1 Nooda 12
12
Dseediq Binyamin Plaale Smnegul Dawid
1Toma na nii we ado Qis laqi na Soro qbsuran paru ka Dawid, wada saan paalix Ciqlag ciida, niqan ka supi mccebu mnosa dmayo heya we so nii. 2Dheya ge mduwa ba pstalang daha budi, ani baga daha iril ma narac we mtduwa dmoi budi ma gmkuwak cmebu btunux. Seediq Binyamin kiya ka mtswai pnswayan rudan Soro we mkela ba dmoi budi. 3Pusu mdudul na we Axiejer, bukuy na de Yoas, dheya nii we laqi Semaah seediq Gibeah. Dungal we laqi Ajmawet Yejiel, Pelet, Berakah ma Yehu seediq Anatot, 4Yismayah seediq Gibon, heya ka supi mnpahung ckceka 30 heyi nii ma, dmudul dheya. Dungal we Yirmeyah, Yaxajiel, Yoxanan, Yojabad seediq Gederah, 5Elujay, Yerimot, Bealyah, Semaryahu, Sepatyahu seediq Xarup, 6seediq Qorax we Elqanah, Yisiyahu, Ajarel, Yoyisya, Yasabam, 7Yoelah ma Jebadyah laqi Yeroxam seediq Gedor.
Dseediq Gad Smnegul Dawid
8Duma dseediq Gad we mosa dmayo Dawid gaga meniq qbrangan na tadus brenux hiya ka Dawid. Dheya we supi mpahung supi kana ma, mduwa ba dmoi qeerung heyi ma smbrangan kana. Hnyegan daha we mntena rkelic rudu ma, mntena rqenux ka knsliko daha. 9Tgplaale we Ejer, tg2 we Obadyah, tg3 we Eliyab, 10tg 4 we Mismanah, tg5 we Yirmeyah, 11tg6 we Atay, tg7 we Eliel, 12tg8 we Yoxanan, tg9 we Elisabad, 13tg10 we Yirmeyahu, ma tg11 we Makbanay. 14Qbsuran supi seediq Gad kana ka dheya, tgbiciq na we mntena 1'00 heyi, tgparu na we mntena 10'00 heyi. 15Tgkingal idas knkawas ciida, mssipo mnkala baro ka qsiya yayung Yarden ciida, moda mtaril hiya ma saan daha pkrehak ka seediq ga meniq iyiayu hiya.
Dseediq Binyamin ma Yehudah we Smnegul Dawid
16Duma dseediq Binyamin ma Yehudah we mosa qbrangan Dawid hiya. 17Meyah smterung dheya ka Dawid ma, rmengo dheya: “Nasi namu mtbale dmayo kenan we maha mntena ba yamu ka lhebun mu. Nasi ku namu sbaruy pais ka baga mu uka qnquwan nii de, tai so Utux Baro npusu rudan ta ka mpkdira yamu.” 18Amasay qbsuran pusu mdudul supi qrapun Bgihur Utux Baro ma rmengo:
“Dawid! Mpquri miyan sunan ka yami!
Laqi Yisay! Mpdayo miyan sunan ka yami!
Tai su so mpbleyaq,
tai so mpbleyaq ka seediq dmayo sunan uri!
Ado mdayo sunan ka Utux Baro su.”
Kiya de Dawid we pniqun na hiya ma, ngalan na qbsuran supi na ka dheya.
Seediq Menaseh we Smnegul Dawid
19Msuupu seediq Peliset mosa mccebu Soro ciida ka Dawid we, mneyah dmayo Dawid ka duma seediq Menaseh. Bale ba we ini dayo seediq Peliset ka dheya, ado wada mpprengo ka dqbsuran mdudul seediq Peliset: “Nhuwa meyah mangal tunux ta mpquri tnpusu sapah na Soro hiya ka Dawid.” 20Mqquri Ciqlag ka Dawid ciida, meyah dmayo heya ka dqbsuran supi dmnudul 10'00 heyi seediq Menaseh: Adnax, Yojabad, Yediael, Mikael, Yojabad, Eliyhu, ma Ciltay. 21Dheya we dmayo Dawid mosa mccebu supi pais. Ado supi mnpahung ba kana ka dheya ma, ngalan qbsuran supi kana. 22Klaali niqan ka seediq meyah tuumal Dawid. Kiya de ini beyo ma paru ba qpuruh supi na ka supi Dawid, mntena qpuruh supi Utux Baro.
Supi Dawid
23Mneyah mita Dawid meniq Xebron hiya, mpuyu so kari Utux Tmninun bbege na Dawid ka dsupi qnlhangan Soro we so nii: 24Dsupi tduwa mangal qeerung ma smbrangan ka seediq Yehudah we 68'00 heyi. 25Dsupi mnpahung mtduwa mccebu ka seediq Simeon we 71'00 heyi. 26Niqan 46'00 heyi ka seediq Lewiy. 27Mneyah smnegul ka Yehoyada pusu mdudul tnsapah Aharon we 37'00 heyi. 28Dungal we Cadoq riso mnpahung ba supi ma msuupu 22 qbsuran supi daha. 29Mtswai Soro dseediq Binyamin we 30'00 heyi. Betaq saya thei sapah Soro ka duma daha na. 30Niqan ngayan supi mpahung meniq pnswayan rudan Eprayim we 2 mang 8'00 heyi. 31Niqan ngayan gaga patis mneyah dmayo pheyu Dawid mqbsuran paru ka dmeka pnswayan rudan Menaseh we 1 mang 80'00 heyi. 32Dpusu rudan seediq Yisaskar, mkela ba oda, mkela ba ddaun Israel ma, mbahang bale kari we 2'00 heyi. 33Mtduwa dmoi qyqeya ani maanu mccebu ma, asi pskingal ba lhebun daha mccebu ka dseediq Jebulun we 5 mang heyi. 34Dqbsuran supi seediq Naptaliy we 10'00 heyi ka mneyah smnegul. Dmoi qeerung ma smbrangan we 3 mang 70'00 heyi. 35Tduwa mccebu ka dseediq Dan we 2 mang 86'00 heyi. 36Tduwa mccebu ka dseediq Aser we 4 mang heyi. 37Tduwan dmoi qyqeya ani maanu mosa mccebu ka seediq Reuben gaga meniq yayung Yarden nklaan hido, seediq Gad ma, dmeka pnswayan rudan Menaseh we 12 mang.
38Kana bobo nii we dsupi mnpahung mosa mccebu. Dheya we bale ba niqan lhebun daha meyah Xebron, meyah pheyu Dawid mqbsuran paru Israel. Duma dseediq Israel we, pskingal ba lhebun daha pheyu Dawid mqbsuran paru kana. 39Mk3 ali meniq hiya ma msuupu mekan ma mimah Dawid. Ado tena mhedu psramal ka mtswai pnswayan rudan daha. 40Dseediq ssiyo daha, dseediq Yisaskar, Jebulun ma, Naptaliy we spaapa daha dapa roba, dapa bukung, dapa sbirac ma, dapa maadis uqun, egu ba pang snmalu mugi, pang nunuh, lipas dnngean, sino, abura. Dungal we madis egu ba dapa ma miric, ado stenge qnaras kana ka Israel.
Currently Selected:
1 Nooda 12: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
