Dakɔr deg 21
21
Israel tetɗɔɔ Arad
1Ngar Arad de kɨ Kanat oo hoi Israelg ndɨ ɗen kɨ ɗob kɨ Atarim, lad ɗɔɔ, na hɔ kɨmadg kudt dangai. 2Kamla Israel un kɔn ad Bɨraɓe kɨ yokɨnda an: Ĩla i la deg'n ɗan jimt a ne, m'a m'nuj ɓebog lod kɔ. 3Bɨraɓe oo dɔ ndɨ Israel ad la Kananiag jiat. Tujɨnd kɔ kɨ ɓebog lod be na kunɨn tɔ lon non Horma.
Moij ɗa li kɨ ningakasɨ
4Ɓain mbalbot kɨ Hor kɨ ɗob kɨ bahbot kɨkɨre kad ngongɨn dɔning Edom. Ro deg oi yelel dɔ ɗobt 5ad deg elɨn ta ndoorɨn ne Luwah kɨ Moij anan: Kɨtɔɗi i teen ne sej kɔ kam Ejipt't kad j'oi kam dɨlalot 'nten a? Lon nyasa gotot, man kãi gotot na nyasa kɨmajal 'nten tã. 6Kamla Bɨraɓe la lig kɨ wongd i ngãi dandt, ad dõn deg, ad koosɨdeg ku Israelagt oin. 7Deg awɨn ro Moijt anan: Jĩ kɨ ɗa majal kɨta j'elta kɨ ndoorɨn Bɨraɓe kɨ ĩ. I kɔ Bɨraɓe ad ɔrr lig kɔ rojt, na Moij kɔ kɨta deg. 8Bɨraɓe el Moij an: I ɗa li kɨ ndulo ngẽingẽi, i la dõ dɔ sorkagt, na de'n li dõa, na un kumɨn kɨ dõ ooan a ne, a aj. 9Moij ɗa li ningakasɨ, la dõ dɔ sorkagt, na dekɨɗen'n li dõa, na un kumɨn kɨ dõ oon li ningakasɨ aj a ne oi al. 10Israelag ɓain, aw hɔn londɨ Obot. 11Ɓain Obot, aw hɔn londɨ Iye-Abarim kam dɨlalot kɨ sumba lo kɨ Moab sew ko loɓakàd. 12Ɓain lot'n non aw hɔn londɨ kam hollot kɨ Yered. 13Ɓain ko nu aw hɔn londɨ gid bah Arnõt, dɔningt lo Amoriag. Bah'n nũ kɨ kam dɨlalot kɨta bah Arnõ i ɗob nin dɔning Moab kɨ Amoriag. 14Kɨtɔ 'nten la elɨn kam Maktub ɗɔɔgt lo Bɨraɓe anan: Ɓebo Baheb kam dɔning Supat. Kɨ hollog lo bah Arnõ, 15Ɗob nũ mang kɨkad mbalbogt Awɨn mbã ɓebo Ar Mbã ɔd ɗobnin dɔning Moab. 16Ɓain nõbe awɨn ta bulomant. Ta bulomant'n non Bɨraɓe elta kɨ Moij an: I kaw deg kɨnat, na m'a m'ad'd man. 17Kamla Israel ɔsɨ pa 'nten anan: Buloman, i ɓa man. Ɔsɨn pa kɨdɔat. 18Buloman kɨ mbaiɓeg urɨn, kɨbog lo deg urɨn kɨ kagkõɓe kɨ gɔlkɔpg lod. Ɓain kam dɨlalot awɨn Matana, 19ɓain Matana awɨn Nahaliel, ɓain Nahaliel awɨn Bamot 20ɓain Bamot awɨn hollot kɨ kam dɔning Moabt kɨ tasom mbalbo Pisga kɨ sumba dɔ kor.
Israel tetɗɔɔ Sihõ
21Kamla Israel la ngombangkɨlag ro Sihõ ngar lo Amoriag ela an: 22I nyam adɨm m'tɔi dɔning loi kɨ njam dõ, j'a j'and kam ndɔɔt al, ke ndɔɔ nduut, j'a j'ãi man bulo loi al, j'a j'un go ɗob lo ngar koon mbã kad kɨ ndah dɔning loi kɨ gang. 23Na Sihõ nya ad Israel ndah dɔning loa gang al. Sihõ kaw deg lon tube kɨnat, tee aw kɨ n'ndɔd Israel kam dɨlalot, ɗe mbã Jahas na ɗɔɔ kɨ Israel. 24Na Israel tɔla kɨ nyakat, taa dɔning loa ko bah Arnõ mbã bah Jabok, mbã dɔning lo Amoniag kɨta ɗobnin lo Amoniag ndahn ndogbɔrr kɨngang ngãi gugɨn ne dɔ. 25Israel taa ɓebog 'nten tube na ndɨ kam ɓebogt lo Amoriag tube kɨ ɓebo Hesbon kɨ ngan ɓeg loa tube. 26Kɨtɔ Hesbon i ɓebo lo Sihõ ngar lo Amoriag'n ɗɔɔ kɨ ngar kɨ Moabt kɨkete na ta dɔning loa mbã bah Arnõ. 27Kɨtɔ 'nten la ngéndang pag ndangɨn ne anan: Awɨn Hesbon. Ad ɗan ɓebo lo Sibon gog kad ngang. 28Kɨtɔ horr tee ko Hesbon, ndõ horr tee ko kam ɓebot lo Sihõ, Oon ɓebo Ar kam dɔning Moab, Mbaiɓeg'n ndɨn logt kɨ dõ lo bah Arnõ. 29Beto loi, Moab, ĩn deg kɨ Kemos ĩ kɨ koi, i nujɨn kɔ. Ɗà ad nganɨn kɨdɨngã ãin na, Nganɨn kɨdẽ ɗan ɓer lo Sihõ ngar lo Amoriag. 30J'urd kɨ kɨrãg loj Kɨ nujd kɔ tube kɔ Hesbon mbã Dibon, Kɨ tujd kɔ, na horr õ mbã Medeba.
Israel tetɗɔɔ Og
31Israelag hɔn londɨ kam dɔningt lo Amoriag. 32Moij la ngendalog kad oon Jaejer. Tan ngan ɓeg loa, na tuɓan Amoriag ngendɨt. 33Kamla tel unɨn ɗob kaw Basan. Og, ngar kɨ Basan tee kɨta ndɔd'd nat kɨ deg lon tube kɨta ɗɔɔ sed Edrei. 34Bɨraɓe el Moij an: Ot ɓoola kɨta m'laa jiit nat kɨ deg loa tube kɨ dɔning loa. A i ɗa sia tit'n i ɗan kɨ Sihõ ngar lo Amoriag'n ndɨ Hesbon. 35Tɔlɨna kɨ ngana kɨ deg loa tube kanj nya de mad kɨ dɔ dõ na taan dɔning loa.
Currently Selected:
Dakɔr deg 21: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
