Jeremi 6
6
Jerusalem a so dan kamkɔlt
1Ĩn deg kɨ Benjami,
i tee ãin kɔ kam Jerusalemt,
i kunɨn tow kam ɓet kɨ Tekoa,
i ɗan nyakɔj dɔ ɓet kɨ Bet Kerem kɨ dõ
kɨta nujkɔ a ɗe kojigel,
i nujkɔ kɨbobe.
2M'a m'nuj ngomand kɨmaj,
ɓebo Siõ kɨ to kumndà kɔ.
3Deg ɓain awɨn kɨ roat
Tit ngékulnyag kɨ ɓut nyakulg lod,
a ndan kujkubg lod gugɨn dɔa,
ɓut kɨɗen a sanya kam lot lon.
4I ɗan go rosɨ kɨta ɗɔɔ sia,
I ɓain, dan kada kaa, ad j'awɨn.
Ɓe to loj, kad ɗa ud na ndil nya
kɨlokɨsɔle tee ngal.
5Ad kɨ bai, j'awɨn kɔndɔ ne kad
kɨ nuj kuj kõɓeg loa.
6Kɨtɔ titbe kel Bɨraɓe Ngekoosɨg:
I gan kagg, i ɓan lo kɨ dõ ndoorɨn
ɓebo Jerusalem,
oo, i ɓebo'n sumba kad nda ɔja,
nyaɗa kɨlo ngetɔgt koon
la ɗoosɨ kama ye.
7Tit'n buloman ndɨ ɓa kɨ man,
titbe tɔ la nyaɗa kɨgoot al loa teen ye.
Oon dɔ kah nyaɗa
kɨlo ngetɔgt kɨ nujkɔ kamat,
kõg kɨ dog ĩn nomt kɨndɔgndɔg.
8Ah Jerusalem, i taa takɔj
na ɓeta a ne, m'ɔrr rom roit kɔ,
m'teli gootɓe, dɔning kɨ de gotot.
9Titbe kel Bɨraɓe Ngekoosɨg:
A burɨn ndeg Israel kɨnãi
tit'n deg a burɨn ne kand nduu.
I tel nda jii dɔat gog tɔ,
tit'n ngeja kand nduu tel jin,
nda dɔt nduut ye be.
10Nõ m'a m'ela ta a?
Nõ m'a m'una ngemanajt
kad oon do a?
Oon, mbid ut, asɨn ko dɔ al,
ta lo Bɨraɓe tel nyakid rodt,
ngahn ronel tit al.
11Mĩ taa, wong lo Bɨraɓe
kɨtɔlsɔkɨr ɗoosɨ kamm,
m'asɨ ndɨdɔt al.
M'ũa dɔ ngont kɨdɔ ɗobt kɨ kɨdɔ
kawnat lo basag,
kɨta a hɔn dɨngam kɨ dekɨdẽ,
bɨgag kɨ de'n ndɔa i ngãi.
12A taan kujg lod kɨ ndɔɔg lod kɨ
nẽdg adɨn deg madg
lon m'a m'la jim kɨdɔ ngendɨ
dɔningt'n ɗan.
Titbe la i takel Bɨraɓe ye.
13Kɨtɔ 'nten la m'mbagirra
dɔ de kɨdɔdut mbã kɨdɔ kɨbot,
tube ĩn ngeɗakumnda,
mba girra dɔ ngekelta kɨta Luwaht
mbã kɨdɔ ngejanyamosɨt tube,
ĩn ngégool deg.
14Dɔn dó lo deg lom ad ta dó ho sĩsĩ,
elɨn anan: Lapia lapia. Na lapia goto.
15A ĩn kɨ rosɔl kɨta nyaɗa kɨyerr,
rod sɔld al bat, unɨn kumd kɨ dõ kari.
Kɨtɔ 'nten a son nat kɨ deg'n son,
a tɔsɨ tɨland lon m'nda m'ɔjd.
Titbe la i takel Bɨraɓe ye.
16Titbe kel Bɨraɓe:
I dɨba i ɗa da dɔ ɗobt, oon lo,
i ndɨjen ɗobg kɨmaɗi oon,
ke ɗob kɨ ɗah i kɨmaj a?
I ndiant na a i ngahn ne
taakò kɨta rosɨ.
Na turɨn anan: Jĩ j'a kɨ ndiat al.
17M'nda ngéngomlo rosɨt m'an:
I nelɨn mbisɨ dɔ ndi towt.
Na i turɨn anan:
J'a kɨ nel mbij al.
18Kɨtɔ 'nten oon dɔ,
ĩn girrdeg kɨ dang dang.
Ĩn ngékawna lo girrdeg kad i
gerɨn ne nya'n a ɗad.
19Deg kɨ dɔningt, oon dɔ.
M'a m'ɗe kɨ nyakɨto dɔ degt'n ɗan,
i kand tagahd kɨta nelɨn mbid
dɔ tagt lom al
mbetɨn mberkɨnda lom.
20M'a m'ge nya kɨkootmbĩ
kɨ ɗe ko Seba
kɨ kadnya kɨnel kɨdɔningt kɨsãi a?
Kadkari losɨ kɨlahorrt ye, m'ge al
kadkari losɨ kɨjakɔ nelɨm al tɔ.
21Kɨtɔ 'nten titbe kel Bɨraɓe:
Oo, m'a m'la mbal gagigt
nõ degt'n ɗan,
bɔwg kɨ ngang nat tube
a gan njad dɔt
madɓe kɨ nam a nujɨn.
22Titbe kel Bɨraɓe:
Oo, girrdeg mad ɓai
ko dɔning kɨjigel,
ndɨ ɗe girrdeg kɨbo
ndɨ ɓai ko sãi dɔngoi dɔningt.
23Hɔn gã kɨrã kɨ ninga jidt,
ngeɗa takõ kɨkanj kookumtondo
ndid ko tit bahbo be, ndɨn dɔ sɨndagt.
Dekɨɗen kudt ɗa ron woi kad ɗɔɔ sesɨ,
ĩn ngendɨ Siõ.
24J'oo hɔid, jij oi yelel kamkɔl ɗaj,
daiyo tit kɨlo dekɨdẽ kɨ ngetõkooj be.
25Ot teen kam ndɔɔgt,
ot kawɨn dɔ ɗobgt
kɨta kiyaɗɔɔ lo madngéta i nõ
tuj kɨbobe gug dɔ lo gej,
26Deg lom kɨ ɓebot,
i dõ ɓosɨ kɨ kub hɔndo,
i ndubɨrɨn rosɨ kam buhoort
i hɔndo ɗa hɔn ne ndo lo
ngon kɨdɨngã kɨkal kɨɗabe,
i nõn non kɨkatbang,
kɨta, ngetujnya ndɨ ɗe,
a hurj ruk.
27M'ndai ku degt lom kad i nánd,
kad i gerd kɨ nan ɗobg lod.
28Ĩn, tube, ĩn ngétaaɗɔɔ,
ngélata ko degt,
ĩn ningakasɨ kɨ hand tube,
ĩn nya kɨndum.
29Ndub ndɨ ɔsɨ ngãi
na horr õ nar plomb kɔ,
ndɨ arɨna kari kɨndang,
majal loa ɔrr al.
30Kunɨn deg'n non nar arjã kɨmajal
kɨta Bɨraɓe mbetd.
Currently Selected:
Jeremi 6: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
