1 Nooda 11
11
Mqbsuran Paru Kana Israel Ka Dawid
(2 Sam 5:1-10)
1Mosa msseli Xebron qmita Dawid ka kana seediq Israel ma rmengo: “Qtai! Tnsapah su ka yami. 2Mqbsuran paru miyan ciida ka Soro we, isu ka dmnudul seediq Israel mosa mccebu. Rmnengo sunan ka Utux Tmninun, Utux Baro nuIsrael: ‘Mdanga su seediq mu Israel ka isu, mpqbsuran su paru seediq mu Israel ka isu.’” 3Kiya de meyah Xebron meyah qmita qbsuran paru ka kana ddrudan Israel. Psdehu dheya meniq berah Utux Tmninun ka Dawid meeniq Xebron. Kiya de hrigi daha abura ma ngalan daha qbsuran paru Israel. Mntena kari Utux Tmninun rnengo na Samuel.
4Dawid ma seediq Israel we mosa alang Yerusalem, kiya ka Yebus. Gaga meniq hiya ka seediq Yebus ciida. 5Rmengo Dawid ka seediq Yebus: “Uxe mpdehuk mremux alang hini ka Dawid.” Kiya de wada ngalun Dawid ka qbrangan Sion. Kiya ka alang Dawid. 6Rmengo ka Dawid: “Ima ka mplaale ba mccebu seediq Yebus we, mpqbsuran mdudul ma ngalun qbsuran supi ka kiya.” Kiya de plaale mosa ka Yoab laqi Ceruyah, kiya ka ngalun qbsuran supi ka heya. 7Meniq qbrangan ka Dawid, kiya de “Alang Dawid” kesun daha tmngayan ka qbrangan nii. 8Dawid we prnaan na smalu spiyah na Miru ka qnabil alang dungal. Duma na hiya de snlmean Yoab ka kiya. 9Mrana klaali ka beyax Dawid, ado msuupu heya ka Utux Tmninun Mdoi Kana Supi.
Dmnpahung Supi Dawid
(2 Sam 23:8-39)
10Dmnpahung supi Dawid ka toma nii: Dheya ka dmnayo heya mangal qlhangan ma, muyu kari Utux Tmninun rnengo na Israel. Msuupu kana seediq Israel pheyu heya ma mqbsuran paru. 11Ngayan mnpahung supi Dawid we so nii: Laqi Xakmoniy we Yasabam. Heya ka pusu mdudul kana supi qbsuran. Mccebu ka heya we mntexal ba pstutuy smbrangan de tduwa phuqil heyi ka pnhqilan na.
12Dungal we laqi Dodo seediq Axoxi ka Elajar, 3 ka supi mnpahung we heya ka kingal. 13Heya we msuupu Dawid mccebu seediq Peliset Pas Damim hiya. Qduriq ka seediq Israel ciida we, pida ba meeniq ckceka qnpahan mugi paru ka hiya. 14Mgdehu mheyu qmlahang ckceka tglayan qnpahan hiya ka dheya ma, wada daha ini baka ka seediq Peliset. Wada mbeyax riyung ka Utux Tmninun.
153 heyi ckceka 30 qbsuran mdudul we wada mquri pusu btunux hiya ma, mremux lhengo Adulam mosa qmita Dawid. Dsupi Peliset we gaga pkobu ayu Ripayim. 16Meniq qbrangan na ka Dawid ge, dsupi seediq Peliset we meeniq Betlexem. 17Mhqeni riyung ma lmngelung ka Dawid: “Tai so maha niqan seediq piimah qsiya bnbulan na hghugan gaga ssiyo rhengun alang Betlexem!” 18Kiya de mosa hmrinas pkobu seediq Peliset ka 3 mnpahung supi nii ma, bubul qsiya peeyah ssiyo rhengun alang Betlexem ma, desun daha piimah Dawid. Kiya we, ini sruwa miimah ka heya ma, scuwaq na berah Utux Tmninun ka qsiya. 19Rmengo ka heya: “Utux Baro mu! Uxe ku mooda oda so nii! Dseediq nii we betaq ini kiicu qnhuqil daha mosa bubul qsiya. Qsiya nii we pnririh knuudus. So kiya de huwa mu kesun mimah ka dara daha di?” Ini sruwa miimah qsiya ka Dawid. So nii ka ndaan 3 heyi mnpahung ba supi nii.
20Abisay mtswai Yoab ka qbsuran ckceka 3 mnpahung supi nii. Dmoi smbrangan wada phuqil 3'00 heyi ka heya, kiya ka niqan ngayan ckceka 3 mnpahung supi nii. 21Heya we mgkala 3 mnpahung supi ma 2 tgberah nii ka ngayan na, kiya ka phyegun daha qbsuran mdudul dheya. Ani so kiya we ini mkala 3 supi mnpahung tgberah kiya ka heya.
22Benayah mnpahung supi laqi Yehoyada pneeyah Qabceel we egu ba qneepah na. Wada phuqil 2 laqi Ariyel seediq Moab ma pkelu ali qhdean ciida, hmeruc mosa beling lhengo phuqil tnarux rkelic rudu. 23Dungal we smnlipaq 1 paru ba 5 sese seediq Micrayim ka heya. Dmoi smbrangan ka baga seediq Micrayim, mntena hligan qrian ware qnthuran na. Wano ba qreti dooyun na mosa hiya ka Benayah ma, wada na glekun peeyah baga na ka smbrangan ma, dmoi smbrangan nii phuqil heya. 24So nii ka qneepah Benayahu laqi Yehoyada, kiya ka dehuk mangal ngayan ckceka 3 mnpahung supi. 25Qtai! Mnkala 30 mnpahung supi niqan ngayan ka heya. Kiya we ida ini pgkala 3 mnpahung supi tgberah ka heya. Dawid we ngalan na qbsuran supi mpqlahang sapah qbsuran paru ka heya.
26Supi mnpahung ba we Asahel mtswai Yoab. Elxanan laqi Dodo seediq Betlexem. 27Samot seediq Haror. Xelec seediq Belon. 28Ira laqi Iqes seediq Teqoa. Abiejer seediq Anatot. 29Sibkay seediq Xusat. Ilay seediq Axoxi. 30Mahray seediq Natopat. Xeled laqi Baanah seediq Natopat. 31Itay laqi Ribay seediq Gibeah pnswayan rdrudan Binyamin. Benayah seediq Piraton. 32Xuray seediq pneeyah ayu Gaas. Abiel seediq Arbat. 33Ajmawet seediq Baxarumi. Elyaxba seediq Sarbun. 34Lqlaqi Hasem seediq Gejon. Lqlaqi Yonatan, laqi Sage seediq Harar. 35Axiam laqi Sakar seediq Harar. Elipal laqi Ur. 36Xeper seediq Mikila. Axiyah seediq Belon. 37Xecro seediq Karmel. Naaray laqi Ejbay. 38Yoel mtswai Natan. Mibxar laqi Hagri. 39Celeq seediq Amon, Naxray seediq Beerot mdoi qyqeya mccebu Yoab laqi Ceruyah, 40Ira seediq Eter ma, Gareb seediq Eter. 41Uriyah seediq Xet. Jabad laqi Axlay. 42Adina laqi Sija seediq Reuben, heya ka 1 qbsuran mdudul 30 seediq Reuben. 43Xanan laqi Maakah. Yosapat seediq Mitniy. 44Ujiya seediq Asterat. Sama ma Yeiel, laqi Xotam seediq Aroer. 45Yediael ma Yoxa mtswai na, laqi Simriy seediq Ticiy. 46Eliel seediq Maxawim. Yeribay ma Yosaweyah, laqi Elnaam. Yitmah seediq Moab. 47Eliel, Obed ma Yaasiel seediq Mecobayah.
Currently Selected:
1 Nooda 11: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
