Romag 10
10
1Ngankom, nya'n kamm ndig ngãi la ten: I kad Juipg ngahn kaj. M'kɔ Luwah kad ajd. 2Kɨtɔ m'ndɨ m'mand naj, ndɨ ɗan kɨla lo Luwah kɨkanj ger ɗoba jeje. 3Kɨtɔ gerɨn ɗob'n Luwah ndɨ telɨn deg denesew nont al, na ndɨ sahn ɗob kɔrrta dɔt kɨ kɔsɨ dɔd, titbe mbetɨn ɗob'n Luwah ɔrrɨn ta dɔ degt. 4Kɨtɔ Krist tɔlta mberkɨnda, ndɨ ɔrrta dɔ degt tube'n adɨna kamd.
Kaj kɨta dekɨɗen'n ndɨ adkamɨn Krist
5Moij ndang ta 'nten dan dɔ tel de denesew nõ Luwaht kɨ ɗob ngomgo mberkɨnda an: De'n hɔ nyaɗa kɨgo mberkɨndat kɨtaagbe a ne, a ndɨ kɨ dɔn dõ kɨtakula. 6Na ta dɔ tel de denesew nõ Luwaht kɨ ɗob kadkam ye, i dang, elɨn anan: Ot kel kamit kan: Nõ a aw dõ kam dɔrãt a? Ad i kad Krist ɗisɨ ber. 7Ot kel kamit tɔ kan: Nõ a aw tee koo? Krist ɓai ku ngékoit. 8Ta lo Luwah el an: Ta i roit nderbe, i tait, na i kamit tɔ. Ta'n non i ta kadkam Krist'n kɨ ndɨ kɨ la mbera deg j'an: 9Ĩla i tɔ tait kɨ tɨga wakɨsɨ an: Jeju i Bɨraɓe, na i ger ngarkamit Luwah ada ɓai ku ngékoit a ne, a aj. 10Kɨtɔ ĩla Jada kamj jeje a ne, Luwah a ɔrr ta dɔjt, lon kɨ tɔ tajt kɨ tɨga wakɨsɨ j'an Jeju i Bɨraɓe a ne, Luwah a aj'j. 11Kɨtɔ ndangɨn kam maktubt lo Luwah anan: Deg tube'n adɨna kamd ye, rod a sɔld al. 12Kɨtɔ dang dang goto mbɨna juipgt kɨ Grekg, ĩn tube Bɨraɓed i kɨda, ĩn ad maj urr deg tube'n ndɨ koon kɨ dɔat. 13Kɨtɔ maktub kɨkunjɗang lo Luwah el an: Dekɨɗen a ko kɨ dɔ Bɨraɓet a ne, a aj. 14Na titbãi a kon kɨ dɔ ĩtɨn adɨna kamd al a? Titbãi a adɨna kamd ĩla oon ta loa al a? Ĩla de mad lad mber ta loa al a ne, titbãi a oon dɔ a? 15Titbãi a lan mberta loa ĩla lan ngélambera al a? Kɨgo tat'n ndangɨn kam Maktubt lo Luwah an: Oon deg ndɨ ɗan ronel kɨdum dɔ ngéɗe kɔrrd hoitat kɨmaj. 16Na deg tube hã telɨn rod go hoitat kɨmaj al. Ngekelta kɨ ta Luwaht Ejai el an: Nõ taa ta'n kɨ la mbera nõ a? 17Titbe la kadkam ndɨ ɗe kokɨro koo dɔ hoitat kɨmaj'n i mber ta lo Krist. 18Lon i titbe ye, m'ndɨjesɨ ta 'nten: Juipg ye oon dɔ Hoita kɨmaj ale? Ãã oon dɔ ɓet. Tit'n ndangɨn ne kam maktubt lo Luwah anan: Ndi ta lod tee aw go dɔningt kɨtaagbe ad deg oon dɔ. Tag lod aw mbã tee dɔngoi dɔningt. 19Ye m'ndɨje ta mad kɨɗang ɓaitɔ. Juipg gerɨn girr hoita kɨmaj ale? Ãã gerɨn ɓet. Dasabang Moij el an: M'am sɔkɨsɨ kad i jangɨn kɨ deg'n ĩn girrdeg kɨ je al takumsɨt. M'am sɔkɨ wong losɨ kɨ dɔ girrdegt'n oond kad goosɨ lod goto. 20Ngekelta kɨ ta Luwaht Ejai ire kamɨn ndang, na elta kɨ tɨga wakɨsɨ an: Deg'n sahmɨn al ye, m'ad'd ngahmɨn, deg'n ndɨjen kɨ n'oomɨn al ye, m'tee kɨ rom hɔi kɨ rodt.
21Na kɨ ɔj dɔ girrdeg kɨ Israelt taa ne, ngekelta kɨ ta Luwaht Ejai el an: M'la jim kɨ dɔdt kɨ ndɔg tube m'kunɨn girrdeg kɨ ngételrod go tat al kɨ ngédɔngang.
Currently Selected:
Romag 10: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
