Jeremi 8
8
1Kaglot'n non, a ɔrrɨn kɨnga Juda kɨ kɨnga mbaiɓeg loa, kɨ kɨnga ngéjanyamosɨ, kɨ kɨnga ngékelta kɨta Luwaht, kɨ kɨnga ngéndɨ Jerusalem.
Titbe la i takel Bɨraɓe ye.
2Ũn kɨngag'n non tɨga dan kàdt, kɨ takum nah kɨndà kɨ kɨnõ koosɨgt kɨdɔrãt tube ĩgɨn tarɨnd, ɗan kɨlaɓer adɨnd, ndulon god sahn god, ɔsɨn dɔd ber nõdt. Kɨngag'n non, a kawɨnd kɨnat al, a duwɨn al tɔ, a ĩn tit ɓirɓit kɨdɔningt be. 3Na ndeg deg kɨnãi kɨ dɔd dõ ku girrdegt kɨmajal'n ɗan a geen koi tɔi ndɨ kɨdɔ dõ kam lot kɨɗen'n tuɓad tit, kel Bɨraɓe Ngekoosɨg.
Kam deg hɔd kɨ ta dɔ majalt al
4A i eld an: Titbe kel Bɨraɓe;
Ĩla deg son a ne,
a ɓain dõ gog ale?
Ĩla deg ndɔmɨn ɗob
a ndan kamd dɔ telt ale?
5Kɨtɔɗi deg kɨ Jerusalem
nãin londomt kɨnõt a?
Ho ɗan nya kɨlo ndokumt,
mbetɨn tel kɨromt.
6M'nel mbim m'oon dɔ elɨn
ta kɨ rota al.
De kɨɗa kɨ tɔrr ndin.
Dɔ majalt lon goto,
kɨ kan: Ɗi m'ɗa a?
Dekɨɗen kudt un ɗob lon
tit sɨnda kɨ mbut ngɔd kɨ loɗɔɔt be.
7Ke gõkadndɔ kɨ dõ
kam nélt kaa ger dɔnah'n
der ke kaikai ke dãg
ndɨ gerɨn kaglo ɗed maj
na deg lom gerɨn
mberkɨnda lo Bɨraɓe al.
8Titbãi i asɨn kel kan: Jĩ ngéterr
na jĩ kɨ mberkɨnda lo Luwah a?
Oon, kag ndang maktub kɨngom,
lo ngendanga tela takɨbal.
9Ngeterr a ĩn kɨ rosɔl,
ɓool a ɗad, deg a hɔnd.
Oo, mbetɨn ta lo Bɨraɓe,
terr kɨ titbãi ĩn ne a?
10Kɨtɔ 'nten,
m'a mad nẽdg deg madg kɨɗang
kɨ ndɔɔg lod deg ngetɨnda tĩnd,
mba girra dɔ de kɨdut
mbã kɨdɔ de kɨbot,
adɨn rod kumndà
kad ngahn nya kɨgoot al,
ngekelta kɨta Luwaht kɨ ngéjanya
mosɨ tube'n ngéndokum.
11Nya kɨ to kɨ ɗa deg lom ye,
oon ad i nya kɨ kari ko rodt elɨn anan:
lo to kɨ lapia, lo to kɨ lapia.
Na lapia goto.
12Ĩn kɨ rosɔl kɨta nyaɗa kɨyerr'n ɗan a?
à ã. Rod sɔld al takumd hɔ ndo al tɔ.
Kɨtɔ 'nten a son nat kɨ deg'n son,
a tɔsɨ tɨland lon
m'nda m'ɔjd, kel Bɨraɓe.
13M'a m'nujd kɔ
Titbe la i takel Bɨraɓe ye.
Kand kɨnãi dɔ dĩ nduut a goto,
kand mbaiɓood a goto dɔ kagat tɔ,
mbikamg a ndulon,
nya'n m'ad'd a goto jidt.
14Kɨtɔɗi kɨ ndi'n nẽbe a?
I kawɨn na,
ad j'awɨn kam ɓebogt kɨngang
kad kɨ nujɨn tit
kɨta Bɨraɓe Luwah gang koi dɔjt.
Ad j'ãin man kɨ'n tɔl de
kɨta kɨ ɗan majal,
kɨ ndoorɨn Bɨraɓe.
15Kɨ nda kamj dɔ ndɨt kɨ lapia
na nya kɨmaj ɗe al,
kɨ nda kamj kaglo yoot, na oo
nya kɨkootɓool.
16Ko Dan oon dɔ sɨndag lod ndilɨn
oon dɔ kah ndil sɨndag,
dɔning yee kɨtaagbe,
ɗen, san dɔning kɨ nya kɨ kamt,
ɓebo kɨ ngendɨt
17kɨta m'la kɨ lig yirg
kɨ wongd i ngãi kɨdɔsɨt,
li pirg kusɨt kad tõnsɨ,
Nya kɨ a ɔgd dɔ tosɨ goto.
A tosɨn koon titbe la i takel Bɨraɓe ye.
18M'ndig kɔrr kamkil lom,
ngarkam kɨ kammt ndɨ tom.
19Oo ndɨ ko lo girrdeg lom,
kad m'ɗa sãi ad i Jerusalem
ko loa i kam dɔningt kɨ taagbe:
Ke Bɨraɓe goto kam dɔning Siõt a?
Ɓebo kɨ Siõt ye, ngar goto kamt e?
Kɨtɔɗi sɔkɨn ne wong lom kɨtakul
ɓakumta nyag lod kɨtɔsɨ
kɨ yog lod kɨmbah a?
20Kaglo ja nyako tɔi,
ɓar ud woi
na jin j'aj al ɓaitɔ.
21Tɔgɨm goto kɨta kamkil lo ngon
mand lo deg lom,
m'hɔ ndo, ɓool ndɨ ɗam.
22Kĩ baume goto Galaadt a
Dɔktor goto nu a?
Kɨtɔɗi dó lo ngomand lo deg
lom yoot al a?
23Ah, kɨ dɔm ɗoosɨ kɨ man,
ad kumm i loɓa man nõ,
titbe m'a m'nõ ndɔ ho, kada ho,
kɨta kɨtalg kam ɓebot lo deg lom.
Currently Selected:
Jeremi 8: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
