Jeremi 52
52
Kaldeag taan Jerusalem
1Sedekias ɗa ɓoo gidaikɨɗa lon mba girr kõɓe na õɓe Jerusalem ɓal dɔjoo gidaikɨɗa. Tɔ kõa i Hamutal, ngon Jeremi in ɓe loa i Libna. 2Sedekias ɗa nya kɨmajal takum Bɨraɓet asɨna kɨ nya'n Jojakim ɗa. 3Nya 'nten ɗa nya kɨta wong lo Bɨraɓe kɨdɔ Jerusalemt kɨ Juda ad Bɨraɓe ndig lad kɔ sãi ta kumnt na Sedekias ta ɗɔɔ ngar kɨ Babilon.
4Ɓal kõɓe lo Sedekias kɨjikɨɗa kɨ ndɔ kɨkɨlah lo nah kɨkɨlah ye, Nebukadnesar, ngar kɨ Babilon, kɨ koosɨ ngéɗɔɔ lon tube ɗen ɗɔɔ dɔ Jerusalemt, hɔn londɨ sumba nõbe, urɨn ning ban lo gugɨn dɔa. 5Ɗɔɔ gug dɔ ɓe mbã ɓal kɨ kõkɨlah gidaikɨɗa lo ngar Sedekias. 6Ndɔ kɨjikɨɗa lo nah kɨkõsɔɔ bo kɨbobe so kam ɓet ad nyasa goto kɨta deg kɨ dɔningt. 7Kaldeag ɔsɨn tabit lo ɓebo, mbutɨn kamla ngéɗɔɔ tube ãin na kɨ tabit kɨ ɗa mbɨna bɔrgt kɨjoo nderbe kɨ ndɔɔ lo ngar. Lon Kaldeag gugɨn ne dɔ ɓe ngékãig unɨn ɗob kɨ dɨlambot. 8Ngeɗɔɔg lo Kaldeag tuɓan go ngar, ngahn Sedekias dɨlalot kɨ Jeriko, na ɓut ngéɗɔɔ loa tube tĩ nyana, ãin na. 9Kaldeag hɔn ngar, awɨn sia ro ngart kɨ Babilon Ribla kam dɔning Hamat, ĩ to gangta dɔat. 10Ngar kɨ Babilon tɔl ngan Sedekias takumat, tɔl mbaiɓeg kɨ Juda tube Ribla tɔ ho.
11Goot gog ngar kɨ Babilon tɔsɨ kum Sedekias tɔɔ, dɔa kɨ jinjir ningakasɨ, na ngar kɨ Babilon ɔrra aw sia Babilont, ngomna dangait mbã ndɔ koia.
Tujɨn kuj lo Bɨraɓe
12Ndɔ kɨkɨlah lo nah kɨkõmi kam ɓalt kɨkɨlah gidaijikɨɗa lo kõɓe lo Nebukadnesar, ngar kɨ Babilon ye, Nebujaradan, bɨradɔ ngéngomlog ngekɨlaɓer lo ngar kɨ Babilon tee Jerusalem. 13La horr kuj lo Bɨraɓe kɨ kuj lo ngar kɨ kujg tube kɨ Jerusalem. La horr kujg kɨbobo tube. 14Ngeɗɔɔg lo Kaldeag tube'n ĩn nat kɨ bɨradɔ ngéngomlog ton tabit kɨ gug dɔ Jerusalem tube.
15Nebujaradan, bɨradɔ ngengomlog, oi kɨmadg ku kɨdangtg nat kɨ ndeg deg ĩgɨn nãin kam ɓet ĩgɨn ndan rod nat kɨ ngar kɨ Babilon kɨ ndeg koosɨg kɨnãi, aw sed ɓert. 16Na Nebujaradan bɨradɔ ngengomlog, nya deg kɨdangt madg kad ngomdɨn ndɔɔ ndug kɨ ndɔɔg. 17Kaldeag tɨndan pilie ningakasɨg kɨ kam kujt lo Bɨraɓe kɨ gira kɨber kɨ njaag kɨ joman kɨbobe kɨ kam kujt lo Bɨraɓe, tetɨn na oin ningakasɨ tube awɨn ne Babilon. 18Ɔin joo la buhoorg kɨ pelg kɨ kiag kɨ kopg kɨ tasag kɨ nyaɗakɨlag tube kɨ ningakasɨ ĩgɨn ɗan ne kɨlaɓer. 19Bɨradɔ ngengomlog ɔi tasag kɨ gajog kɨ kopg kɨ ngan jo la buhoorg kɨ kag lambag kɨ tasag kɨbo kɨ baig, nyag kɨ ɗan kɨ nar ɔr kɨ nyag kɨ ɗan kɨ nar arjã. 20Pilieg kɨjoo, joman kɨbobe kɨ ɓakumta mang ningakasɨg kɨpel kɨkɨlah gidaijoo kɨ girrt ĩgɨn Salomõ ɗad kɨta kuj lo Bɨraɓe kɨ nyaɗakɨlag tube'n ɗan kɨ ningakasɨ kɨ dum kɔj kɔia. 21Pilie kɨɗen, ngala i metɨr jikɨɗa, gug dɔa asɨ metɨr kɨbojidet, bulo i tit na ndera asɨ ngan ji sɔɔ. 22Bɨradɔ pilieg'n non ĩn ninga kasɨ, bɨradɔ kɨɗen, ngala i metɨr joo kɨ nusɨ na band in ɓakumta kand kag grenadie i dɔt'n ɗan kɨ ningakasɨ gugɨn dɔ bɨradɔ ka nõ. I titbe kɨta pilie kɨkõjoo kɨ kand grenadieg loa. 23Kand grenadieg kɨkadat mad i dɔ jikɨɗa gidaikɨbojidet, kand grenadieg tube kɨ gugɨn dɔ band, kɔrd i ɓu.
Deg ĩn awɨn sed ɓert
24Bɨradɔ ngengom, log ho Seraya, bɨra ngejanyamosɨ, Soponi ngejanyamosɨ kɨ ngekõjoo, kɨ deg mɨta ngengomd tabitg. 25Hɔ bɨradɔ ngéɗɔɔg kam ɓebot kɨ ngekɔjtag kɨtanãimɨta lo ngar ĩgɨn ngahd kam ɓet, kɨ ngendang maktub lo bɨradɔ ngéɗɔɔ in ndɨ ndang tɔ deg kɨ dɔningt'n non kɨ deg dɔkɨbojidet ku degt kɨ dɔningt ĩgɨn ngahd kam ɓet. 26Nebujaradan, bɨradɔ ngéngomlog, hɔd aw sed Ribla ro ngart kɨ Babilon.
27Ngar kɨ Babilon ndad, tɔld Ribla kam dɔning Hamat't. Titbe la awɨn ne kɨ Juda ɓert sãi kɨ dɔning loa ye. 28'Nten i kɔr deg ĩgɨn Nebukadnesar aw sed ɓert kam ɓalt kɨkõtanãimɨta, ĩn Juipg duɓumɨta kɨ dɔjoo gidaimɨta; 29Ɓal kõɓe kɨ kõkɨlah gidaijijoo lo Nebukadnesar ye, ɔi deg ɓujijoo kɨdɔmɨta gidaijoo. 30Ɓal kõɓe kɨ kõdɔjoo gidaimɨta lo Nebukadnesar ye, Nebujaradan, bɨradɔ ngéngomlog, ɔi Judag ɓutanãimɨta kɨ dɔsɔɔ gidaimi. Kɔr deg tube i dubsɔɔ kɨ ɓukɨbojidet.
Jojakin ngah kɔsɨgon Babilont
31Ɓal kaw ɓer kɨ kõdɔmɨta gidaitanaimɨta lo Jojakin, ngar kɨ Juda, kam naht kɨ kõkɨlah gidaijoo kɨ ndɔ kɨdɔ joo gidaimi lo nah'n non Ebil Merodak, ngar kɨ Babilon, kam ɓal kõɓet loa kɨdasa ye, ɔj kamkẽ Jojakin, ngar kɨ Juda, ɔrra dangait kɨtɨga. 32Ngar kɨ Babilon ela ta kɨ kamnda na ndah pong loa kɨ dõ tɔi pong lo ngarg ĩgɨn ĩn nat sia Babilon. 33Ad ɔrrɨn kub dangai ro Jojakint kɔ, na ada sa nya nat sen kɨ ndɔg tube'n Jojakin ndɨn kɨ dɔn dõ. 34Ndɔ kɨɗen ngar kɨ Babilon oo goa kɨ nyaɓetro mbã ndo koia kɨ kaglo tube'n Jojakin ndɨn kɨ dɔn dõ.
Currently Selected:
Jeremi 52: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
