1 Nooda 10
10
Mgedang Soro Qbsuran Paru
(1 Sam 31:1-13)
1Mccebu Israel ka seediq Peliset. Qduriq peeyah berah seediq Peliset ka seediq Israel. Hbaro ba seediq wada phqilun mspaux dgiyaq Gilboa hiya. 2Ini sange smdurak Soro ma laqi na ka seediq Peliset. Kiya de wada daha phqilun ka Yonatan, Abinadab ma, Malkiy Sua. 3Paru riyung ka pncbuwan Soro ciida, wada buun budi ma paru nngalan na luqah ka Soro. 4Kiya de rmengo mdoi qyqeya mccebu ka Soro: “Hgeluq ka hlmadac su ma phqili ku. So uxe meeyah tmsiiyax kenan ka seediq uxe mnoda psalak.” Kiya de miicu riyung ka seediq nii mangal hlmadac ma, ini sruwa smipaq heya. Kiya de mangal hlmadac ka Soro ma ptbetaq nak mhuqil bobo hlmadac. 5Seediq dmoi qyqeya ka qmita Soro mhuqil de ptbetaq hungul bobo hlmadac nanak ka heya uri da. 6Wada so nii mhuqil ka Soro ma 3 laqi na ma, kana tnsapah na. 7Seediq Israel gaga meniq brenux we qmita wada mhuqil ka Soro ma laqi na de, qduriq ka supi Israel ma, malix alang qduriq uri ka dheya. Meyah ka seediq Peliset ma dheya ka wada mangal alang daha.
8So kusun, meyah rmehak lukus pnhqilan daha ka seediq Peliset, slayan daha nii mksaro mhuqil dgiyaq Gilboa ka Soro ma laqi na. 9Sgliqun daha mangal ka lukus na mccebu ma ngalun daha tunux na ma qyqeya na Soro, kiya de smkagul seediq ka dheya ma mosa knkingal alang Peliset spgkela daha tikung ma seediq ka kari nii. 10Ngalun daha ka qyqeya Soro ma psaun daha truma sapah utux daha, pssduyun daha sapah Dagon utux daha ka tunux Soro. 11Seediq Yabes gaga Gilad we, mbahang kana noda seediq Peliset quri Soro, 12mlatac mosa ka seediq mnpahung ba hiya ma, saan daha gmeeluk mangal ka bqerus Soro ma dlaqi na. Desun daha Yabes ma reesun daha toma qhuni raus, ini ekan mk7 ali ka dheya.
13So nii ririh wada mhuqil ini qbahang ka Soro. Ado tbrinah Utux Tmninun, ini puyu kari Utux Tmninun ma, mosa smiling utux seediq mnhuqil ka heya ma, 14ini siling Utux Tmninun. Kiya de wada phuqil heya ka Utux Tmninun ma, sbege na Dawid laqi Yisay ka qnlhangan na.
Currently Selected:
1 Nooda 10: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
