Jeremi 49
49
1Ta kɨdɔ Amoniagt. Titbe takel Bɨraɓe: Israel aw kɨ ngan kɨdɨngãg ale?
Ngekõndubaa goto oo?
Be kaa, kɨtɔɗi Milkom oon nduba Gad
na deg loa ndin ɓebogt loa a?
2Kɨtɔ 'nten,
oon, ndɔg ndɨ ɗen nõ,
takel Bɨraɓe
lon m'a mad oon kah ɗɔɔ kɨdɔ Rabat,
ɓebo lo Amoniag.
A tel gotɓe kɨkaw kɨnat kɨtuj
na horr a õ ɓeg kɨ gugɨn dɔa,
kamla Israel a taa dɔning lo ĩgɨn
taan dɔning loa kete.
Titbe la i takel Bɨraɓe ye.
3Ĩn deg kɨ Hesbon,
i nõ kɨ tõ ɗusɨɗusɨ kɨta
Kɨtɔ ɓebo kɨ Ai i kɨ nuj kɔ.
I kon, ĩn ngan kɨdẽ kɨ Rabat,
i lan ngisɨ kub rosɨt, udɨn ɓi,
i ãin ko ne,
ko nu, dɔ ndogbɔrrt kɨ ngal
kɨta Milkom a aw ɓer
nat kɨ ngejanyamosɨ loa
kɨ mbaiɓeg loa.
4Kɨtɔɗi i ndɨ ga buro dɔ hollogt loi a?
In ngon kɨdẽ kɨ ngétaaɗɔɔ in ɓa
kul nyamajg lon an:
Nõ a ɗe ro sem a?
5Oon, m'a mad nya kɨkootɓool ɗe dɔit.
Titbe i takel Bɨraɓe Luwah Ngekoosɨg.
A ɗe ko kam logt tube kɨ gugɨn dɔ.
Rota, a tuɓan dekɨɗen kusɨt kɔ,
de kɨɗa kɨ a nãi
kad kaw ngekãig kɨnat goto.
6Gog go nyat 'nten
m'a m'ɔrr Amoniag kam ɓert,
Titbe takel Bɨraɓe.
Takɨgang lo Bɨraɓe kɨdɔ Edomt
7Ta kɨdɔ Edomt Titbe takel Bɨraɓe Ngekoosɨg:
Terr goto kam Temant a?
Goosɨ lo ngekɔjta goto a?
Terr lod goto oo?
8Ãin na, i turɨn gidsɨ,
i yan rosɨ bulombalgt,
ĩn ngendɨ ɓebot kɨ Dedan kɨta
m'a mad nyakɨto so dɔ Esawt
kaglo ndakɔjt loa.
9Ĩla ngeja kand nduu ɗen roit ye
a nyan ndeg kand nduu kad burɨn ale?
Ĩla ngeɓoog ɗen kondɔ ye
a oin nya kɨ asɨ tad ale?
10Na mĩ, m'a m'tir nyag lo Esaw pur.
Mad loyaro loa to kɨtɨga do,
a asɨ yaron al.
Ngana kɨ ngankõa kɨ madɓeag
a nujɨn ko ad goton.
11I nya nganhalg loi,
m'a m'ngomd kumkajir,
ad ngengawkoig loi ɓah kulɨm.
12Kɨtɔ titbe kel Bɨraɓe: Oon, ĩgɨn
sumba kad ãin
kam kopt al ye, kari
na a ãin. Na in,
a i ndɨ kɨkanj takɨgang a?
A i ndɨ anj takɨgang
al kari na a ãi.
13Kɨtɔ Bɨraɓe el an: M'nda yo kɨdɔmt mĩ kɨɓe, Bosra i nya kɨtuj kɨ nya kɨrosɔl. Ɓebog loa tube a telɨn gootɓe mbãkɨnõt.
14M'oo hoita mad kokɨro Bɨraɓet,
an ngombangkɨla ku girrdegt, an:
kawɨn'na, awɨn ro dɔ Edomt,
ɓain dõ kɨta ɗɔɔ.
15Kɨtɔ Edom i oo maj ndɨ m'teli kɨdut
ku girrdegt kɨ dang dang
kad ĩn nyakid kɨro degt.
16Dɔngang loi kɨ hitro goolɨn
ad kɨ ngarkamit ud kam mut,
in ngendɨ mbɨna mbalgt,
in ngendɨ tasom mbalbogt.
Lon i la ngo loi dõ tit kuro be kaa
m'a m'ɔsɨ m'lai ber.
Titbe la i takel Bɨraɓe ye.
17Edom a tel nya kɨtuj. Tubeg'n a tɔin kadat ye, ta a yad biw a kɔrr ngol, lon oon tuj kɨ tee dɔ ɓebot'n ɗan. 18Tit kɨ Sodom kɨ Gomor kɨ ɓebog kɨnderbe sed ĩgɨn nujɨn, kel Bɨraɓe, de mad a ndit al, de kɨ a hɔlondɨt goto.
19Oon madngéta ndɨ ɓai
kad bah Jurdẽt
tit tubo be
kad n'ɗɔɔ kɨ londɨ kɨngang
kɨta m'a m'tuɓa deg kɨ Edom kɔ
tentenbe londɨdt,
m'a m'nda de'n
m'kɔta kad õɓe dɔat.
Kɨtɔ nõ i tit mĩ a?
Nõ asɨ kaw sem lo gangtat a?
Ngengombatg kɨ ɗah
a ɗa nomt a?
20Kɨtɔ 'nten, oon dɔ kɔjtaɗa
lo Bɨraɓe'n ɔj kɨdɔ Edomt
kɨ takɨkɔj in ɔj dɔ ngéndɨ Temant.
Rota, a ɔrrɨnd lo tɔlt
tit bat kɨ tɔga goto be.
Rota, a nujɨn londɨd kɔ.
21Dɔning yee lon oon kah sod,
deg oon dɔ ndɨ ko
lod mbã bahbot kɨkɨre.
22Oon, madngéta ɓai kɨ bɔgɨn tit kuro be, tĩn bɔgɨn dɔ Bosrat. Ndɔt'n non kam gõɗɔɔg kɨ Edom a i tit kam dekɨdẽ in to kooj ndɨ ɗaa be.
Takɨgang lo Bɨraɓe dɔ Damasɨt
23Ta kɨdɔ Damasɨt.
Hamat kɨ Arpad ĩn kɨ rosɔl
kɨta oon koita kɨmajal
ad rod oi yelel,
ndɨ yeen tit bahbo'n asɨ to lom
24Ro Damasɨ oi yelel,
tel ron kɨta kãi, ɓool ɗaa
daiyo kɨ kamkil hɔa
tit dekɨdẽ'n tokooj ndɨ toa be.
25Ah ɓebo kɨ tɔa ko,
ɓebo kɨ adɨm
ronel i kɨ nyako.
26Kɨtɔ 'nten basag loa a son ne dɔ ɗobgt, ngéɗɔɔ loa tube a nujɨn ndɔt'n non.
Titbe i takel Bɨraɓe Ngekoosɨg.
27M'a m'la horr ndogbɔrr kɨ Damasɨ nam horra a õ kuj kõɓeg lo Ben Hadad.
Takɨgang lo Bɨraɓe dɔ Kedart
28Ta kɨdɔ dɔning Kedar kɨ kõɓeg lo Hasor in Nebukadnesar, ngar kɨ Babilon, teta ɗɔɔ. Titbe takel Bɨraɓe: Ɓain dõ, awɨn ɗɔɔn kɨ Kedar, i tɔlɨn deg kɨloɓakàdt.
29A ɔin kujkubg lod kɨ nyakulg lod,
kubganglo lod kɨ nyag lod
tube kɨ lukumg lod.
A kon kɨ ndid kɨbobe, anan:
Nya kootɓool i kɔtko joo.
30Ãin na ĩn ngendɨ Hasor,
i sahn loyaro tadang.
Titbe la i takel Bɨraɓe ye.
Kɨta Nebukadnesar, ngar kɨ Babilon,
ɔj ta kɨ ndoorsɨn kɨ kɔjtaɗa kɨdɔsɨt.
31I ɓain dõ, awɨn ɗɔɔn kɨ girrdeg
in ndɨ lom kɨ lapia londɨnt.
Titbe la i takel Bɨraɓe ye.
Tabita ke kand kut taa goto,
ndɨ kɨ kɨɗanbe.
32Lukumg lod a ĩn nyatetɗɔɔ,
koosɨ nyakulg lod a in nyahɔ.
Ĩgɨn jan ta mbaitad,
m'a m'tɨnda m'tĩd kɨgo nélt kɨɗen,
m'a m'ɗe kɨ nujkɔ dɔdt kɔtko kɨɗen,
Titbe takel Bɨraɓe.
33Hasor a tel londɨ talg,
a tel gootɓe mbãkɨnõt,
de mad kɨ ndit goto,
ngehɔlondɨt goto ho.
Takɨgang lo Bɨraɓe dɔ Elamt
34Ta lo Bɨraɓe'n ɗe ro Jeremit,
ngekelta kɨta Luwaht, dɔ Elam, mba
girr kõɓe lo Sedekias, ngar kɨ Juda.
35Titbe takel Bɨraɓe Ngekoosɨg:
Oo, m'a m'tet gan kɨɗan lo Elam,
ad i tɔga kɨbobe.
36M'a mad nel kɨsɔɔ dɔ
kumlot kɨsɔɔ ɗen dɔ Elamt, m'a
m'tɨnda m'tĩd kɨgo nélgt'n non tube,
girrdeg mad in Elam ãi awt al goto.
37M'a mad ngendɨ Elam ndadɨn nõ
madngétadt kɨ nõ degt kɨ ngesah tɔld.
M'a mad nyakɨto so dɔdt
kɨ wong lom kɨtɨngabil,
Titbe takel Bɨraɓe.
M'a mad nyakat tuɓa god
mbã kiyaɗɔɔ m'a m'tɨgad.
38M'a m'nda pong
kõɓe lom kam Elamt,
m'a m'nuj ngar kɨ mbaiɓeg lod ko,
titbe takel Bɨraɓe.
39Na kam ndɔgt kɨdɔboit
m'a m'ɔrr Elam kam ɓert,
titbe takel Bɨraɓe.
Currently Selected:
Jeremi 49: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
