalang ka mugi. Mbege ku kana dooyun ta nii.” 24Rmengo Arnan ka Dawid: “Uxe, asi ku ka mpuyu mttuku ba bnrigan maruy, ado ini ku tduwan dmoi qyqeya su mege Utux Tmninun, uxe ku mdoi qyqeya uxe bnaruy ssapuh mu mege psqmaun.” 25Kiya de ririh dxeral kiya Dawid we mege 6'00 skere king Arnan ka heya. 26Dawid we ririh Utux Tmninun smalu 1 spuhan hiya ka heya, mege snapuh psqama ma snapuh ptbale dmurun Utux Tmninun. Kiya de smruwa heya ka Utux Tmninun ma, ptuting puniq bobo spuhan peeyah karac baro. 27Posa kari snkgulan ka Utux Tmninun de, kiya de wada na psaan rudu ka hlmadac di.
28Ciida, qtaan Dawid, wada smruwa heya meeniq sbetan mugi dxeral Arnan seediq Yebus hiya ka Utux Tmninun de, mege snapuh hiya ka heya. 29Ciida, wano ba smapuh meeniq spuhan Gibon hiya, kiya ka snmalu Moseh tadus brenux ka kobu mrtaso nuUtux Tmninun ma spuhan bbege tnbugan. 30Kiya de Dawid we, ini tduwa mosa smiling Utux Baro ka heya, ado miicu hlmadac snkgulan Utux Tmninun ka heya.
Currently Selected:
1 Nooda 21: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
