Dakɔr deg 20
20
Man tee kam mbalt
1Kam naht kɨdasa, ɓut ngékawna lo ngan Israel tube teen dɨlalot kɨ Sin, na deg duban ɓebot kɨ Kades. Lot'n non la Mari oit ad duwɨna ye. 2Na man goto lot'n non kɨta ngékawna, ad deg ɓai ndoorɨn Moij kɨ Aarõ. 3Deg'n non gakɨn Moij anan: Sumba kad j'oi tit'n ngankõjg oin ne nõ Bɨraɓet. 4Kɨtɔɗi i ɗen ne kɨ ngékawna lo Bɨraɓe kam dɨlalot'n ɗan kɨtakad j'oi, jĩ kɨ nyakulg loj a? 5Kɨtɔɗi i teen ne sej kɔ kam Ejipt't kad i ɗen sej kam lot kɨmajal 'nten a? I lo kɨ de asɨ dub nyat al, ke kag mbaiɓood, ke dĩndu, ke kag grenadie a ke mankãi, kaa gotot. 6Moij kɨ Aarõ teen ro ngékawnat kɨtɨga, awɨn tabit kujkub ndɔdnat, son ber kɨ takumd na kunj Bɨraɓe kɨɗangeɗeng tee kɨ rodt hɔi. 7Bɨraɓe el Moij an: 8Un kagtɔsɨ na ĩ kɨ ngonkõi Aarõ, i kawɨn ngékawna kɨnat, elɨn ta kɨ mbal takumdt na a ad man lon. A adɨn man tee kam mbalt'n ɗan kɨtad kad ngékawna ãin nat kɨ nyakulg lod. 9Moij un kagtɔsɨ kɨ to nõ Bɨraɓe tit'n Bɨraɓet ndaan mber. 10Moij kɨ Aarõ kunɨn ngékawna kɨnõ mbalt'n non na Moij eld an: Oon dɔ, ĩn ngétõɗɔɔ. Kokam mbalt'n ɗan la j'a jad man teet adsɨ e? 11Kamla Moij un jin kɨ dõ kɨ kagtɔsɨ lon, nda'n mbal nja joo. Man teet ngãibe ad ngékawna ãin, nat kɨ nyakulg lod. 12Goot gog Bɨraɓe elta Moij kɨ Aarõ an: Tit'n hã i admɨn ne kamsɨ al, i ɔsɨn gonɨm takum Israelagt al ye, a andɨn kɨ ngékawna kam dɔningt'n m'ad'd nõ al. 13'Nten la i man kɨ Meriba, lot'n Israelag majɨn ta Bɨraɓet, na ad tɔ'n to kɨkunjɗang takumdt.
Edom ɔg Israel tɔi dɔningt lon
14Moij ndɨ Kades na la ngombangkɨlag ro ngart kɨ Edom an: Titbe kel ngonkõi Israel. I ger daiyog tube'n teen dɔjt. 15Bɔwjg awɨn Ejipt't, kɨ ndɨt nu kaglo ngãibe na Ejiptiag ɗajɨn majal, jĩ kɨ bɔwjg. 16Jĩ kɨ ko kɨdɔ Bɨraɓet, na oo dɔ ndije, la malaika mad ad tee sej kɨtɨga Ejipt't. Oo, tajigla jĩ kam ɓebot kɨ tɔa i Kades in i kad ɗobnin dɔningt loi. 17I nyàj ad kɨ tɔi dɔning loi kɨ njaj dõ j'a kɨ gang kam ndɔɔt al, ke ndɔɔ nduu, j'a j'ãi man bulo loi al. J'a j'un go ɗob lo ngar koon kanj kad kɨ tɔ kokõ, ke gel mbã kad kɨ ndah dɔning loi kɨ gang. 18Na Edom tur an: A i tɔi ɓe lom al bat. Titbe al a ne, m'a m'tee m'ndɔd kɨ nyakat. 19Israelag elɨna anan: J'a j'un go ɗob kɨbo koon na ĩla j'ãi man loi a ne, mĩ kɨ ɓut nyakulg lom, m'a m'bai kɨ nar. I nya ɗob adɨm m'tɔit kɨ njam dõ. Nya kɨɗang goto. 20Edom tur an: A i tɔi al. Edom tee kɨta ndɔda kɨ deg ngãibe kɨ nyakat jidt. 21Titbe la Edom mbet nya ɗob kad Israel tɔi dɔningt lon, na Israel tel un ɗob kɨɗang. 22Ngékawna lo Israel tube ɓain Kades awɨn dɔ mbalbot kɨ tɔa i Hor.
Koi Aarõ
23Bɨraɓe elta Moij kɨ Aarõ dɔ mbalbot kɨ Horr kad ɗobnin dɔning Edomt an: 24Aarõ a aw ro degt lon, a and kam dɔningt'n mad Israel al kɨta i taan ɗɔɔ ta lom ta mant kɨ Meriba. 25Un Aarõ kɨ ngona Eleajar ad alɨn dɔ mbalbot kɨ Hor. 26I tɔrr kub kɨ ro Aarõt i la ro ngona Eleajart. Nu la Aarõ a oit, a aw ro degt lon. 27Moij ɗa nya'n Bɨraɓe ndaa mbera. Alɨn dɔ mbalbot kɨ Hor takum ngékawnat tube. 28Moij tɔrr kub lo Aarõ la ro ngona Eleajart. Aarõ oi nu tasom mbalbot kamla Moij kɨ Eleajar ɗisɨn dɔ mbalbot. 29Lon ngékawna tube oon ad Aarõ oi ye, ngékɨɓe lo Israel tube nõn Aarõ ndɔ dɔmɨta.
Currently Selected:
Dakɔr deg 20: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
