Dakɔr deg 11
11
Bɨraɓe ad Israelag maan
1Deg nyurɨn ta kɨ mbi Bɨraɓet, na lon Bɨraɓe oo dɔ ye, ɓawong sed, na horr lo Bɨraɓe õ kudt ad tuj nusɨ ta lon hɔlondɨnt 2Kamla deg kon kɨdɔ Moijt, na Moij kɔ Bɨraɓe ad horr oi. 3Ndan tɔ lon non Tabeera kɨta horr lo Bɨraɓe õn kudt.
4Ndɔ madt deg kɨpapag'n dan ngan Israelagt ye, nyur õd kad san dã, ad ngan Israelg kɨ dɔd kaa ne mban girr nõ tɔ, anan: Nõ a adj dã kad kɨ sa a? 5Kamj gah dɔ kanjgt'n kɨ san kam Ejipt't kari kɨnõbe kɨ kosɨ, kɨ wasɨ, kɨ ruwag kɨbo kɨ basal kɨbo kɨ basal kɨdu. 6Tajigla roj lo haw, kumj oo nya mad al, na maan 'nten kɨɗabe koon. 7Maan taana kɨ kum kor na kooa i tit lab kɨ tee kag ɓitat be tit nõkag bdelion be. 8Deg tĩn na awɨn kɨta kɔi maan, usɨna kɨ mbal kusɨ nya ke urɨna kam bĩt, ndirrɨn kam jot na ɗana tit oina. Nel tit kɨ oina kɨ ɗa kɨ yib be. 9Lon tàl hɔ dɔ londɨt kondɔ ye, maan tuso tɔ ho.
Bɨraɓe ad Moij ngeɗasia
10Moij oo dɔ nõ lo deg, girrnooj kɨɗen ndɨ nõ kɨ tabit kujkubt lon, na Bɨraɓe ɓa sed wong kɨtɨngabil. 11Kam Moij tuj ad el Bɨraɓe an: Kɨtɔɗi i ɗa nya kɨngang titbe kɨ ɓer loi a? Kɨtɔɗi m'ngaa maj takumit al, na i nda kɔi dɔmt kad m'ɔrr nõ deg'n tube'n ɗan a? 12Mĩ la m'nden deg tube'n ɗan yo? Ke i mĩ tɔ la m'oojd kad i elɨm an: I tod kadit tit'n bɔw ngon a ton ngon kɨ ta mbat mbã kɨ dɔningt'n i un kɔi kɨ ad bɔwdg e? 13Ko ɗah m'a m'ngaa dãt kɨ mad deg'n ɗan tube ɗan ɗan a? Kɨtɔ ndɨ nõn kɨdɔmt anan: Adj dã kad kɨ sa. 14Mĩ kɨ kɨɗambe m'asɨ to deg'n ɗan tube al kɨta ɔin ngãi tɔi tɔgɨm. 15Lon i ɗa sem titbe ye, i soot kad i tɔlɨm kɔ. Ĩla m'ngaa maj takumit a ne, ot kad m'oo kamkɔl 'nten. 16Bɨraɓe el Moij an: I kaw kɨbog lo Israel dɔtanãimɨta kɨnomt ku degt. Deg kɨ i gerd ĩn kɨbog kɨ mbaiɓeg lo deg. I ɗe sed ad ɗan nat sei tabit kujkub ndɔdnat. 17Nu la m'a m'ɗisɨt, m'a m'eli ta. M'a m'un Ndil mad i dɔit nõ, na m'a m'kegd dɔdt kɨtakad unɨn kɔi deg nat sei kad i to kɨ kɨɗaibe al. 18A i el deg an: I Arɨn rosɨ kɨta loti, a i san dã kɨta i nõn kɨ mbi Bɨraɓet anan: Nõ a adj dã kad kɨ san a? Kɨtɔ kɨ ndɨ kɨ maja kam Ejipt't. Bɨraɓe a adsɨ dã kad i san. 19A i san ndɔ kɨɗabe al, ke ndɔ joo, ke ndɔ mi, ke ndɔ kɨlah, a ke ndɔ dɔjoo, 20na a i san asɨ nah kɨɗa kɨtaagbe mbã kad tee konsɨt mbã, ndasɨ ɓɔ kɨta i mbetɨn Bɨraɓe'n ndɨ kusɨt, na i nõn kɨnõat anan: Kɨtɔɗi kɨ teen kam Ejipt't kɨtɨga a?
21Na Moij el an: Deg'n mĩ kudt, ngenda kɨ nja, kɔrd i 600 000 na i el an: M'a m'ad'd dã kad san nah kɨɗa kɨtaagbe. 22A jan kɔ batg kɨ mangg kad asɨd e? Ĩla kawɨn kanjg kɨ bahbot tube kɨnat kaa ne, a asɨd e? 23Bɨraɓe tur Moij an: Ji Bɨraɓe goj a? A i oo tajigla, ta'n m'el nõ, a ɗa nya ke a ɗa nya al a?
24Moij tee el deg tag lo Bɨraɓe kamla kaw kɨbog lo deg asɨn dɔ tanãimɨta na ndad gug dɔ kujkub. 25Bɨraɓe ɗisɨ kam kilndiit, elta kɨ Moij, na keg Ndil kɨdɔat ad kɨbog kɨdɔtanãimɨta. Lon Ndil ndɨ dɔdt ye, elɨn ta kɨta Luwaht, na ɗan titbe gog al ta, 26Deg joo nãin kam londɨt, kɨ tɔa i Eldad kɨmad tɔa i Medad, na Ndil ɗe dɔdt tɔ ho kɨta ĩn ku ĩgɨtɨn kɔtd, na awɨn ta kujkubt al, na elɨn ta kɨ ta Luwah kam londɨt. 27Basa mad ãi ngɔd el Moij an: Eldad kɨ Medad ndɨ elɨn ta kɨta Luwaht kam londɨt. 28Kamla Jojue ngon Nun madkɨla lo Moij kɨ Basan nu el an: Ngeem Moij ɔgd dɔ. 29Na Moij tura an: Jang ɗai kɨtɔm a? M'oo maj tɔi kad deg lo Bɨraɓe tube elɨn ta kɨtaat, kad Bɨraɓe ad'd Ndilɨn, 30Kamla Moij kɨ kɨbog oo Israelag telɨn kɨgog kɨ londɨt.
Bɨraɓe ad Israelag kereg
31Bɨraɓe ad nél ɓai ko bahbot ɗe kɨ kereg, tɨnda tĩd kam londɨt kɨ asɨ ndia kɔtko kɨɗa ndɔ kɨɗa kɨ asɨ ndia kɔtko mad ndɔ kɨɗa gug dɔ londɨ. Ɗen nderbe kɨ dɔning asɨ ndia kɨ ndɔ kɨɗa, 32Ndɔt'n non deg tɔlɨnd ndɔ ho kàda ho, kɨ ndɔ kɨkõjoo tɔ. De'n tɔl ngãi al ne ɔi homer mbɔj nya kɨlah. Goot gog najɨn gug dɔ londɨ, 33Lon dã nãin kɨ ngangdt ɓaitɔ ye Bɨraɓe ɓawong kɨtɨngabil kɨ deg na nda deg kɨ yokoosɨ kɨbobe. 34Ndan tɔ lon non Kibrot Hataaba kɨta loat'n non la duwɨn degt'n nyur õd ye.
35Ko Kibrot Hataaba deg awɨn Haserot na hɔn londɨ Haserot.
Currently Selected:
Dakɔr deg 11: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
