Romag 11
11
Luwah mbet deg lon al
1M'ndɨje ta mad ɓaitɔ. Luwah a mbet girrdeg lon a? Ãã, i titbe al. Kɨtɔ mĩ kɨ dɔm, mĩ de kɨ Israelt ho, mĩ ngoka Abraham, mĩ ko girrkooj Benjamit. 2Luwah mbet girrdeg lon'n kɔtd kete nõ al bat. I gerɨn ta'n ndangɨn kam maktubt dan ne dɔ ngékelta kɨ ta Luwaht ye ale? Eli kɔ Luwah kɨ rotĩn dɔ kɨlaɗa Israelt kɨ goot al, 3an: Bɨraɓe, deg'n non tɔlɨn ngékelta kɨ tait, tɔɔn dɨngɨr kadkarig loi, mĩ kɨ kɨɗam be la m'nai ye, na deg ndɨ sahn tɔlɨm tɔ. 4Na ta ɗi Luwah tura a? Luwah tura an: m'ngom deg dub tanãimɨta ĩgɨn a ndulon gom kɨndɔg, na ɔsɨn gojd ber nõ Baalt al. 5Titbe tɔ kaglot kɨ ɓola ndeg deg tẽbe ĩn nõ ku Israelgt, ĩgɨn Luwah mbed'd kɨtakul kamkẽ lon. 6Ĩla Luwah mbed'd kɨtakul kamkẽ lon taa ne, i kɨtakul kɨlaɗadg al bat. Na ĩla mbed'd kɨtakul kɨlaɗadg a ne, kamkẽ lo Luwah i kamkẽ al. 7Girrta 'nten i ɗi a? Nya'n Israelag sahn ye ngahn al, na deg'n Luwah mbed'd la ngahn ye. Luwah ad kam Israel madg kongkong, 8kɨgo tat'n ndangɨn kam maktubt lo Luwah anan: Luwah ad ngarkamd to kɨ ɓi, ut kumd kad oon lo al, boi mbid kad oon dɔ ta al mbã ɓola. 9Dabid tɔ el an: Kɨ nyasa lod tel gum kɨ ya nõdt, tel band kad hɔd, kɨ gig kad gad ad son, na kɨ nyakɨto ɗad. 10Kɨ kumd ut mbukɨ kad oon ne lo al, kɨ ad gid'd ɗug kɨndɔg. 11M'ndɨje ta mad tɔ i gig'n ga Juipg ye gad kad son ne kɨ nõdt e? Be al. Na i kɨtakul sod kam majalt nõ la, girrdeg kɨ dang dang ngahn ne ɗob tee kɨ kajt ye. Luwah ɗa titbe kad'n sɔkɨn Israelag kad ɗan jang. 12Na ĩla son Israelag son kam majalt ad maj urrɨn deg kɨ dɔningt, tujɨn ngahd ad maj urrɨn girrdeg kɨ dang dang a ne, kɨta 'nten lon a telɨn kɨro Bɨraɓet kɨtaagbe a ne, maj a urr deg ngãi tɔi kɨ kete.
Ɗob'n Luwah ajɨn girrdeg kɨ dang dang
(Oo Mat 21:40-43; Epe 2:7-13)
13Tajigla m'ndɨ m'elsɨ ta, ĩn girrdeg kɨ dang dang. Mĩ ngombangkɨla'n Luwah lam kɨ rosɨt, ĩgɨn ĩn Juipg al, kɨta 'nten m'ndɨ m'ɔsɨgon kɨla'n Luwah la jimt, 14kɨtakad m'sɔkɨn noojɨm Juipg kad jang ɗad, kad kɨmadg ɗen kɨro Luwaht ad adj'd, titbe al a ne, 15lon Luwah mbetd ye, la nooj nat kɨ deg kɨ dɔningt. Na lon Luwah a tel hɔd kɨ ront ye, ɗi a ɗa nya a? Ngékoig a tel ndɨn kumkajir. 16Na ĩla gaj bɨna kɨdasa i kɨ nda nõ Luwaht a ne, bɨna kɨtaagbe i lo Luwah ho. Ĩla ngɨra kag i kɨ kad Luwah a ne, dɔj kagg'n non ĩn lo Luwah ho. 17Girr Israel i tit kag olib kɨɓe'n gangɨn dɔjia madg kɔ na ĩgɨn ĩn Juipg al ĩn tit dɔj kagbirg kɨ mut be, usɨsɨn dɔ kag olibt kɨɓe gotdt, ad i ndɨ i gan na sed dɔ ngɨraat 18Kɨtɔ 'nten ot kid dɔjiag kɨ gang kɔ nõ. Ĩla i ndɨ i kid'd a ne, oo maj, i ĩ hã i ndɨ i to ngɨra al na ngɨra la ndɨ tɔi ye. 19A el an: Gangɨn dɔjibirg kɔ kad usmɨn gotdt. 20El rota, Luwah ga gangd kɔ kɨta adɨna kamd al, na Luwah ad i ɗa gotdt kɨta ĩ, ada kami. Ot koo roi nya madt, na i ɓool Luwah, 21kɨta ĩla Luwah nya Juipg'n ĩn dɔjiag lo ndadt kɨ kete nõ al a ne, a nyai al ho. 22Oon maj. Luwah i ngekammaj, kamla ndɨ ɓawong kɨ deg'n mbetɨn ɗob loa, na ĩn ta, oon kammaj loa kɨtɔsɨ. Ĩla i hɔn rosɨ bá kɨ kam majt a ne, a mbetsɨ al. 23Na Juipg taa, ĩla tɔrrɨn ndid, na adɨn kamd Jeju a ne, Luwah a usɨd gog dɔ gind'dt. 24Ĩgɨn ĩn Juipg al, ĩn tit dɔj kag kɨ mut kɨ ga gang, na usɨsɨn dɔ gind kag olibt kɨɓe. Na Juipg'n ĩn dɔj kag kɨ jeje'n ga gangɨnd kɔ ye, õ al kad Luwah usɨd dɔ gind'dt gog.
Juipg a ajɨn ho
(Eja 59:19-21; Jer 31:31-40; Eja 36:22)
25Ngankom m'ndig kad i ndɨn dai dɔ tat kɨmund 'nten al kɨtakad oon rosɨ ngéterrt al, kam kɨ kongkong ɗa gaj Israel mbã ad girrdeg kɨ dang dang kɨ dɔningt telɨn kɨro Luwaht. 26Titbe tɔ la girrdeg kɨ Israelt tube a ajɨn kɨgo tat'n ndangɨn kam maktubt lo Luwah: Ngekaj deg a tee ko kamɓet kɨ Siõ. A ɔrr nyaɗa kɨgo lo Luwaht al lo ngan Jakob kɔ. 27Luwah el an: 'Nten la i kunkɔ'n m'un sed, lon m'nyan go majalg lod kɔ. 28Juipg ta mbetɨn Hoita kɨmaj ad telɨn madngéta Luwah. Kɨtɔ 'nten, Luwah ajsɨn ĩgɨn ĩn Juipg al. Na Luwah mbed'd kad ĩn deg lon, tard titbe kɨtakul kunkɔ'n un ad bɔwdg. 29Kɨtɔ kadkarig'n Luwah ndɨ ad deg kɨgo kamkẽt lon, kɨ kunɨn Luwah ndɨ kund kɨ ront ye, a mbel go ndin al bat. 30Ĩn ngétaata lo Krist, maɗi i telɨn rosɨ go tat lo Luwah al. Na tajigla, Luwah oo kumtondo losɨ kɨta Juipg'n telɨn rod go tat loa al. 31Titbe tɔ, Juipg ĩn ngételrod go tat lo Luwah al tajigla, kɨtakad Luwah oon kumtondo losɨ, kɨtakad ĩng kaa ne, Luwah oon kumtondo lod ho. 32Kɨtɔ Luwah nya ta ɗob ad deg tube tɔin dɔ ta, kɨtakad n'ɔjɨn kamkẽ lon deg tube.
Luwah i kɨbo tɔitɔi
33Oo nyamajg lo Luwah i ngãi kɨ tɔi. Terr loa, kɨ nya ger loa ĩn kɨ kookɨɓing. Tag kɨ gang loa dum nder girrd. Nõ asɨ ger girr ɗob nyaɗaag a? 34Maktub lo Luwah el an: Nõ ger tagah Bɨraɓe a? Nõ asɨ kĩ ngekɔja a? 35Nõ ad nya mad Luwah kete kɨtakad ada ban girra a? 36Dea goto, kɨta ndah nyag tube, nyag tube ĩn kɨtakula, nyag tube ĩn kɨ loa tɔ. Kɨ kɔsɨgon i lo Luwah mbãkɨnõt. Amin.
Currently Selected:
Romag 11: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
