Jeremi 51
51
Bɨraɓe nda Babilon ɔja
1Titbe takel Bɨraɓe.
Oon, m'a m'la nel kɨ ngenuj nya
ndoorɨn Babilon
kɨ ngendɨ dɔning Kalde.
2M'a m'la kɨ deg kɨ mbag
kad tuɓan ngéndɨ Babilont kɔ
kɨtakad tirɨn nyag
ad nya mad goto dɔningt loa,
kɨta a ɗen ko lo tube kad ndoorɨna
Ndɔt'n non i ndɔ kamkɔlt.
A gugɨn dɔa kɨ log tube
3Ad ngekur kɨrã nda kɨrã dɔ gãt al,
ad ngéɗɔɔ ɗan dõ
kɨ kubɗɔɔ hand rodt al.
Ot nyan basag lod,
i nujɨn ngéɗɔɔg loa tube.
4Ad kɨdeg'n non son,
ɔin kam dɔning Kaldet
kɨ ngengah dó loa
dɔ ɗobgt kɨ Babilon,
5kɨta Israel kɨ Juda,
Luwah lod nyad kɔ al,
ad i Bɨraɓe Ngekoosɨg,
na dɔning lo Kaldeag
ɗoosɨ kɨ nyaɗa kɨmajal
kɨ ndoor Ngekunjɗang lo Israel.
6Ãin na ko kam Babilont kad
dekɨɗen aj ron
na ɓeta i nujɨn kɔ kam ndakɔjt loa
kɨta i kaglo ndangɨra lo Bɨraɓe,
a baa kɨgo kɨlaɗaat.
7Babilon i kop nar ɔr kam ji Bɨraɓet
ɗa ngéndɨ dɔningt tube kasɨt.
Girrdeg ãin kasɨnduu loa
ad teld ɓoodt.
8Tentenbe Babilon so, tet ɗelɗel,
i udɨn ɓi kɨtaa,
unɨn kɨ'n baume kɨ to dó loa
ke maja a yoota wan.
9Jĩ kɨ ge kad Babilon yoot
na yoot al.
Nyana, ad j'awɨn,
dekɨɗen tel kɨ dɔningt lon.
Kɨta takɨgang loa aw mbã dɔrãt,
unɨn na mbã kɨ kilndiit.
10Bɨraɓe tee dɔ nyaɗaj
kɨdenesew kɨtɨga wang,
i ɗen ad j'ɔrrɨn hoi kɨla lo Bɨraɓe
Luwah loj kam Siõt.
11Ɔlɨn ta kɨɗang, hɔn derg losɨ ngang,
Bɨraɓe sɔkɨ ndil ngarg kɨ Medɨ ndool
kɨta ndig nuj Babilon kɔ
kɨta i ndangɨra lo Bɨraɓe,
ndangɨra dɔ kujt loa kɨjaɓat.
12I lan drapo dõ
kad ndogbɔrrt kɨ Babilon
ad ngengomdɔɓe ndɨn dɔgt,
ndan ngengomlog,
i ndan ngekumlog,
kɨta Bɨraɓe ɔj ta ɗa na tɔlkon
nya'n el dɔ ngendɨ Babilont.
13Ĩn kɨ ngendɨ kad man koosɨgt,
ɓebo kɨ ngengah nyamajg kɨngãi,
ndɔi asɨ woi,
kɨlaɗai kɨlo ngetɔgt tɨga.
14Bɨraɓe Ngekoosɨg nda yo kɨdɔnt an:
Rota, m'a m'ɗoosɨ kami
kɨ deg tit kɨbetg be,
a gan tad kɨ ko tetɗɔɔ kɨdɔit.
15Ndah dɔning kɨ tɔg lon,
nda dunia kɨtakul terr lon,
la pal dɔrã kɨta goosɨ lon.
16Lon elta kɨ ndin a ne,
man ko huhu kam dɔrãt dõ,
ad kilndii ɓai dɔngoi dɔningt,
a tee kɨ telndiig kɨta ndii kɨked
a ɓai kɨ nel kɨ la
ko longomdɔnyagt lon tɔ.
17Dekɨɗen i tit dan
kɨ goosɨ loa goto be,
kɔd pel nar ɔr kɨɗen i kɨ rosɔl
kɨta ɓakumta nyag kɨtɔsɨ lon
kɨta yog loa ĩn nyag kɨngom,
ko kɨ ta goto kamdt.
18Ĩn nyag kɨpãbe, ĩn nya gool,
a nujɨn ko lon ndakɔj ɗe.
19Na Luwah lo Jakob i titd al
kɨta ĩla ndah nyag tube ye
na Israel i nyakagɓe loa,
tɔa i Bɨraɓe Ngekoosɨg.
20Ah Babilon,
kete in marto lom, ĩ nyaɗɔɔ
kɨtakuli la m'tet girrdeg kɨ dang dang,
kɨtakuli tɔ la m'nujɨn kõɓeg.
21Kɨtakuli la m'tet'n sɨnda
kɨ ngekala ɗelɗel
kɨtakuli la m'tet'n pusɨɗɔɔ
kɨ ngendɨ kamt tu.
22Kɨtakuli la m'tetɨn dekɨdɨngã kɨ dekɨdẽ,
kɨtakuli tɔ la m'tetɨn bɨga kɨ ngon
kɨtakuli la m'tet'n basa kɨ ngomand.
23Kɨtakuli la m'tetɨn
ngéngombatg kɨ ɓut loa,
kɨtakuli la m'tetɨn
ngendɔɔ kɨ mangg loa,
kɨtakuli la m'tetɨn
ngekõɓeg kɨ mbaiɓeg ye.
Babilon tel gotɓe
24M'a m'ba Babilon kɨ ngendɨ
Kaldet tube kɨta nyag kɨmajal tube
ĩn ɗa takumsɨt Siõ.
Titbe la i takel Bɨraɓe ye.
25Oo, m'ɔsi ta, ĩ
mbalbo ngenuj nya.
Titbe la i takel Bɨraɓe ye.
In ngenuj dɔning kɨtaagbe.
M'a m'nda jim dɔit, m'a m'ɔsɨ
m'lai dɔ mbalt kɨber,
m'a mad i tel mbal kɨ horr õa.
26Deg a ɔrrɨn mbal mad kamit kad
ndan ne dɔkum kuj al,
ke kad ndan ne girr kuj mad,
kɨta a i tel gootɓe mbãkɨnõt,
titbe takel Bɨraɓe.
27Lan drapo kɨdɔ dɔningt'n non,
kunɨn tow ku girrdegt kɨ dang dang,
ad girrdeg ɗan rod kɨta ɗɔɔ sia.
Kunɨn kõɓeg kɨ Ararat kɨ Mĩni
kɨ Askenaj kad ndoorɨna.
I ndan bɨradɔ dɔ ngéɗɔɔt kad ro sia.
Adɨn sɨndag kɨ bindɨ ɓai misisi
awɨn dɔdt tit kɨbetg be.
28Oon go girrdeg kɨ dang dang
kɨ ngarg kɨ Medɨ kad ɗɔɔ
ngekõɓeg loa kɨ mbaiɓeg loa tube
kɨ dɔning kɨɗen in i girr tɔgt lod.
29Dɔning yee,
yee yɨkɨtyɨkɨt kɨta Bɨraɓe
ndɨ tɔlkon kɔjtaɗa lon kɨdɔ Babilont,
ndɨ ad dɔning tel gootɓe
kɨ ngendɨt goto.
30Gõɗɔɔg kɨ Babilon nyan taaɗɔ.
Ndɨ kam kujgt kɨngang, tɔgd goto,
ĩn tit dekɨdẽg be.
Lan horr kujg lod, tetɨn hand tabitg.
31Ngékãi ngɔd ngahna, ngombangkɨlag
ndɔdɨn na kad ɔrrɨn hoia ngar kɨ Babilon,
anan: Taan ɓebo loa kɔtko kɨɗen.
32Tan lo gang bah,
lan horr mũ kɨdɨlambot
na ɗɔɔ ngéɗɔɔg oi siw.
33Titbe takel Bɨraɓe Ngekoosɨg,
Luwah lo Israel
Ngon kɨdẽ kɨ Babilon a i tit
gar ndah nyako dɔnah ɓalt, nãi
ndo al kaglo ja nyako a ɗe dɔat.
34Nebukadnesar,
ngar kɨ Babilon,
lam yalɨm, nujɨm,
telɨm tit jo kɨ kam kari be,
urɨm tit mar be,
ɗoosɨ kamɨn kɨ nya majg lom,
tuɓam kɔ.
35Ngéndɨ Siõ elɨn anan:
Ad nya ɗa kɨlo ngetɔgt in ɗan sem
kɨ noojɨmg so dɔ Babilont gog.
Jerusalem el an:
Ad mosɨm so dɔ ngendɨ Kaldet.
36Kɨtɔ 'nten,
titbe takel Bɨraɓe:
Oo, m'a m'ɗa sei,
m'a m'nda ngɨra dɔit.
M'a mad bahbo kɨ Babilon yii,
m'a mad man kɨɓa loa yi ndã.
37Babilon a tel gotɓe,
a tel londɨ talg,
a i nya kɨtuj kɨ nya godɔt,
de a ndit gog al ta.
38Deg loa a kon nat kɨɗabe
tit'n tubog be, a ndangɨn nya
tit ngan tubog be ho.
39Lon kamd tɨngabil
m'a m'ad'd nyakãi
m'a mad kasɨ ɗad
kad ɗan ronel kɨnõbe,
kamla a bin ɓi kɨkanj ndool.
Titbe la i takel Bɨraɓe ye.
40M'a m'aw sed lo tɔlt
tit ngan batg,
tit bal batg kɨ bal bĩãg.
41Titbãi tan Babilon.
Taan ɓebo'n deg tube
kɨdɔningt ɔsɨn gona.
Babilon i nya kɨtuj ku girrdegt.
42Bahbo ɓai tiw dɔ Babilon
ad hulman ut dɔa.
43Ɓebog loa telɨn gotɓe,
dɔning tut kurum,
tel dɨlalo, i dɔning'n de ndit al,
de mad a tɔit al tɔ.
44M'a m'nda m'ɔj
yo Bel kam Babilont,
m'a m'ɔrr nya'n la tant
na girrdeg a awɨn roat gog al,
tabit kɨ Babilon so woi.
45Deg lom, i teen kamat kɔ,
ad dekɨɗen aj ron ta wongt kɨ
tɨngabil lo Bɨraɓe.
46Ot kadɨn kamsɨ gang man,
ot ɓoolɨn kɨta hoita
kɨ oon kam dɔningt,
kɨta ɓal'n ɗan hoita a ɗe
na bal kɨɗang hoita mad a ɗe tɔ.
Nyaɗa kɨlo ngetɔgt
a õɓe dɔningt,
ngekõɓe mad
a ɓai ndoori ngekõɓe mad.
47Kɨtɔ 'nten, oon ndog ndɨ ɗen lon
m'a m'nda m'ɔj yog kɨ Babilon,
dɔning loa kɨtaagbe a i kɨ rosɔl,
ngékoig loa tube a son kamat.
48Kamla dɔrã kɨ dɔning
kɨ nyag kɨ kamdt
a ɔsɨn pa ronel dɔ Babilont
kɨ to ngenuja ɓain,
son dɔat ko jigelt.
Titbe la i takel Bɨraɓe ye.
49Kari na Babilon
a so kɨta kɨtalg lo Israel,
tit'n Babilon ad kɨtalg son
kam dɔningt kɨtaagbe ye.
50Ĩgɨn hã ajɨn ta kiyaɗɔɔt ye,
awɨn, ot duban.
I gan kamsɨ dɔ Bɨraɓet lon
ĩn kam dɔningt kɨsãi,
i gan kamsɨ do Jerusalemt tɔ.
51Jĩ kɨ rosɔl lon j'oo dɔ
nyataj ho ho,
kɨ la takumj kɨber kɨta mbahg
andɨn kam lot kɨjaɓat
kam kujt lo Bɨraɓe.
52Kɨtɔ 'nten, oon, ndog ndɨ ɗen nõ.
Titbe la i takel Bɨraɓe ye.
Lon m'a m'nda m'ɔj yog loa
na kam dɔningt loa tube
deg'n ngahn dɔ a tõ ɗusɨɗusɨ.
53Ke Babilon aw mbã kɨ dɔrãt,
ɗa londɨn kɨngang kɨ dõ kaa ne,
m'a m'la ngenuj kad tujɨna,
Titbe takel Bɨraɓe.
54Oon dɔ ndi nõ ko Babilont
kɨ nujkɔ kɨbobe kam dɔning Kaldet
55kɨta Bɨraɓe ndɨ tuj Babilon
ad ndita kɨbobe goto kamat
kah ngenuj nyako tit kah man kɨ bobe.
56Ã ngenuj nya so dɔat,
so dɔ Babilont
hɔn ngéɗɔɔ kɨ Babilon,
tetɨn gã kɨrãg lod
kɨta Bɨraɓe Luwah i ngebaji de
kɨɗen kɨ asɨ ta kɨlaɗaa.
57M'a mad kasɨ ɗa mbaiɓeg loa
kɨ ngeterr loa
kɨ ngékõɓe loa kɨ kɨbog loa
kɨ gõɗɔɔg loa
kad ɓin ɓi kɨkanj ndool,
a ɓain gog al,
kel Ngar in tɔa
i Bɨraɓe Ngekoosɨg.
58Titbe takel Bɨraɓe Ngekoosɨg:
Tabit kɨ Babilon kɨtat ngãi nõ a tet,
tabitag kɨ ngal, horr a õd,
titbe kɨla in deg ɗan i kari kɨ ndang,
girrdeg ɔrrɨn rɔkɨ na horr oon kɨla lod.
Maktub kɨndang lo Jeremi
59'Nten la i mberkɨnda'n Jeremi,
ngekelta kɨta Luwaht,
nda mbera Seraja ngon Nerija,
ngon Maaseja,
lon awɨn Babilont
nat kɨ Sedekias
ngar kɨ Juda,
ɓal kõɓe kɨkõsɔɔ lo Sedekias.
Seraya i ngekoogo nyag lo ngar.
60Jeremi ndang ta nyakɨto
tube'n a so dɔ Babilont kam maktubt,
lot'n non tube'n ndang
dan ne dɔ Babilon.
61Jeremi el Seraya an:
Lon a i tee Babilont a ne,
oo go roi maj
kad i tɨda tag 'nten tube;
62a i el an: Bɨraɓe,
Ĩ la elta
dɔ lot'n ɗan tɔ wakɨsɨ an:
A nuj kad de dan kaa a
ndit al na kɨ tel gootɓe kɨnõt.
63Lon i tɨda ta kɨ maktubt 'nten tɨga a ne,
un mbal mad,
i dɔa kɨ kɨla, laa kam bah
Eprat't na el an:
64Titbe tɔ la Babilon
a un yudum girr mant,
a ɓai dõ gog al
kɨta nyakɨto'n m'ndɨ m'ɗen dɔat.
Tag 'nten tube ĩn tag lo Jeremi.
Currently Selected:
Jeremi 51: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
