Dakɔr deg 14
14
Israelag mbetɨn kand Kana
1Ngékawna tube unɨn ndid kɨ dõ kon ne, na deg nõn na mbã lotid. 2Israelag tube nyurɨn ta dɔ Moijt kɨ Aarõ, na ngékawna tube elɨnd anan: Ni kad j'oi kam dɔning Ejipt't a ke kad j'oi kam dɨlalot'n ɗan. 3Kɨtɔɗi Bɨraɓe ndɨ aw sej kam dɔningt'n ɗan kad kɨ son ta nyakat't ad nẽjg kɨ nganjg telɨn nyatetɗɔɔ a? Soot kad kɨ telɨn kɨ Ejipt't gog ale? 4Na elɨn na ta kudt anan: Ad kɨ ndan kɨbo mad dɔjt kad kɨ telɨn Ejipt't gog. 5Moij kɨ Aarõ son ber kɨ takumd kɨnõ koosɨgt ngékawna tube lo Israel. 6Jojue ngon Nun kɨ Kaleb ngon Jepune'n ĩn ku ngéndalogt'n ndan m'ãi dɔning'n non tilɨn kubg lod, 7elɨn ngékawna lo Israel tube anan: Dɔning'n kɨ nda m'ãia i dɔning kɨmaj ngãi kɨtɔi. 8Ĩla ro Bɨraɓe nela sej a ne, a aw sej kam dɔningt'n non, i dɔning'n mbà kɨ tej nunt. 9Nya kɨɗabe, ot kad i taanɗɔɔ Bɨraɓe, ot ɓoolɨn deg kɨ dɔningt'n non kɨta a ĩn nyasaj. Nya kɨ ngengomd goto, i tit ndil kɨ tɔi kɔ be, na Bɨraɓe i nat sej, ot ɓoolɨnd.
10Ngékawna tube ɔjɨn na kad kɨ n'tɨland kɨ mbal na kunj Bɨraɓe kɨɗangeɗeng tee kɨdɔ kujkub ndɔdnat kɨ Luwah nõ Israelagt tube. Bɨraɓe ɓawong kɨ Israel 11Bɨraɓe el Moij an: Mbã ndɔ bãi deg'n ɗan a nyan ta kidɨm a? Mbã ndɔ kɨ ɗi a admɨn kamd al dɔ nyakɔjgt tube kɨ m'ɗa kudt a? 12M'a m'ndad kɨ yokoosɨ, m'a m'nujd, na m'a m'teli girrdeg kɨbo kɨ kɨtag tɔid. 13Na Moij el Bɨraɓe an: I ɗa titbe a ne, Ejiptiag a oon hoia, kɨta i kɨtakul tɔgi la i teen kɨ deg'n ɗan kudt, 14na a elɨn ngendɨ dɔningt'n ɗan, gerɨn ta kad ĩ Bɨraɓe'n dan degt'n ɗan ĩgɨn i ad'd ooin kum kɨ kum Bɨraɓe, ad kilndiit loi ɗa dɔdt dõ, na i ndia nõdt kada kam pilie kilndiit kɨ kondɔ kam pilie horrt. 15Ĩla i tɔl deg'n ɗan tit kɨ de kɨ kɨɗabe a ne, girrdeg'n oon tɔko loi ye a elɨn anan: 16Bɨraɓe aw kɨ tɔg kad and kɨ deg'n ɗan kam dɔningt'n unɨn kɔn kɨ n'ad'd al, I kɨta 'nten la tɔldɨn kɔ kam dɨlalot, 17Tajigla m'ndɨ m'kɔi kɨ ad tɔg Bɨraɓe i kɨbobe tit'n i elɨn an: 18Bɨraɓe i ngendɨ badɔ wongt, kamkẽ loa i ngãibe, ndɨ nyàgo nyaɗa kɨgoot al kɨ tɔidɔta kɔ, A ɔrr ta dɔ det kɨ ta hɔa al bat, na ad kɔjkum kɨta nyaɗa kɨgoot al lo bɔwg so dɔ ngangt mbã kɨdɔ ngakat kɨkõmɨta kɨ kɨkõsɔɔ. 19M'ndɨ m'kɔi nyàgo ɗagootal lo deg'n ɗan kɔ kɨgo kamkẽt loi kɨbobe tit'n i nyàgo majal lod Ejipt't nu mbã tajigla.
Nyagokɔ kɨ takɨgang
20Bɨraɓe tur an: M'nyago majal lod kɔ kɨgo kɔt loi, 21Rota, dɔ ndimt kɨ dɔ dõ, tit'n dɔning kɨtaagbe a ɗoosɨn kɨ kunj Bɨraɓe kɨɗangeɗeng 22deg tube kɨ oon kunjɨm kɨɗangeɗeng kɨ nyakɔjg'n m'ɗad kam Ejipt't kɨ kɨ kam dɨlalot, deg'n namɨn asɨ nja kɨlah, na oon dɔ ta lom al, 23ĩgɨn non tube a oon dɔning'n m'unɨn kɔm kɨ yokɨnda mad bɔwdg al, tube'n kidmɨn a oon al bat. 24Na ɓer lom Kaleb aw kɨ ndil mad kɨɗang kamɨnt, tel ron go tat lom kɨ kam kɨro ye, m'a m'ada and kam dɔning'n awt kete nõ kad ngankaa taan dɔning'n non nyakagɓet. 25Amalekag kɨ Kananiag ndɨn kam hollogt, Loti i telɨn gog, awɨn kam dɨlalot kɨ ɗob kɨ kaw bahbot kɨkɨre. 26Bɨraɓe elta kɨ Moij kɨ Aarõ an:
27Mbã ndɔ bãi m'a m'ndɨ dɔt kɨ ngékawna kɨmajal'n nyurɨn ta dɔmt a? M'oo dɔ nyur ngutngut lo Israelag'n nyurɨn kɨdɔmt, 28Eld an: Rota, ndɔ ndimt kɨ dɔ dõ, kel Bɨraɓe, m'a m'ɗa sesɨ tit kɨ i elɨn ne ta mbimt. 29Ninsɨ a tuso kam dɨlalot'n ɗan, ĩn tube'n dan kɔrrsɨ lon tɨdasɨn, na lan girra dɔ degt kɨ ɓal dɔjoo kɨ kɨtɔi, ĩgɨn nyurɨn ta dɔmt, 30A andɨn kam dɔning'n m'unɨn kɔm kɨ yokɨnda kad i ndɨnt nõ al bat, na Kaleb ngon Jepune kɨ Jojue ngon Nun koon, 31Na ngansɨg'n elɨn anan: a ĩn nyatetɗɔɔ la, m'a m'ad'd andɨn kad gerɨn dɔning'n i mbetɨna. 32Na ĩn taa, ninsɨ a tuso kam dɨlalot'n ɗan 33na ngansɨg a ĩn ngékulnya ɓal dɔsɔɔ kam dɨlalot, ɗagootal losɨ taa a i dɔdt mbã kad ninsɨ tube tuj kam dɨlalot. 34Tit'n i ndan ne m'ãi dɔning ndɔ dɔsɔɔ ye, titbe tɔ a i ton ɗagootal losɨ ɓal dɔsɔɔ ho. Ɓal kɨɗa kɨta ndɔ kɨɗa, kamla a i gerɨn kad m'nyasɨ kɔ. 35Mĩ Bɨraɓe m'elta, titbe la m'a m'ɗan kɨ ngékawna kɨmajal'n ɗan ĩgɨn kawɨn na ndoormɨm. A nujɨn kɔ kam dɨlalot, nu la a oint ye, 36Deg'n Moij lad kad ndan m'ãi dɔning ye, go teldt adɨn ngékawna tube nyurɨn kɨdɔat lon elɨn ne ta kɨ majal dɔ dɔningt. 37Deg'n elɨn ta kɨmajal dɔ dɔningt nõ oin koi yokoosɨ nõ Bɨraɓet. 38Jojue ngon Nun kɨ Kaleb ngon Jepune koon la nãin kɨdɔd dõ, ku degt'n awɨn kɨta nda m'ãi dɔning ye.
Tetɨn ɗɔɔ Israel ɓet kɨ Horma
39Moij el Israelag ta nyag 'nten ad deg ndɨngan rod ngãi, be, 40Bãi dõ kɨsĩ ritit, alɨn tasom mbalbot, anan: Oojɨn nẽbe, j'a j'aw kam lot'n Bɨraɓe eltaa, kɨta jĩ, kɨ ɗa majal. 41Na Moij el an: Kɨtɔɗi i tɔin ne dɔ ta lo Bɨraɓe a? Kɔjta losɨ, maj a urra al. 42Ot kawɨn, na ɓeta i son ji madngétasɨgt kɨta Bɨraɓe i kusɨt al. 43Amalekag kɨ Kananiag ĩn nõsɨt nõ, na a i son ta nyakat't kɨta i nyan Bɨraɓe kɔ ad Bɨraɓe i nat sesɨ al.
44Ɗan dɔngang, alɨn tasom mbalbot, na ke sund kunkɔ lo Bɨraɓe, ke Moij ɓai londɨt al. 45Kamla Amalekag kɨ Kananiag, ngendɨ mbalbot'n non, ɗisɨn, ɗɔɔnd, na tuɓand mbã Horma.
Currently Selected:
Dakɔr deg 14: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
