Matie 21

Deg ɗan ronel dɔ Jejut lon andɨn Jerusalemt

(Oo Mrk 11:1-10; Luk 19:28-44; Jã 12:12-19; Eja 12:6)

1Lon ɗen nderbe kɨ Jerusalem, na teen nderbe kad Betpajet, dɔ mbalbo ɓirgt ye, kamla Jeju la ngéndoog joo, 2eld an: Awɨn ɓet'n ɗa nõsɨt non; a i ngahn ngon korro nat kɨ kõa kɨdɔ; i tutɨn na i ɗen sed admɨn. 3Na ĩla de mad elsɨ ta mad a ne, i turɨn anan: Bɨraɓe a geed, na a nyasɨ kanangbe ad awɨn.

4Nya'n non ɗa nya titbe kɨtakad ta kɨ ta ngekelta kɨ ta Luwaht tɔlɨn konɨn:

5Elɨn ngomand kɨ Siõt anan:

Oo, ngar loi ndɨ ɗe roit,

i de kɨ sɔlom, i dɔ korrot,

ndɨ dɔ ngon korrot,

ngon kõkorro kɨ dã to nya.

6Ngéndoog awɨn, a kɨ ɗan tit'n Jeju eldɨn, 7ɗen kɨ kõkorro kɨ ngona; kamla ũn kubg lod dɔdt, na Jeju ndɨdɔt. 8Bakad koosɨdeg najɨn kubg lod dɔ ɗobt; kɨmadg gangɨn dɔ ji kagg un dɔ ɗobt. 9Bakad koosɨg'n awɨn kete nõat kɨ ĩgɨn a ndulon goa ye, a koon anan: Hosana kɨ dɔ Ngon Dabidt. Njangdɔ kɨ dɔ Bɨraɓet'n hã ndɨ ɗe. Hosana kam lot kɨ tɔi tɔi kɨ dɔrãgt.

10Lon Jeju ud Jerusalemt ye, ta ya de kamɓeg tube ad ɓai ɗan kokɨkɨ kɨ ɓool, ɗa anan: I nõ a?

11Na bakad koosɨg turɨn anan: I ngekelta kɨ ta Luwaht, Jeju kɨ Najaret't kam dɔning Galilet.

Jeju tuɓa ngéɗagat kam kuj dub Luwaht

(Oo Mrk 11:15-19; Luk 9:45-48; Jã 2:13-22)

12Jeju ud kam kuj ndub Luwaht, na tuɓa deg tube'n ndɨ ɗawɨn nya kɨ ĩgɨn ɗa ndugon nya kam kuj ndub Luwaht, tɔsɨ tabɨlg lo ngémbel nar tɨla, kɨ nya ndɨ ngéɗagat derrg. 13Na eld an: Ndangɨn kam maktubt anan: Kuj lom a i kuj kelta kɨ Luwah, na ĩn, i telɨna bulo to ngékumɗobgt.

14Mundog kɨ mootg ɗen kɨ roat kam kuj ndub Luwaht, ad yootd. 15Lon ngénjanyamosɨkadkari kɨbog, kɨ ngéndang maktubg oon nyag kɨ yaya'n Jeju ɗa, kɨ ngang'n ɗa koon kam kuj ndub Luwaht anan: Hosana kɨ dɔ Ngon Dabidt ye, wong tɔld sɔkɨr. 16Ad elɨna anan: Oo dɔ ta'n ɗa elɨn yo? Na Jeju eld an: Ãã, i dan ta 'nten kam maktubt ale? Ĩn el an: Ta ngan kɨkasɨg kɨ ngan kɨdug ndɨ elta dɔ kɔsɨgont loi tit'n i ndigɨn.

17Jeju nyad na tee kam ɓebot kɨtɨga aw ɓi Betanit nu.

Jeju nda ndɔl dɔ kag mbaiɓoodt

(Oo Mrk 11:12-14,19-26; Luk 13:6-9)

18Jeju ndɨ tel kɨgog kam ɓet kɨsĩ ritit na ɓo õa. 19Kag mbaiɓood mad ɗa nderbe bɔg ɗobt, Jeju aw girrt na ngah nya mad tit al, na mbiag tã koon. Ela an: A and al par kɨ nõit.

Dɔ kaglot'n nõkag mbaiɓood tut kurum. 20Lon ngéndoog oon nya 'nten ye, ta yad kɨ dumbit ad anan: Titbãi hã kag mbaiɓood'n ɗan tut kurum tajigt a?

21Jeju turd an: Rota la m'ndɨ m'elsɨ kɨ ndim dõ, ĩla ndɔ mad adɨn kamsɨ na i ɓad'n al a ne, a i ɗan nya'n m'ɗa kɨ kag mbaiɓood ten hã koon al, na mbã ĩla elɨn mbalbo'n ɗan anan: I ndɔt kɔ labe, na i kɨla i so kam bahbo kat't a ne, nya nõ a ɗa nya. 22Nya kɨ ɗi'n a i ndɨjen kɨ kadkam, kɨtakul kelta kɨ Luwah a ne, a i ngahn.

Juipg ndɨjen Jeju ta dɔ tɔgat

(Oo Mrk 11:27-33; Luk 20:1-8)

23Lon Jeju ud kam kuj ndub Luwaht, ngéjanyamosɨkadkari kɨbog, kɨ kɨbog lo girrdeg kɨ Israel ɗen roat lon ɗa ndoon deg, na elɨna anan: I kɨ tɔg kɨ ɗi i ɗa i ɗan nya 'nten a? Na nõ adi tɔgɨn non a?

24Jeju turd an: Mĩ kaa ne, m'a m'ndɨjesɨ ta mad kɨɗa kad m'oo ĩla i turmɨn a ne, mĩ kaa m'a m'elsɨ ta dɔ tɔgt'n m'ndɨ m'ɗan nyag nõ ho. 25Baptem lo Jã ye ɗe ko ɗah a? Ɗe ko dɔrãt e ke kokɨro degt?

Ĩn kɨɓeg ɔjɨn na bee na anan: Ĩla j'el j'an: ɗe ko dɔrãt a ne, a elj an: Ye kɨtɔɗi adɨna ne kamsɨ al?

26Na ĩla j'el j'an: Ɗe ko ro degt a ne, ad kɨ ɓoolɨn bakad koosɨg, kɨta ĩn tube oon Jã i ngekelta kɨ ta Luwaht.

27Ta la turɨn ne ta Jeju anan: Jĩ kɨ ger al.

Na Jeju eld an: Mĩ kaa m'a m'elsɨ tɔgɨn m'ndɨ m'ɗan nya 'nten al ho.

Terrta dɔ ngangt kɨ bɔwd

28Tagahsɨ i ɗi? De mad a kɨ ngan kɨdɨngãg joo. Aw ro kɨ dasat ela an: Ngonɨm, aw ɓola i ɗa kɨla kam ndɔɔ nduut lom. 29Tura an: M'ge al; na gog got ngon sĩ a ne, tɔrr ndɨn na aw. 30Aw ro kɨ ngekõjoot ela ta kɨ kɨɗa'n el ngonɨn kɨdasa nõ. Ngona tura an: Ãã Bɔwm m'a m'aw; na aw al. 31Ku ngangt kɨjoo'n non ye, kɨɗen ɗa ndig lo bɔw'n a?

Turɨn Jeju anan: kɨdasa. Jeju eld an: rota la m'ndɨ m'elsɨ ye, ngétirr lambo kɨ kaya dekɨdẽg a awɨn kete nõsɨt kam kõɓet lo Luwah. 32Kɨtɔ Jã ɗe rosɨt kam ɗob nyaɗat kɨdenesew, na i taan ta loa al; na ngétirr lambog kɨ kaya dekɨdẽg taan ta loa. Na ĩn, oon nya'n non ɓet, na gog got i tɔrrɨn ndisɨ al be gasɨ, i taan ta loa al ho.

Terrta dɔ ngéɗakɨla ndɔɔ nduut

(Oo Mrk 12:1-12; Luk 20:9-19; Eja 5:1-7)

33Oon dɔ terrta mad kɨɗang. De mad kɨ ngeɓe hɔ ndɔɔ, na hɔ nduu kamt, nda kɨnga gugɨn dɔa, urr ɓe ɓa kand nduu kamt, ɗa kuj ngom lo kɨ ngal tit, la ji ngéndɔɔgt madg kad ndɔɔn, na aw mbah dɔ ɓet mad kɨɗang. 34Lon dɔnah ja kand nduu ɗe nderbe ye, la ɓerg lon kɨ ro ngéɗakɨla ndɔɔt kad taan kand nduu lon. 35Na ngéɗakɨla ndɔɔt hɔn ɓerg'n non ndan kɨkɨɗa mbukɨ mbukɨ, tɔlɨn kɨmad, kɨmad tɔ tɨlana kɨ mbal. 36La kɨ ɓer madg kɨ bãi tɔin kɨ dasag, na ngéɗakɨla ndɔɔt'n non ɗan sed nya'n ɗan kɨ ɓerg kɨdasa nõ ho. 37Na dɔboit, la ngonɨn ta la kɨ rodt ye, gaa an: Ɓet a ɓoolɨn ndil ngonɨm. 38Na lon ngéɗakɨla ndɔɔt oon ngona ye, elɨn na kudt anan: Ngekõnduba la ɗan, i ɗen. Ad kɨ tɔlɨna, na kɨ j'ɔi nyanduba loa. 39Hɔna, lana tɨga gid ndɔɔ nduut, na tɔlɨna.

40Lon kɨɓe ngendɔɔ nduu ɗe ye, a ɗa ɗi kɨ ngéɗakɨla ndɔɔg'n non a? 41Turɨna anan: A tuj deg kɨmajalg'n non kɨ koi dang, na a la ndɔɔ nduu lon kɨ lo ndɨmat ji ngéɗakɨla ndɔɔgt kɨɗang. Ĩgɨn a adɨna kand nduu kɨ kagloa.

42Jeju eld an: I dan ta 'nten kam maktubt al bat a?

Gaj mbal'n hã ngéɗakujg mbetɨna ye, ro mbal'n non

la tel gaj mbal kɨ ndana dɔkum kujt ye,

nya 'nten i kɨla ɗa Bɨraɓe;

i nya kɨ ya takumjt.

43Kɨtɔ 'nten la m'ndɨ m'elsɨn kɨ ndim dõ m'an: Luwah a taasɨ kõɓe lon, na ad girrdeg madg kɨ ngé tee kɨ kanda. 44De'n a so dɔ mbalt'n non a tet ɗelɗel, na ĩn mbal'n non so dɔat a ne, a rigɨja.

45Lon ngéjanyamosɨkadkari kɨbog, kɨ Parisɨg oon dɔ terrtag lo Jeju ye, gerɨn ta kad ndɨ elta dan dɔd. 46Sahn hɔa, na ɓoolɨn bakad koosɨg, kɨta ĩn tube gerɨn ta kiã ngekelta kɨ ta Luwaht.

Currently Selected:

Matie 21: MlL

Highlight

Copy

Compare