Dakɔr deg 15
15
Kadkarig kɨta Bɨraɓe
1Bɨraɓe el Moij an: 2Elta kɨ Israelag an: Lon a andɨn kam dɔningt'n m'adsɨ kad i ndɨnt, 3nu la a adɨn Bɨraɓe kadkari mad tit ye, ad i kadkari kɨlahorrt, ke kadkari kɨta tɔlkon kunkɔ, ke kadkari kamndig, ke kɨta ndɔ ɗanahg losɨ, dã kɨbo ke kɨdu losɨ, kɨta tee kɨ sé kɨkootmbĩ ad Bɨraɓe. 4De'n a la kadkari lon ad Bɨraɓe a ne, a ad kadkari nduj kɨ toletlet gaj kɨlo kɨɗa ku kɨkɨlaht kɨ lɔi kɨ yib litɨr kɨɗa kɨ nusɨ. 5Kɨ mad tɔ i kadkari nyakãi man nduu litɨr kɨɗa kɨ nusɨn ɓet a ɓon nat kɨ kõ bat kɨɗen kadkarit kɨlahorr ke kadkari mad. 6Ĩla kadkari'n non i bal bat a ne, a ad kadkari nduj kɨtoletlet gaj epa joo ku kɨkɨlaht kɨ lɔi kɨ yib litɨr joo 7na kadkari man nduu litɨr joo kɨta kadkari nyakãi tit sé kɨkootmbĩ kɨta Bɨraɓe. 8Lon ad bɔw mang kadkarit kɨlahorr, ke kadkari kɨta tɔlkon kunkɔ, ke kadkari kɨ kad kamsɔllom kɨta Bɨraɓe, 9a i la kadkari bɔw mang nat kɨ nduj kɨtoletlet gaj mɨta ku kɨkɨlaht kɨ lɔi kɨ yib litɨr mɨta, 10na a i la kadkari man nduu litɨr mɨta kadkari nyakãi. I kadkari kɨlahorrt, i sé kɨkootmbĩ kɨta Bɨraɓe, 11A ɗan titbe kɨta bɔw mang kɨɗen kɨ bal bat kɨɗen kɨ kɨta kõ bat kɨɗen kɨ ngon bĩã kɨɗen, 12A ɗan titbe kɨgo kɔr kadkarigt, kɨta kadkari kɨɗen kɨgo kɔrdt, 13Israel kɨɗen kɨ kooj ɓe, a ɗa titbe lon ndɨ la kadkari horro i sé kɨkootmbĩ kɨta Bɨraɓe.
Mbahg a adɨn kadkarig titbe tɔ
14Ĩla mbah mad hɔlondɨ kusɨt, ke ku ngakasɨgt kɨ nõsɨt, na ndig la kadkari horro set kɨkootmbĩ kɨta Bɨraɓe a ne, a ɗa tit'n i ɗan ne ye be ho, 15Mberkɨnda i kɨɗabe kɨta ngékawna tube, kɨtɔsɨ na kɨta mbah kɨ ngehɔlondɨ kusɨt. A i mberkɨnda kɨ tokɨnõt kɨtɔ ngakasɨg, a i titbe kɨta mbah tit'n ton kɨtatɔsɨ, na Bɨraɓet, 16mberkɨnda i kɨɗabe, takɨgang i kɨɗabe kɨtɔisɨ kɨ kɨtɔ mbah kɨ ngehɔlondɨ kusɨt.
Kadkarig bɨnag kɨdasa
17Bɨraɓe elta kɨ Moij an: 18Elta Israelag an: Lon i teen kam dɔningt'n m'ndɨ m'ɔrrsɨ ta ɗob kɨ tit, 19na lon i san nya kɨ dɔningt'n non a ne, a i lan kadkari kɨkun kɨ dõ adɨn Bɨraɓe. 20Kam dɔkasɨ ndujt losɨ a i ɗan oina kɨta kadkari kɨkun kɨdã kɨgo ɗob kadkari kɨkun kɨ dõ dɔ gar ndah nyakot. 21Dɔkasɨ nduj losɨ a adɨn kadkarit kɨkun kɨ dõ kɨta Bɨraɓe kɨ ngakat kɨ ngaka. 22Ĩla i ɗan majal kɨ kamndig al, ad i ngomɨn go tag tube'n Bɨraɓe el Moij al, 23nyag tube'n Bɨraɓe ndasɨ mbera kɨtakul Moij, la girra dɔ ndɔt'n Bɨraɓe nda mbera mbã kaglo'n a ɗe. 24Ĩla ɗan majal kɨ kamndig al kanj kad ngékawna tube gerɨn a ne, ngékawna tube a adɨn bɔw mang kadkari kɨlahorrt, sé kɨkootmbĩ kɨta Bɨraɓe nat kɨ kadkari nduj kɨ kadkari nyakãi kɨgo takɨgangt, a adɨn bal bĩã kɨɗa dɔt ɓaitɔ kɨtɔ majal kɨ ɗa. 25Ngejanyamosɨ a la kadkari kutdɔ majal lo ngékawna lo Israel tube kad nyan go majal kɨɗa lod kɔ kɨtɔ majal kɨ ɗan kɨ kamndig al. A ɗen kɨ kadkari lod, kadkari kɨlahorrt kɨta Bɨraɓe, na i kadkari kutdɔ majal nõ Bɨraɓet kɨtɔ majal kɨ ɗan kɨ kamndig al. 26A nyàgo majal kɨ ɗa lo ngékawna lo Israel tube kɨ mbahg kɨ ngéhɔlondɨ kudt, kɨta deg tube ɗan majal kanj kamndig. 27Ĩla i de kɨɗabe la ɗa majal kɨ kamndig al a ne, a la ngon bĩã kɨ ɓal kɨɗa kadkarit kɨtɔ majal kɨ ɗa'n non. 28Ngejanyamosɨ a la kadkari kutdɔ kɨta de'n ɗa majal kɨ kamndig al nõ Bɨraɓet. Lon la kadkari kutdɔ a ne, a nyàgo majal kɨ ɗa loa kɔ. 29Mberkɨnda 'nten i kɨɗabe dɔ det kɨ ngeɗamajal kɨ kamndig al, ke Israela kɨ kooj ɓe, ke mbah kɨ ngehɔlondɨ kudt.
30Ĩla de mad, ke Israela kɨ kooj ɓe, ke mbah ɗa majal kɨ kamndig a ne, tɔi dɔ Ta lo Bɨraɓe, na a tɔlɨna kɔ ku degt loa. 31Kid Ta lo Bɨraɓe na tɔi dɔ mberkɨnda loa, kɨta 'nten a tɔlɨn de'n non kɔ, na ɗagootal loa taa, i dɔat.
Israelag a ngomɨn ndɔ taakò
32Lon Israelag ĩn kam dɨlalot ɓaitɔ ngahn de mad ɗa ɔi kir ndɔ taakò. 33Deg'n ngahna lo kɔi kirt ɗen sia ro Moijt kɨ Aarõ kɨ kɨnõ ngékawnat tube. 34Lana dangait kɨta elɨn ta nya kɨ kad ɗan sia tɨga wakɨsɨ al. 35Bɨraɓe el Moij an: De'n non, a tɔlɨna kɔ, ngékawna tube a tɨlana kɨ mbal gid londɨt. 36Ngékawna tube teen sia gid londɨt, tɨlana kɨ mbal ad oi tit'n Bɨraɓe ndan mbera Moij.
Kɨrra ta kubgt, nyagakamdɔt
37Bɨraɓe el Moij an: 38Elta kɨ Israelag kad lan kɨrra ta kubgt lod, na dɔn kɨla kub kɨkil musɨmusɨ tit. A ɗan titbe kɨ ngakat kɨ ngaka. 39Lon i lan kuro ta kubgt losɨ a oona ad kamsɨ gan dɔ mberkɨnda tube lo Bɨraɓe Luwah kad i hɔn ɗagoot na kad nyurkõ. Kɨ ngarkamt kɨ nyurkõ, kɨ kumt ɔrrsɨn ad i ɗan yog al. 40Titbe a i gan ne kamsɨ do mberkɨndagt lom kad i hɔn ɗagoot na a ĩn kɨjaɓat kɨta Luwah losɨ. 41Mĩ Bɨraɓe losɨ'n tee sesɨ kam dɔning Ejipt't kɨtɨga kad mĩ Luwah losɨ. Mĩ Bɨraɓe Luwah losɨ.
Currently Selected:
Dakɔr deg 15: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
