1 Nooda 19
19
Ini Baka ka Seediq Amon ma Seediq Aram
(2 Sam 10:1-19)
1Bobo na, mhuqil ka Naxas qbsuran paru seediq Amon, laqi na ka lmutuc mqbsuran paru. 2Rmengo ka Dawid: “Hmuwa mesa snbleyaq kenan ka Naxas tama Xanun we, maha so kiya mpbleyaq ku Xanun uri.” Kiya de ririh tama na smkagul snkgulan mosa smbeyax heya. Dehuk dxeral seediq Amon meeyah qmita Xanun ma smbeyax heya ka tnqliyan Dawid. 3Kiya de we, rmengo Xanun ka qbsuran mdudul seediq Amon: “Smkagul seediq ka Dawid we uxe su yaa mesa nii meyah smbeyax sunan ma smparu thmuku tama su ho? Meyah mita sunan ka snkgulan na we, yaa uxe meeyah kmuuruy qmita, kmremux qlhangan ta ho?” 4Xanun we asi na qrapi ka mdayo qbsuran snkgulan Dawid, kgusi daha ngudus ma, sqitun daha ka lukus peeyah hwinuk quri toma ma tqita ka puyaq daha ma, lwaqun daha peeyah dxeral daha ka dheya. 5Mlatac ka dheya. Srengo daha Dawid ka ndaan tnqliyan na, kiya de smkagul seediq mosa smterung dheya ka heya. Ado msiqa riyung ka dheya. Rmengo ka qbsuran paru: “Tduwa namu meniq Yerixo. Betaq bbaro ka ngudus de eyah di.”
6Dseediq Amon mita tmraqil dheya ka Dawid de, smkagul seediq madis 10'00 tarantu ging ka seediq Xanun ma Amon. Mosa psadu rulu mccebu ma supi paapa dapa dmay peeyah Misputamiya, Aram Maakah ma Cobah. 7Psadu 3 mang 20'00 rulu mccebu, qbsuran paru Maakah ma, supi na ka dheya. Dsupi nii we meeyah pkobu Meydba hiya kana. Seediq Amon we mlatac peeyah alang daha, mosa psramal mccebu uri. 8Mbahang ka Dawid de posa kari Yoab ma kana mnpahung ba supi na. 9Psramal berah rhengun ka seediq Amon ma, psramal mccebu bukuy alang hiya ka dqbsuran paru.
10Yoab we qmita gisu psramal mccebu berah ma bukuy ka dheya de, gmao mnpahung ba supi Israel mpsterung mccebu supi Aram. 11Duma na ka supi we spdudul na baga Abisay mtswai na ma, mquri seediq Amon mosa psramal mccebu ka dheya. 12Rmengo ka Yoab: “Nasi mgkala sunan ka seediq Aram de, eyah dmayo kenan ka isu. Nasi mgkala kenan ka seediq Amon de, mosa ku dmayo sunan ka yaku. 13Knbeyax ba ka isu, ririh dseediq ta nanak ma lualang Utux Baro ta ka skpahung ta. Tai so mpuyu nanak knmalu Utux Tmninun moda!” 14Kiya de, mosa mccebu seediq Aram ka Yoab ma supi smnegul heya. Qduriq peeyah berah na ka seediq Aram. 15Qmita wada qduriq ka seediq Aram de, qduriq peeyah Abisay mtswai Yoab uri ka seediq Amon ma mosa mremux alang daha. Kiya de Yoab we wada Yerusalem da.
16Wada ini baka Israel ka seediq Aram de, smkagul snkgulan seediq mosa mlawa seediq Aram yayung Paru meeyah hini. Sopak qbsuran supi Hadadejer ka dmudul berah daha. 17Rmengo Dawid ka duma seediq, kiya de psseli seediq Israel mtaril yayung Yarden ma, betaq seediq Aram hiya ma, psramal mccebu hiya ka dheya. Mccebu seediq Aram ka Dawid, kiya we mccebu dheya ka seediq Aram. 18Qduriq peeyah berah seediq Israel ka seediq Aram. Dawid we phuqil 70'00 heyi supi rulu mccebu ma, 4 mang supi mkkesa, dungal we phqilun na ka Sopak qbsuran supi Aram. 19Qmita wada ini baka Israel ka Dqbsuran mdudul Hadadejer de, mosa mptbale rmengo Dawid ma, mpthei heya. Kiya de ini dayo seediq Amon ka seediq Aram.
Currently Selected:
1 Nooda 19: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
