Matie 22
22
Terrta dɔ ngart mad'n ɗa mburr taana lo ngonɨn
(Oo Luk 14:16-24)
1Jeju tel ɗa eld ta kɨ terrtag gog tɔ. 2Kõɓe kɨ dɔrãgt tit kɨ ngar mad'n ɗa mburr taana lo ngonɨn. 3La ɓerg lon kad kunɨn deg'n ndeend kɨ lo mburr taanat. Na geen ɗe al. 4La ɓer madg kɨɗang tɔ, kad kunɨnd anan: Oon be. M'ɗa go mburr taana woi; m'ja kɔ bɔw mangg lom kɨ dãg lom kɨ ndambool, nyag i kɨ ɗago woi, i ɗen lo mburr taanat. 5Na oon kɨ tĩdt al, unɨn ɗɔb lod awɨn, kɨkɨɗa aw kam ndɔɔt lon, kɨmad aw lo ɗa gat't lon. 6Kɨmadg hɔn ɓerg ɗan sed nyag kɨ to to, na tɔlɨnd. 7Ngar ɓawong, la ɓut ngéɗɔɔg lon, kad nujɨn ngétɔldeg nõ, na ndan horr ɓebot lod. 8Kamla el ɓerg lon an: Mburr taana i kɨ ɗago woi, na ĩgɨn kunɨnd ye asɨn taa al. 9Awɨn kɨ dɔ tɔɗobg, na deg tube'n i ngahnd i kunɨnd kɨ lo mburr taanat. 10Ɓerg'n non awɨn kɨ dɔ ɗɔbg, na kawɨn deg kɨmaj, kɨ kɨmajal tube'n ngahnd. Kamkuj ɓakot kɨ ngéɗe lo mburr taanat. 11Ngar ud kuju kad n'oo ngéɗe lo mburr taanat, na oo de mad ndɨ nõ, kɨ la kub mburr taana al. 12Ela an: Madɨm titbãi ɓai hã and nẽbe kɨkanj la kub mburr taana a? De'n non ndɨ gon mbo. 13Kamla ngar el ngan ngékɨlag lon an: I dɔɔn nja kɨ jia i lana ne kɨtɨga kam tilt, nu la a nõt ho, a dõ ngangɨnt ho ye. 14Kɨtɔ kɨ kun'g ĩn ngãibe, na kɨ mbedg ĩn tẽbe.
Parisɨg kɨ deg lo Herod ndɨjen ta Jeju dɔ ba lambot
15Kamla Parisɨg aw ɔjɨn na ta kad kɨ'n hɔna kɨ gum ta kɨ taat. 16Lan ngéndoog lod kɨ deg lo Herod ro Jejut kad elɨna anan: Ngendoo deg, kɨ ger kad ĩ de kɨ rota, na i ndɨ i ndoo deg ɗob lo Luwah kɨ rotagt, kɨkanj ɓool kum de mad, kɨta i ndɨ ɔrr de dene al. 17Kɨtɔ 'nten elj ta gaai: I goɗobat a ke i goɗobat al kad gan lambo Sejar?
18Na Jeju ger ndando lod, ad el an: Ngéndokum deg. Kɨtɔɗi i ndɨ i namɨn ne a? 19I damɨn nar'n a i gan ne lambo.
Ɗen kɨ sile adɨna. 20Eld an: Ndil dɔ de, kɨ takɨndang dɔ silet 'nten ye, i lo nõ a?
21Turɨna anan: I lo Sejar.
Kamla Jeju eld an: Nya'n i lo Sejar a ne, sumba kad adɨn Sejar, na nya'n i lo Luwah a ne, adɨn Luwah ho.
22Lon oon dɔ tag 'nten ye, ta yad biw, ad nyana, na awɨn.
Sadukig ndɨjen Jeju ta dɔ ɓai ngékoit
(Oo Mrk 12:1-7; Luk 20:27-40)
23Ndɔt'n non Saduki madg ɗen ro Jejut. Sadukig ndɨ anan ɓai ngékoig goto. Ndɨjena ta anan: 24Ngendoo deg, Moij el an: Ĩla de mad oi kanj ngah ngang a ne, ngonkõa a taa nẽa kad ndan koh ngonkõ. 25Na tag maɗi kam ɓet loj ngankõnag ĩn tanãimɨta; kɨdasa taa dekɨdẽ na oi, na tit ka'n hã ngona goto ye, nya nẽn ad ngonkõ; 26na titbe kɨ ngekõjoo, kɨ ngekõmɨta, mbã kɨ ngekõ tanãimɨta ɗe oi tɔ. 27Gog godt tube dekɨdẽ oi ho. 28Ye, ndɔ ɓai ngékoigt, dekɨdẽ'n non a i nẽ nõ, ku degt kɨtanãimɨta kɨta tube taana nẽdt.
29Jeju turd an: I ndõmɨn, kɨta i gerɨn tag kɨndang lo Luwah al, ke tɔg Luwah al tɔ. 30Ndɔ ɓai ngékoigt ye, dekɨdɨngãg a taan dekɨdẽg al, dekɨdẽg a taan ngawg al ho, na a ĩn tit malaikag kam dɔrãt. 31Na ta ɓai ngékɔig ye, i dan ta'n Luwah elsɨ kam maktubt ye ale? An: 32Mĩ Luwah lo Abraham, Luwah lo Isaak kɨ Luwah lo Jakob. Luwah i Luwah lo ngékoig al, na i Luwah lo ngékumkajɨrg.
33Bakad koosɨg'n oon dɔ nyandoo lo Jeju ye, ta yad.
Mberkɨnda kɨbo tɔi kɨmadg
(Oo Mrk 12:28-34; Luk 10:25-37)
34Lon Parisɨg oon kad Jeju nda ta Sadukig nat ye, kawɨn na kɨnat. 35Na kɨkɨɗa kudt, i ngeger mberkɨndag, ndɨjea ta kɨ'n nán an: 36Ngendoodeg, mberkɨnda kɨ ɗa hã i kɨbo tɔi kam mberkɨndat lo Moij a?
37Jeju tura an: A i tar Bɨraɓe Luwah loi kɨ ngarkami tube, kɨ roi tube, kɨ tagahi tube. 38Ĩla i mberkɨnda kɨdasa ho, i kɨbo tɔi ho ye. 39Kɨkõjoo kɨ tit sia la ten: A i tar madɓei tit roi be. 40Mberkɨnda kɨjoo 'nten la girr mberkɨnda lo Moij kɨ takel ngékelta kɨ ta Luwaht tube ndɨ teen tit ye.
Ta lo Krist kɨ Ngon Dabid
(Oo Mrk 12:35-37; Luk 20:41-44)
41Lon Parisɨg kawɨn na kɨ nat ye, Jeju ndɨjed ta an: 42Tagahsɨ i ɗi dɔ Krist't a? I Ngon nõ a?
Turɨna anan: I Ngon Dabid.
43Jeju eld an: Titbãi hã Ndil ɔsɨ Dabid ad kuna Bɨraɓe? Lon elɨn an:
44Bɨraɓe el Bɨraɓe lom an:
I ndɨ kojikomt,
mbã kad m'la madngétaig girr njait a?
45Ĩla Dabid kuna Bɨraɓe a ne, titbãi i ngona a?
46De mad kɨ asɨ tura ta mad goto. Ndɔat nu nõ de mad kɨ ire kamɨn na ndɨjea ta gog goto.
Currently Selected:
Matie 22: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
