Jeremi 10
10
Luwah Ngekumkajɨr kɨ yog kɨkoi
1Ĩn ngékɨɓe lo Israel, oon dɔ ta'n Bɨraɓe elsɨ. 2Titbe kel Bɨraɓe:
Ot ndajɨn ɗob nyaɗa girrdeg
kɨ dang dang, ot ɓoolɨn nyakɔjg kɨ
dɔrãt kɨta girrdeg ndɨ ɓoolɨnd.
3Kɨta nyabelɓeg lo deg'n nyag kɨ pãbe.
I kag kɨ gan kam kut,
i kɨlaɗa ji kɔd ngetɔsɨ kag.
4Kag'n tɔsɨn non,
ɗan roa kɨ nar ɔr kɨ arjã,
lan ngaw tit
ndan kɨ marto kad ye al.
5Yog'n non ɗan kɨ pilie kɨbobe.
A elɨn ta al bat.
Tond dõ kɨta asɨn ndia al.
Ot ɓoolɨnd kɨta awɨn kɨ tɔg ɗa majal al
ke ɗa maj kaa, goto kamdt.
6Kɨmad kɨtit sei goto Bɨraɓe.
Ĩ kɨbo, tɔi i kɨbo kɨta tɔgi.
7Ngar kɨdɔ girrdegt, nõ a ɓooli al
Kɨtɔ ɓool sumbai.
Ku ngéterrgt lo girrdeg tube
kɨ kõɓeg lod ye
Kɨmad kɨtit sei goto.
8Ĩn tube'n tit dãg kɨ ɓoodg,
nyandoo lod i nya kɨpãbe ĩn kag koon.
9I nar arjã kɨ nda mbujmbuj
ĩn ɗen ne ko Tarsis,
nar ɔr kɨ dɔning Upaj,
i kɨlaɗa ji kɔd pel nar ɔr,
yog'n non land kub kɨkɨre wor wor
kɨ kɨkil musɨmusɨ, tube ĩn kɨla
ɗa ngegoosɨɗaa.
10Na Bɨraɓe i Luwah kɨrota,
i Luwah Ngekumkajɨr
i Ngar Kɨ mbãkɨnõt,
wong loa yee dɔning
girrdeg asɨn
duba ɗàn nõ wongt loa al.
11A i elɨnd titbe anan:
Yog ĩgɨn ɗan dɔrã kɨ dɔning al
a goton ko dɔ dɔningt kɨ girr dɔrãt.
12Bɨraɓe la ndah dɔning kɨtakul tɔgɨn,
ad dunia ɗà bijir kɨtakul terr lon
la pal dɔrã kɨtakul nyager lon.
13Lon ndia ko a ne,
mang kon huhu kam dɔrãt,
ad kilndii ɓai dɔngoi dɔningt.
Tee kɨ telndii kɨ ndii kɨked
tee kɨ nel kam luɓo nyamajgt lon.
14Dekɨɗen tel tit dã
kɨ goosɨ loa goto be
kod pel nar ɔr kɨɗen i kɨ rosɔl
kɨta ɓakumta nya kɨtɔsɨ loa.
Kɨta yog loa ĩn nyag kɨngom.
Kò goto kamdt.
15Ĩn nyag kɨ majd goto.
Ĩn nya ndokum
a nujɨt kɔ lon ɗe kɨ ndakɔj.
16Gaj lo Jakob i titbe al
kɨta i Luwah loa la ndah nyag tube ye,
girrdeg Israel i nyanduba loa,
tɔa i Bɨraɓe Ngekoosɨg.
17Nyag kɨdɔningt kɨ ĩn loi i kawd kɨnat,
in kɨ ɗɔɔ gug dɔi.
18Kɨtɔ titbe kel Bɨraɓe:
Oon tajigla m'a m'la
ngendɨ dɔningt'n ɗan ko sãi,
m'a m'ɔsɨd kɨnat kɨtakad ngahnd.
19Beto lom kɨta dó lom.
Dó baig lom,
na m'el m'an:
I tuj kɨ tee dɔmt m'a m'ndɨ dɔt.
20Kujkub lom tuj,
kɨlag lom tube gangɨn
nganɨmg tĩn nyàmɨn na goton.
De kɨ kad un kujkub lom
kɨ dõ gog goto,
nõ a dɔ kubganglo lom gog a?
21Ngekulnyag awɨn kɨ hal dan,
sahn go Bɨraɓe al.
Kɨtɔ 'nten la maj urrdɨn al ye
ad ɓut nyakulg lod tube tĩn na kɔ.
22Oon kah mad ko nõ.
I kɨse kɨbobe in ɗe kojigel
kɨtakad ɓebog kɨ Juda
telɨn gootɓe telɨn londɨ talg.
23Ah Bɨraɓe m'ger ɗob
lo de i kam tɔgat al.
De kɨ ngenda asɨ kɔrrta ɗob ron al.
24Ah Bɨraɓe, i nda ɔjɨm na asɨ kɨgo
takɨgangt kɨgoɗobat tan
na kam wongt loi kɨtɨngabil al
na ɓeta i nujɨm kɔ.
25I ũ wong loi kɨtɔlsɔkɨr dɔ girr
degt ĩgɨn gerɨn al
kɨ kɨdɔ degt ĩgɨn kunɨn tɔi al
kɨta san Jakob,
lana yalɨm ad goto,
tujɨn londia kɔ.
Currently Selected:
Jeremi 10: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
