Jeremi 5
5
Girr takɨgang kɨdɔ Jerusalemt
1I ãin ngɔd
kɨdɔ ɗobg kɨ Jerusalem,
i nɔlɨn, oon kad i gerɨn.
I sahn kam natlogt kad i ngahn de,
de mad kɨ hɔ ɗa nya kɨdenesew,
de kɨro.
Kamla m'a m'nyago
majal lo Jerusalem kɔ.
2Ke neni elɨn anan:
Bɨraɓe ndɨ kɨ dɔa dõ,
kaa ne ndan yo takɨbal kari.
3Ah Bɨraɓe,
kumi oo nyag kɨrota al e?
I ndad na rod tod al,
i tɔɔ kohd
na mbetɨn ndakɔj,
takumd ngang tɔi mbal,
mbetɨn tel kɨroit.
4M'el m'an:
Rota, deg'n ɗan ĩn ngéndog,
ɗan nya kɨlo ɓoodt
kɨta gerɨn ɗob lo Bɨraɓe al,
ke mberkɨnda lo Luwah lod.
5M'a m'aw ro kɨbogt m'a m'eld
kɨta gerɨn ɗob lo Bɨraɓe ɓet
kɨ mberkɨnda lo Luwah lod tɔ,
na deg'n non tetɨn jug,
gangɨn kɨla dɔɔ.
6Kɨtɔ 'nten la tubo kɨ kam kút hɔd
biskolo kɨmut nujd,
kag ndia gug dɔ ɓe lod,
dekɨɗen in tee tɨga a ne,
tubo a hɔa, ria nat,
kɨta tɔin dɔ ta ngãibe,
ɗagootal lod bɨla kɨdɔtdɔt.
7Titbãi m'a m'nyan
go majal loi kɔ a?
Nganig tĩn nyàmɨn kɔ,
ndan yo kɨ takul nya kɨ i Luwah al.
M'uld kɨ nyasa kɨmaj
na ɗan kaya kawɨn na koosɨg
kam kujt lo kaya dekɨdẽ.
8Titɨna kɨ sɨndag kɨ ulɨnd maj,
ndian kɨ log papa,
nẽbe kɨ nube,
kɨɗen kudt la ndil,
sahn nẽ madɓen.
9Nya kɨ titbe m'a m'ɔj kuma ale
Titbe la i takel Bɨraɓe ye.
Girrdeg kɨ titbe,
m'a m'nda ngɨra dɔat ale?
10I alɨn dɔ ndogbɔrrt loa,
i nujɨnd, na ot nujɨm kɨtaagbe.
I gangɨn dɔj nduun
i lo Bɨraɓe al kɔ.
11Kɨtɔ ngékɨɓe lo Israel
kɨ ngékɨɓe lo Juda
ɗan sem nya kɨlo ndokumt,
Titbe la i takel Bɨraɓe ye.
12Majɨn ta ger Bɨraɓe,
elɨn anan: Luwah goto.
Nyakɨto a ɔdj al
j'a j'oo nyakat ke bo al.
13Ngekelta kɨta Luwaht
tit'n kɨ nel la kɨjeje goto kamdt;
titbe a ɗan ne sed ho ye.
14Kɨtɔ 'nten
Bɨraɓe Luwah Ngekoosɨg elɨn ta.
Tit'n i elɨn ta 'nten oo,
m'ndig kad ta lom
kɨ tee tait i horr
na deg'n ɗan ĩn kir kad horr õd.
15Oon, m'ndɨ m'ɗe kɨ girrdeg
kɨsãi kɨ dɔsɨt
Ĩn ngekɨɓe lo Israel,
Titbe la i takel Bɨraɓe ye.
I girrdeg kɨngang
i girrdeg kɨ ndɨ maɗi nu,
girrdeg'n i ger ta ɓe loa al,
oo dɔ ta loa al tɔ.
16Ɓɔl kɨrãg loa i dɔɓad kɨ ɗa tag,
tube ĩn gõɗɔɔg.
17A san nyako loi kɨ nyasa loi,
a san ngani kɨdɨngãg kɨ kɨdẽg,
a san batg loi kɨ mangg loi,
a san kand nduu loi
kɨ kand kag mbaiɓood loi.
Ɓebog loi kɨngang ĩgɨn i ɓakuld ye,
a nujd kɨ kiyaɗɔɔ.
18Na ndɔt'n non kaa,
m'a m'nujsɨ kɨtaagbe al.
Titbe la i takel Bɨraɓe ye.
19Lon deg loi a elɨn anan,
Kɨtɔɗi Bɨraɓe Luwah loj
ɗan sej nyag kɨ titbe a?
Kamla a turd an:
Tit'n i nyàmɨn ne kɔ
na i ɗan ɓer adɨn yog
kam dɔningt losɨ ye,
titbe tɔ a i ɗan ne ɓer lo mbahg
kam dɔningt kɨ i losɨ al.
20I elta 'nten
ad ngékɨɓe lo Jakob oon dɔ,
i la mbera kam Judat an:
21Oon dɔ ta 'nten
maj ĩn ɓood deg kɨkanj terr,
ĩn kɨ kumsɨ na oon ne lo al
ĩn kɨ mbisɨ
na oon ne dɔ ta al.
22I ɓoolmɨn ale? Takel Bɨraɓe.
Rosɨ ndad kɨnomt ale?
Mĩ kɨ ngenda ngár
kad i ɗobnin bahbo
i ɗobnin kɨtokɨnõt kad tɔi dɔ al
hula ɔsɨ pɨkapɨka
na tɔga asɨ al,
ko huhu na tɔi al.
23Na deg'n ɗan ĩn ngédɔngang,
taan takɔj al
ĩn ngételrogotat al,
Ĩn ngétaaɗɔɔ
na kaw lo kɨ kamsɨ ge.
24Elɨn kamdt anan:
Ad kɨ ɓoolɨn Bɨraɓe Luwah loj.
Elɨn titbe al.
I ngekad ndii kɨdasa
lon ɓart mban girrɨn
mbã ndii kɨ kɨdɔboit,
lon ɓal ndɔt ad kaglo tet nyako ɗe
ad kaglog ton lotodt.
25Ɗagootal losɨ la ɔgsɨ majkurr,
majal losɨ to la ɔgsɨ nyamajg ye.
26Kɨtɔ ngahn deg kɨmajal ku degt lom
umɨn lo tit ngehɔ yel be,
yan gum hɔn ne deg.
27Tit'n kuj yel ɗoosɨ kɨ yelg,
kujg lod ɗoosɨn kɨ ndokum
titbe telɨn ngétɔg kɨ ngenyangah.
28Ulɨn rod, boon mbulmbul, rod ndulo,
ɗan majal kɨtɔi,
gangɨn ta lo ngan halg
kad maj urrd al
gangɨn ta lo ngendog al tɔ.
29Nya kɨ titbe,
m'a m'ɔj kuma al e?
Takel Bɨraɓe.
Girrdeg kɨ titbe,
m'a m'nda ngɨra dɔat al e?
30Nya kɨmajal ngãi kɨ kɨyerr
ndɨ ɗa nya kam dɔningt 'nten
31Ngekelta kɨta Luwaht elɨn ta kɨ ngom,
ngejanyamosɨ õnɓe kɨgo takɔjt lod
na deg lom gen nya kɨ titbe.
Dɔboia a ne, a i ɗan ɗi a?
Currently Selected:
Jeremi 5: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
