Jakari 4
4
Kag lamba kɨ kag olib kɨjoo
1Malaika in el sem ta ye, tel ɗe ndoolɨm tit'n hã a ndoolɨn ne de dɔ bĩt, elɨm an: 2I oo ɗi a? M'tur m'an: M'nɔl lo na oo kag lamba kɨ ɗan kɨ nar ɔrr kɨtaagbe kɨ ɓaia kɨdɔt kɨ lambag kɨdɔt tanãimɨta kɨ bulo kaw yib lo lambag kɨtanãimɨta'n non. 3Kag olib joo kadat nderbe, kɨkɨɗa i ko jikõat, kɨmad i ko jigelat, 4M'un ta m'el malaika kɨ ngekelsem ta, m'an: Ngeem, nyag 'nten ye, i ɗi a? 5Malaika'n el sem ta tur elɨm an: I ger girr nyag 'nten ale? M'tur m'an: Ã ã ngeem, m'ger al. 6Kamla tur elɨm an: 'Nten i ta lo Bɨraɓe'n hã el Jorobabel an: I kɨtakul ngang, ke tɔg al na kɨtakul Ndilɨm, kel Bɨraɓe Ngekoosɨg.
7Ĩn mbalbo, ĩn nõ a? Nõ Jorobabelt a i lo kɨ asɨna tõri. A tee kɨ bɨra mbal kɨdɔ kumlot na deg a kon kɨ ronel anan: Maj, maj kɨdɔat.
8Ta lo Bɨraɓe ɗe romt ɓaitɔ an: 9Ji Jorobabel ndah girr kuj'n ɗan, na jia tɔ la a tɔlɨn koon kuj'n non tɔ ho ye. Kamla a i ger ta kad Bɨraɓe Ngekoosɨg la lam kɨrosɨt ye. 10Maj kad i kid nyag kɨdu al, na maj kad ɗan ronel lon a na a oon nyakɔj nya ji Jorobabelt. Kɨtanãimɨtag'n non ĩn kum Bɨraɓe ĩgɨn ndɨ lan go dɔning kɨtaagbe.
11Kamla m'ela m'an: Kag olib kɨjoo kɨ kokõ kag lambat kɨ kogelat ye, ĩn ɗi a? 12M'ela ta nja kɨ ngekõjoo m'an: Dɔj kag olib kɨjoo'n yib tet aw kam bulo kaw yibt kɨ nar ɔrr kɨjoo, na ãi kam ɓai nar ɔrrt ye, ĩn ɗi a? 13Malaika turɨm an: I ger girr nyag 'nten ale? M'el m'an: Ã ã ngeem, m'ger al. 14Kamla el an: Kɨjoog'n non la ĩn kɨwur Ĩgɨn ɗan nõ Bɨraɓet Ngedɔning kɨtaagbe ye.
Currently Selected:
Jakari 4: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
