Jeremi 50
50
Takɨgang lo Bɨraɓe dɔ Babilont
1Ta'n Bɨraɓe el kɨta Jeremi, ngekelta kɨtant, dan dɔ Babilon kɨ dɔning lo Kaldeag.
2Elɨn taa kɨ girrdegt kɨ dang dang,
i lan mbera. Lan drapo dõ,
i lan mbera na ot ɓɔn dɔ.
Elɨn anan:
Taan Babilon woi.
Yo Bel i kɨ rosɔl,
yo Merodak i kɨ tet ɗelɗel.
Yog loa ĩn kɨ rosɔl,
yog loa ĩn kɨ tet kɔ.
3Kɨtɔ girrdeg mad ndɨ ɓai ko jigel,
ɗe kad n'ɗɔɔ sia, a ad dɔning loa tel
gootɓe kɨ de gotot.
Deg kɨ dãg ndɨ ãin na kɔ, awɨn.
4Kam ndɔgt'n non
kɨ kaglot'n non.
Titbe la i takel Bɨraɓe ye.
Israelag kɨ Judag a tel ɗen nat,
a ndian kɨ nõ kumdt,
a sahn go Bɨraɓe Luwah lod.
5A ndɨjen ɗob kaw Siõ, a telɨn ta
kumd kɨdɔat, anan: I ɗen, ad kɨ
ndan roj nat kɨ Bɨraɓe kɨ kunkɔ kɨ
tokɨnõt kad kam de a oi dɔ al bat.
6Deg lom ĩn ɓut batg kɨnãi, nge
ngomd land mut ad ndomɨn
dɔ mbalbogt kɨ log papa.
Awɨn dɔ mbalbogt kɨ doorlog?
Kamd oi dɔ lo ɗad.
7Deg tube'n ngahnd a sand
balang na madngétad elɨn anan:
Jĩ kɨ ɗa majal al kɨta Israel ɗa majal
ndoorɨn Bɨraɓe'n i londɨ denesew,
Bɨraɓe in i nya ndahkamdɔt lo bɔwdg;
8Ãin na kɔ kam Babilont,
i teen kɔ dɔning Kaldet
kad ĩn tit'n bal bĩãg dɔ ɓut't be.
9Kɨtɔ oon m'a m'ɓai
kɨ girrdeg koosɨg ko dɔningt
kɨjigel kad awɨn ɗɔɔ dɔ Babilont
na a tetɨna ɗɔɔ.
Kɨrãg lod ĩn tit de kɨ ngegoosɨ ɗɔɔ
ĩn a tel jin kari al be.
10Kaldeag a ĩn nyatetɗɔɔ,
tube'n a turɨnd pur ye,
a ĩn ngenyamajg.
Titbe la i takel Bɨraɓe ye.
11Ã i ɗan ronel, i ndomɨn kɨ kamnda
ĩn ngetirr nyakagɓe lom.
I ɓain kɨdɨtalg tit mand mang
dɔ mut kɨmbool,
i ndilɨn tit sɨndag kɨngang.
12Kõsɨ i kɨ dɔ kɨlaɓer,
ngekoojsɨ aw kɨ takum kɨrosɔl,
oon, ndana gog go gɨrdegt tube,
tel dakɔr kɨ man gotot, tut kurum.
13De a ndɨt al kɨta wong lo Bɨraɓe,
a tel gotɓe kɨtaagbe.
Deg kɨ ngetɔi kad Babilont,
ta a yad biw,
a gan kɔl kamkɔl kɨta yokoosɨ loa.
14I ɗan rosɨ kad i ɗɔɔ kɨ Babilon,
i lan na gugɨn dɔa
ĩn tube ngenda kɨrã dɔ gãt.
I urrɨna kɨrã, ot nyan ta kur kɨrã
kɨta ɗa majal ndoorɨn Bɨraɓe.
15I kon kɨ log tube
I udɨn wi kɨta ɗɔɔ kɨ madngétag,
girr kujg loa tetɨn, ndogbɔrr loa so,
kɨta i ndangɨra lo Bɨraɓe'n nda
ngɨra losɨ dɔat.
I ɗan sia tit'n ɗan ho
16I tɔlɨn dekɨɗen
kɨ ngeduw nya kam Babilont
kɨ de'n ho ngorong jint kaglo ja nyako.
Dekɨɗen a tel kɨro degt lon,
Dekɨɗen a ãi kɨ dɔningt lon
kɨta kiyaɗɔɔ lo ngenuj nya.
Israel a tel kam dɔningt lon gog
17Israel i bat kɨnãi in tubog tuɓana.
Dasabang ngar kɨ Asiri laa yalɨm, gog got Nebukadnesar, ngar kɨ Babilon, tet kɨngaag. 18Kɨtɔ 'nten Bɨraɓe Ngekoosɨg, Luwah lo Israel, elɨn an: Oon, m'a m'nda m'ɔj ngar kɨ Babilon kɨ dɔning loa tit'n m'nda m'ɔjɨn ngar kɨ Asiri ye be.
19M'a m'tel kɨ Israel kɨ londiat gog
kad ngah nyasan Karmelt
kɨ Basan kɨ ngah nyasa kɨto mbuj
dɔning mbalt lo Epraim
kɨ kam Galaadt.
20Kam ndɔt'n non
kɨ kaglot'n non tɔ, takel Bɨraɓe,
deg a sahn nyaɗa kɨ gootal lo Israel
na a ngahn majal loa al,
a sahn majal lo Juda tɔ,
na a ngahn al bat,
kɨta m'a m'nyago majal lo ndeg deg
m'nyad kɨ dɔd dõ.
21Awɨn dɔning Merataim, i ɗɔɔn sia,
i ɗɔɔ kɨ ngendɨ Pekod, i tuɓan god,
i tɔlɨnd, i tɔɔn kohd kɨtaagbe,
I telɨn rosɨ go mberkɨndagt lom tube
titbe la i takelɨm mĩ Bɨraɓe,
i ɗan nyag tube'n m'ndasɨ mbera.
22Oon dɔ kah ro ko ɓirɓit
kam dɔningt nujkɔ i kɨbobe.
23Ɗi kɨ be, marto ndah dɔning
kɨtaagbe i kɨ tɔɔ,
i kɨ tet ɗelɗel.
Titbãi Babilon tel nyakootɓool
ku girrdegt.
24Ah Babilon, m'ya gum kɨtɔi
na gum huri yedeng,
kanj kad i ger m'ngãi, na m'hɔi,
kɨta i ɗɔɔ i ndoorɨn Bɨraɓe.
25Bɨraɓe tee kujngomd nyakatg lon
na ɔrr nyakat wong lon kɨtɨga,
kɨta Bɨraɓe Luwah
Ngekoosɨg aw kɨ kɨla
kɨta ɗa kam dɔning Kaldet.
26I ɗen kɨ lo kɨɗen, i ron kɨ Babilon
i teen ta damg loa,
i kawɨna kɨdɔ nat tit nyako,
i nujɨna kɨtaagbe
kad ndega nãi al.
27I tɔlɨn bɔw mangg loa tube ad
awɨn sed lo tɔlt
Beto lod kɨta ndɔ lod asɨ woi
ndɔt'n m'a m'ɗe kad m'bajid.
28Oon dɔ ko ngekãig kɨ deg'n
ãin ko dɔning Babilon
kɨta kɔrr hoia kam Siõt,
ndangɨra lo Bɨraɓe Luwah loj,
ndangɨra dɔ kujt loa kɨjaɓat.
29I kunɨn deg ngekur kɨrãng
tube kad kawɨn'na, ron kɨ Babilon.
I lan gong gugɨn dɔa kɨtakad de tee al.
I ban jia asɨ kɨgo kɨlaɗaat,
i ɗan sia tit'n ɗan kɨta un dɔn kɨ dõ
kɨ burokɨga ndoorɨn Bɨraɓe,
ndoor Ngekunjɗang lo Israel.
30Kɨtɔ 'nten basag loa a tuson dɔ ɗobt na deg loa kɨ ngéɗɔɔ tube a nujɨn ndɔt'n non.
Titbe la i takel Bɨraɓe ye.
31Oo, ĩ, ngedɔngang,
m'ɔsi takel Bɨraɓe Luwah Ngekoosɨg
Tajigla taa ne, ndɔi asɨ woi,
i kaglo ndakɔj kɨtatɔi.
32Ngedɔngang a ga njan gigt,
na tee so
na de kɨ kad una kɨ dõ goto,
m'a m'la horr dɔ ɓebogt loa
na a oon log kɨ gug dɔa tube.
33Titbe takel Bɨraɓe Ngekoosɨg:
Israelag kɨ Judag tube, dan kumd ndo,
deg hɔnd awɨn sed ɓert ye,
hɔnd bá, na mbetɨn nyad dõ,
34na ngendangɨrra lod i ngetɔg,
tɔa i Bɨraɓe Ngekoosɨg.
A ɗɔɔ kɨtatɔd jeje
kɨtakad dɔning to kɨ lapia
kɨ n'ad ɓool ɗa ngéndɨ Babilon.
Babilon a i kɨtuj mbãkɨnõt
35Kiyaɗɔɔ ndoor Kaldeag,
titbe takel Bɨraɓe.
Ndoori ngendɨ Babilon kɨ
mbaiɓeg loa kɨ ngéterr loa.
36Kiyaɗɔɔ ndoorɨn ngendõte
kad ĩn tit ɓood deg.
Kiyaɗɔɔ ndoor gõɗɔɔg loa
kad ɓool ɗad.
37Kiyaɗɔɔ ndoor sɨndag loa
kɨ pusɨɗɔɔg loa
ndoor deg kɨdandang
ĩgɨn ndɨ kamat
kad telɨn tit dekɨdẽg.
Kiyaɗɔɔ ndoor nyamajg loa
kad tirrd pur.
38Ndɨ hɔ la, man yii ad lo tut kurum
kɨta i dɔning'n ɗoosɨ kɨ yog
deg'n non ĩn ɓoodg kɨta yog lod.
39Kɨtɔ 'nten la dãg kɨmut kɨ talg
a ndɨnt, bulum a hɔn londɨd tit. De a
ndɨ Babilon gog al, de a hɔlondɨt
al mbã kohgt lo kohg.
40Tit'n Sodom kɨ Gomor kɨ ɓebog
kɨ nderbe sed ĩgɨn Luwah nujd.
Titbe la i takel Bɨraɓe ye.
De mad a ndit al,
de kɨ a ho londɨt goto.
41Girrdeg mad ndɨ ɗe ko jigel,
i girrdeg kɨbo kɨ ngarg kɨ ngetɔg,
ndɨ ɓain ko dɔngoi dɔning.
42Ton gã kɨrã kɨ ninga,
ĩn ngeɗatakõ kanj kookumtondo.
Ndid ko tit bahbo be,
alɨn dɔ sɨndagt ɗan rod woi
kad ɗɔɔ tit de kɨ kɨɗabe,
awɨn ro dɔit, in ɓebo Babilon.
43Ngar kɨ Babilon oo hoia
na jia oi yelel
kamkɔl ɗaa tit dekɨdẽ
in tokooj ndii toa be.
44Oon, madngéta ndɨ ɓai kad bah Jurdẽt
tit tubo be kad n'ɗɔɔ kɨ londɨ kɨngang.
M'a m'tuɓad kɔ tentenbe
m'a m'nda de'n m'kɔta kad õɓe dɔat.
Kɨtɔ nõ i tit mĩ a?
Nõ ɗa tɔg kaw sem lo gangtat a?
Ngengombatg kɨ ɗah a ɗà nomt a?
45Kɨtɔ 'nten, oon dɔ kɔjtaɗa lo Bɨraɓe
ĩn ɔj kɨdɔ Babilont kɨ takɨjkɔj'n ɔj
dɔ dɔning lo Kaldeag.
Rota, a ɔrrɨnd lo tɔlt tit bat kɨ tɔga goto be;
rota, a nujɨn kɨ londɨd kɔ.
46Dɔning yee lon oo hoi ta kɨ taan Babilon,
oon dɔ kah ko ku girrdegt.
Currently Selected:
Jeremi 50: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
