Jeremi 7
7
Juda ɗa yo, ad yerr kɨ ron
1Ta'n tee kokɨro Bɨraɓet, ɗe ro Jeremit, an: 2I ɗa tabit't lo kuj lo Bɨraɓe, lot'n non i la mber ta 'nten an: Oon dɔ ta lo Bɨraɓe ĩn deg kɨ Juda tube, ĩn ngékand tabitg'n ɗan kɨta kɔsɨ dɔ ber nõ Bɨraɓet. 3Titbe kel Bɨraɓe Ngekoosɨg, Luwah lo Israel. I oon go ɗobg losɨ kɨ kɨlaɗasɨ kamla m'a m'nyasɨ kad i ndɨ kam lot'n ɗan. 4Ot ɓan kul tag kɨngom kɨ kan: Kuj kɨjaɓat lo Bɨraɓe, kuj kɨjaɓat lo Bɨraɓe, kuj kɨjaɓat lo Bɨraɓe. 5Ĩla i gangɨn ta denesew ku det kɨ madɓen, 6ĩla i ɗan ngetɔg dɔ mbaht, ke ngonhal, ke nge ngawkoi al, ĩla ũn mosɨ kɨkanj ta lot'n ɗan al, ĩla i awɨn ro yogt kɨ mbah al in tee kɨ majal dɔsɨt a ne, 7m'a m'adsɨ ndɨ kam lot'n ɗan kam dɔningt kɨ mad bɔwsɨg maɗi nu mbãkɨnõt. 8Na oon i ndɨ ɓan kul tag kɨngom kɨkari pãbe. 9Ɗi kɨ be? I ɓoogɨn i tɔlɨn deg, i ɗan kaya i lan horr nya kɨkootmbĩ adɨn Baal, i awɨn go yogt kɨ i gerɨnd kete al. 10Goot gog i ɗen, ɗan nomt kam kujt'n ɗan in kunɨn tɔm dɔt, elɨn anan: Aj ji woi. Na I ho ɗan nyag kɨyerr. 11Kuj'n ɗan in kunɨn tɔm dɔt ye tel bulo to ngekumɗob ta kumsɨt a? Mĩ kɨbe kɨdɔm m'oo nya 'nten.
Titbe la i takel Bɨraɓe ye.
12Awɨn lot lom kɨjaɓat, Silo, in tɔm ndɨ koot maɗi nu, oon nya'n m'ɗa sia kɨta ɗagootal lo deg lom Israel. 13Na tajigla, tit kan i ɗan kɨlag 'nten tube.
Titbe la i takel Bɨraɓe ye.
Tit'n m'elsɨn ta kɨdɔtdɔt kanj nya ta, na oon dɔ al m'kunsɨ na i turɨn ta al. 14Kɨtɔ 'nten m'a m'ɗa kɨ kuj'n ɗan in kunɨn tɔm dɔt, ĩn i ɓan kula, kɨ lon m'adsɨ kɨ bɔwsɨg tit'n m'ɗan kɨ Silo ye be. 15M'a m'lasɨ kɔ takum'mt tit'n m'lan ngankõsɨg kɔ, ad i koh Epraim kɨtaagbe. 16Na ĩ Jeremi taa, ot kɔ kɨta deg'n ɗan, ot kun ndii kɨ dõ kɔn, ke kelta sem kɨtad, ot kɔ kɨkanj nya ta kɨtɔ kad m'a m'oo dɔ kɔ loi al. 17I oo nya'n ɗan kam ɓebogt kɨ Juda kɨ dɔ ɗobgt kɨ Jerusalem ale? 18Ngang ɔin kir, bɔwdg ɗan horr, dekɨdẽg lɔi'n nduj, ɗan ne woina kad ngar kɨdẽ kɨdɔrãt kad nũn kadkari nyakãi n'adɨn yog kɨmbah kɨtakad kɨ n'sɔkɨmɨn ne. 19I mĩ la ndɨ sɔkɨmɨn yo oo?
Titbe la i takel Bɨraɓe ye.
Ĩn kɨdɔd ten kɨ girr rosɔl lod kɨkɔsɨdɔd ale? 20Kɨtɔ 'nten titbe kel Bɨraɓe Luwah: Oo, wong lom, wong lom kɨtɨngabil a ɗe dɔ lot'n ɗan, dɔ det kɨ dɔ nyakult kɨ kag kɨ kam ndɔɔt kɨ kandnya kɨdɔningt, a õ tit horr be na a oi al bat.
Mbetɨn koo dɔ ta lo Luwah
21Titbe kel Bɨraɓe Ngekoosɨg, Luwah lo Israel: I lan kadkari losɨ kɨ lahort kɨ kɨjakɔ dɔt, i san dã. 22Lon mad bɔwsɨg teen ne dɔning Ejipt't kɨtɨga ye, m'eld ta ke m'ndad mber dɔ kadkari kɨlahorrt ke kadkari kɨjakɔ al. 23'Nten la i mber'n m'ndad: Oon dɔ ndim a ne, m'a mĩ Luwah losɨ a ĩn deg lom ho. I ndian kam ɗobgt lom tube ĩn m'ndasɨ mbera kɨtakad maj urrsɨ. 24Na oon dɔ al, nelɨn mbid al tɔ, telɨn rod go ndimt al, na taan takɔj kɨmajal kɨ ngarkamdt kɨkongkong, awɨn kɨkete al, na telɨn kɨ gog. 25Lon bɔwsɨg teen dɔning Ejipt't mbã ɓone, ndɔ tube m'la kɨ ɓerg lom ngekelta kɨ tamt kɨrosɨt, 26na ĩng taa ne, oon dɔ ta lom al, nelɨn mbid oon ne al tɔ, na ngɨran god, ɗan majal tɔi kɨlo bɔwdg ɓaitɔ. 27Ĩla i eld tag 'nten tube kaa a oon dɔ ta loi al, ke i kund kaa a turɨn ta al. 28Kamla i eld an: Oo girrdeg'n oo dɔ ndita lo Bɨraɓe Luwah loa al, ndig ta takɔj al ta kɨrota goto roat, tee taat al.
29I ngɨse dɔi,
i laa kɔ sãi i nõ hɔndo
dɔ doorlogt kɨ ton dɨla
kɨta Bɨraɓe mbet ngakan ɗan,
ngésɔk wong loa kɨtɔlsɔkɨr.
Ndɔg kɨmajal ngãi a ɗen
30Kɨtɔ ngan Juda ɗan nya kɨmajal takum'mt kel Bɨraɓe. Udɨn nyag kɨyerr kam kujt lom, in kunɨn tɔm dɔt telɨna kɨyerrt. 31Ɗan dɨngɨr mad'n tɔa i Topet kam hollot lo ngan Hinom kɨtakad lan ngandg kɨdɨngã kɨ kɨdẽ horrt, nya'n m'nda mbera al, na m'ga kamm dɔt al tɔ. 32Kɨtɔ 'nten oon, ndɔg ndɨ ɗen nõ.
Titbe la i takel Bɨraɓe ye.
Lon a kunɨn tɔa Topet ke Hollo lo ngan Hinom gog al ta, na a elɨn anan: I Hollo tɔl deg. A duwɨn ngékoig kam Topet kɨta lo dub nin kɨɗang goto. 33Nin deg'n non a tel nyasa yelg kɨ dõ kɨ dãg kɨ dɔningt, na de mad in a tuɓad kɔ goto. 34M'a mad kud wi kɨronel kɨ kamnda goto kam ɓebogt, kɨ Juda kɨ dɔ ɗobg kɨ Jerusalem, ndi pa lo ngetaa dekɨdẽ kij, kɨ pa lo ngetaangaw kij a goto kɨta dɔning a tel gotlo.
Currently Selected:
Jeremi 7: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
