Jeremi 9
9
Jeremi nõ kɨta deg lon
1Ah kɨ mĩ kɨ kujkam
kɨta deg ngetoi kɨ njad dõ kam mut,
kam mut kad
m'ɔrr rom kɔ ro degt lom,
ngéɗakaya, ɓut deg kɨ ngendokum.
2Ɗan go ndõd tit gã kɨɗabe
kɨtɔ kelɨn ta kɨmal,
i kɨta ta kɨrota hã õnɓe dɔningt al,
ɗan majal kɨdɔtdɔt na germɨn al.
Titbe la i takel Bɨraɓe ye.
3Kɨ dekɨɗen oo go ron
maj ro namɨnt
ot ɓakul ngonkõ kɨɗa
kɨta ngonkõ kɨɗen i ngetai lo,
madɓe kɨɗen i ngelata ko degt.
4Dekɨɗen gool namɨn
na elɨn ta kɨ rota al,
ndoon ndɔnd keltakɨbal.
Ɔrrɨn rɔkɨ go majalt kɨ ɗa.
5Londɨ i dan nyaɗat kɨgoot al,
i kɨta nyaɗad kɨgoot al
la mbet ger mĩ ne ye,
kɨta 'nten
Titbe i takel Bɨraɓe Ngekoosɨg:
6M'a m'nder girrd,
m'a m'nãd kɨta titbãi
m'a m'ɗa kɨ ngon mand lo deg lom a?
7Ndõ deg i kɨrã kɨ tee koi,
ndɨ elɨn takɨbal,
ndɨ elɨn ta kɨ lapia kɨ madɓedg
na ta kɨ kamdt i gum kɨya
8M'a m'nda m'ɔjd
kɨta nyag kɨ titbe ale?
Takel Bɨraɓe.
M'a m'nda ngɨra
dɔ girrdegt kɨ titbe ale?
9M'a m'nõ kɨ tõ ɗusɨɗusɨ
kɨta mbalbog,
m'a m'tɔi pa nõ dɔ dɨlalogt,
kɨ dɨlalo kɨta horr õd,
de mad kɨ tɔit goto,
deg a oon dɔ
ndɨ nyakulg kamt al,
yelg kɨ dõ kɨ dãg ãin na,
goton tube
10M'a mad Jerusalem tel gootɓe,
lo ndɨ talg,
m'a m'tel ɓebog kɨ Juda,
gotɓe kɨ de gotot.
11De kɨ ngeterr kad ger
girr nyag 'nten i nõ a?
Nõ Bɨraɓe nda ta taat kad el a?
Kɨtɔɗi nujɨn ne dɔning,
horr õa tit dɨlalo'n
de mad kɨ tɔit goto.
12Bɨraɓe el an: Kɨtɔ nyan mberkɨnda lom in m'nda nõdt kɔ, kɨtɔ oon dɔ ta lom al, telɨn rod got al tɔ, 13na telɨn rod go takɔjt kɨ kamdt awɨn go yo Baalg tit'n bɔwdg ndoond ne. 14Kɨtɔ 'nten,
Titbe i takel Bɨraɓe Ngekoosɨg.
Luwah lo Israel; Oo, mad deg'n ɗan san nya kɨkatbang tit kag mband be kɨ kɨ'n tɔl de. 15M'a m'tɨnda m'tĩd ku girrdegt kɨ dang dang ĩgɨn ĩn kɨbe kɨdɔd ke bɔwdg gerɨnd kete al. M'a m'tuɓa god kɨ kiyaɗɔɔ mbã m'nujd kɔ.
16Titbe kel Bɨraɓe Ngekoosɨg;
I kunɨn dekɨdẽg ngenõ ad ɗen,
i kunɨn dekɨdẽg ngegoosɨg ad ɗen.
17Ad ɗen kanangbe tɔin pa nõ dɔjt
kad man nõ ɗe kumjt,
kɨ man non ɗe takumjt.
18Kɨtɔ oon dɔ kah ndi wi kɨkud
kɨ ɓebot kɨ Siõ.
I ɗi ɓai a?
Jĩ kɨ nuj kɔ.
Jĩ kɨ rosɔl,
tɔsɨn kujg loj tɨlan.
19Dekɨdẽg, oon dɔ ta lo Bɨraɓe
adɨn mbisɨ oo dɔ ta kɨtaat
i ndoon ngansɨg kɨdẽ pa nõ kamkil,
kɨ dekɨdẽg ndoon na tɔi pa nõ,
20kɨta koi and buro kujgt loj,
and kam kuj kõɓegt loj,
nuj ngang dɔ ɗobt
na nuj basag kam natlogt ho.
21Eld an:
Titbe la i takel Bɨraɓe ye.
Nin deg a tuson tit kɨ'n be kam ndɔɔgt,
tit'n dɔ sĩga nyako kɨ so go ngejaat
na ngekawd kɨnat goto.
22Titbe kel Bɨraɓe:
Ad de kɨ ngeterr ga buro kɨta terr lon al,
ad de kɨ ngetɔg ga buro kɨta tɔgɨn al,
ad ngemaj ga buro kɨta nyamajg lon al,
23na de'n ndɨ ga buro a ne,
kɨ ga buro kɨta ger kɨ germ;
kad ger Mĩ. Bɨraɓe kɨ Ngekɔj kamkẽ,
kɨ takɨgang kɨgoɗobat kɨdenesew dɔningt.
Kɨtɔ nyag 'nten la m'ngan ronel ye.
Titbe la i takel Bɨraɓe ye.
Bɨraɓe ug el deg oon rod ngéjagajt
24Oon, ndɔg ndɨ ɗen nõ, lon m'a m'nda m'ɔj deg kɨ ngéjagaj tube'n jan gaj kɨ ngarkamt al.
Titbe la i takel Bɨraɓe ye.
25Ejiptiag, Judag, Edomag, Amoniag kɨ Moabiag ĩgɨn jan ta mbaitad, ĩgɨn ndɨ kam mut, kɨta girrdeg'n non tube ĩn ngéjagajal na ngékɨɓe lo Israel tube jan gaj ngarkamdt al.
Currently Selected:
Jeremi 9: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
