Jeremi 48
48
Takɨgang lo Bɨraɓe kɨdɔ Moabt
1Takel Bɨraɓe dan dɔ Moab. Titbe takel Bɨraɓe Ngekoosɨg, Luwah lo Israel: Beto lo Nebo kɨta telɨna gootɓe, Kirjataim i kɨ rosɔl, tana woi. Misgab i kɨ rosɔl, i kɨtet kɨber.
2Tɔko lo Moab goto woi,
kam ɓet kɨ Hesbon gan kamd dɔ nujkɔt loa;
I ɗen ad kɨ tɔɔ kohd kɔ ku girrdegt
kad i girrdeg gog al ta.
Madmen, ĩ tɔ, a nujɨn,
nyakat a ndulo goi.
3Oon dɔ ndi nõ ko Horonaimt,
Tel gootɓe, ad i nujkɔ kɨbobe.
4Moab i kɨtet kɨber,
deg oon dɔ ndɨ nõn ngang.
5Unɨn ɗob kaw ɓebo Luhit kɨ ndo kɨ hɔ,
ndɨ kon nujkɔ
lot kɨɗisɨ kaw Horonaim.
6Ãin, ajɨn rosɨ
kad ĩn tit de kɨ danggtg
kam dɨlalot be.
7Moab tit'n i ɓan kul
kɨlaɗaig kɨ nyamajg loi,
na yo Kemos kaa ne tetɨn ɗɔɔ,
a hɔna awɨn sia ɓert
nat kɨ ngejanyamosɨ loa
kɨ mbaiɓeg loa.
8Ngenuj nya a and kam ɓebot kɨɗen,
ɓebo mad kɨ a nãi goto,
a nuj hollo,
dɨlalo tɔ a i kɨnuj tit'n Bɨraɓe elɨn.
9Adɨn Moab bɔg
kɨtakad a ɓain dõ
kɨta ɓebog loa
a telɨn gootɓe kɨ de gotot.
10Ndɔl i dɔ det'n
ɗa kɨla lo Bɨraɓe kɨ ngẽ,
ndɔl i dɔ det'n
ɔg nyakat lon kad ũ mosɨ kɔ.
11Moab ndɨ lom kɨ Basan nu
tit man nduu kɨ to lotont
na mbelɨna kam jot mad kɨ kɨmad al.
Aw ɓer al ad nela to lotont,
koota kɨmaj mbel al.
12Kɨtɔ 'nten, oo ndɔg ndɨ ɗen nõ. Titbe la i takel Bɨraɓe ye. Lon m'a m'la deg ngembelnya roat kad mbelɨna jot mad mbã nyan kama kari, kamla a tɔn joag kɔ. 13Ndɔt'n non Moab a i kɨ rosɔl kɨta Kemos tit'n ngékɨɓe lo Israel ĩn ne kɨ rosɔl kɨta Betel kɨ nyaɓakul lod.
14Ĩn deg kɨ Moabt,
Titbãi i elɨn anan:
Jĩ deg kɨ ngang,
jĩ gõɗɔɔg a?
15Ngenuj Moab kɨ ɓebog loa ɗe woi,
awɨn kɨ basag loa kɨkɔt lo tɔldt
kel Ngar in tɔa i Bɨraɓe Ngekoosɨg.
16Nãi, nderbe kad tuj ɗe dɔ Moabt,
kamkɔl loa ndɨ ɗe dɔat kanangbe.
17Udɨn ɓi kɨtatɔa ĩn tube'n gugɨn dɔa
ĩn tube kɨ i gerɨn tɔa, elɨn anan:
Titbãi kag kõɓe kɨngang tet a?
Kagtɔsɨ kɨmaj ngãi.
18Ngon kɨdẽ, ngendɨ Dibon,
i nya kɔsɨgon loi kɔ.
Ɗisɨ, i ndɨ dɔningt kɨtut kurum
kɨta ngenuj Moab aw dɔit,
a nuj kujngomdɔɓeg loi kɨ ngal.
19Deg ngéndɨ Aroer,
i ɗa kad ɗobt, i oo lo,
i ndɨje dekɨdɨngã ngekãi
kɨ kɨdeg kɨ nge tee,
an: Ɗi ɗa nya a?
20Moab i kɨ rosɔl kɨta tetɨna kɨber.
Udɨn wi kɨ ko,
ɔrrɨn hoia ta bah Arnõt,
anan: Moab i kɨtuj.
21Takɨgang so dɔ dɨlalot kɨdɔ mbalgt kɨ Holon, Yatsa kɨ Mkɨloat, 22Dibon, Nebo kɨ Bet Diblataim, 23Kirjataim, Bet Gamu kɨ Bet Meon, 24Kerijot, Bosra kɨ ɓebog tube kɨ dɔning Moabt kɨsãi kɨ kɨ nderbe.
25Tɔg Moab goto,
kõiɓe loa tuj mbukɨt.
Titbe la i takel Bɨraɓe ye.
26Adɨn kasɨ ɗaa kɨta tɔidɔ'n kɨ dõ ndoorɨn Bɨraɓe. Ad Moab ndur ron kam tomt lon mbã tel nya godɔt. 27Israel i nya godɔt kɨroit al e? Hɔna ku ngéɓoogt ad kaglot kɨɗen in i elta loa a ne, i bi dɔi a? 28Ĩn ngéndɨ Moab, i nyan ɓebog kɔ na awɨn,
ndɨn kam bulombalgt,
i ndɨn tit derr'n
ɗa kuj ton kam bulombalt.
29J'oo hoi dɔngang lo Moab,
gaburo loa kɨ taa kɨɓa kɨ dõ
dɔngang loa kɨ buro kɨga
kɨ kid kɨ ngarkamat.
30M'ger wong loa.
Titbe la i takel Bɨraɓe ye.
I nya kɨpãbe,
hitro loa i nya kɨkari kɨndang.
31Kɨtɔ 'nten m'a m'nõn kɨdɔ Moabt,
m'a m'ũd wi dɔ degt kɨ Moab tube,
m'a m'hɔndo kɨta deg kɨ Kir Heres.
32Ĩn dĩ nduu kɨ Sibma,
m'ndɨ m'nõn kɨdɔit
tɔi non kɨdɔ Jaejert,
bajii aw tɔi gid bahbo,
aw mbã ɔd bahbo kɨ Jaejer.
Ngenuj nya so dɔ kumnyat loi kɨ
kaw kɨnat dɔ ɓalndɔt.
33Ronel kɨ kamnda goto
ndɔɔt kɨ tee kɨ kand ngãi
kɨ kam dɔning Moabt,
mad man nduu tɨga kam lo ɓaat
a ɓan nduu lo ɓaat kɨ ronel al,
ko kɨ ronel goto na korro tã.
34Deg oon dɔ ndɨ nõ Hesbon mbã kɨ Eleale ad oon dɔ ndid mbã Jahas ko Soar mbã Horonaim kɨ Eglat Selisia kɨta man kɨ Nimrim yii ndã. 35Ngela kadkari dɔ dɨngɨr lot kɨ dõ kɨ ngela nõkag kɨkootmbĩ adɨn yog lod a goton dɔning Moabt.
Titbe la i takel Bɨraɓe ye.
36Kɨtɔ 'nten kamm ndɨ ko tit tow be dɔ Moabt na kamm ndɨ ko tit tow dɔ degt kɨ Kir Heres kɨta nyamajg lod kɨkaw kɨnat ĩn kɨnuj kɔ. 37Ngɨsen dɔ dekɨɗen, mbaita de kɨɗen i kɨ jakɔ, ĩn kɨ dó jidt tube kub hɔndo i ɓodt tube. 38Dõ dɔ kujgt kɨ Moab tube kɨ kam natlogt loa i non kɨ ɓi koon kɨta m'tɔ Moab kɔsɨkɔsɨ tit jo kɨ maja goto be.
Titbe la i takel Bɨraɓe ye.
39Titbãi i kɨ to kɔsɨkɔsɨ, titbãi ndɨ nõn. Moab tur gidɨn kɨ rosɔl, Moab tel nya godɔt kɨ nya kɨkootɓool kɨro degt tube'n gugɨn dɔa.
40Kɨtɔ titbe la i takel Bɨraɓe:
Oon, madngéta ɔrr bɔgɨn tit kuro be
kad tĩn bɔgɨn dɔ Moabt.
41Taan ɓebo kɨ Kɨrijot woi,
taan kujngomdɔɓeg kɨngang.
Ndɔt'n non kam gõɗɔɔg kɨ Moab
a i tit kam dekɨdẽ'n
tokooj ndɨ ɗaa be.
42A nujɨn Moab kɔ
kad tel girrdeg al
kɨta un dɔn kɨ dõ
ndoorɨn Bɨraɓe.
43Nya kɨkootɓool kɨ mbẽ kɨ gum ĩn nõit,
in ngendɨ Moab
Titbe la i takel Bɨraɓe ye.
44De'n ãi nõ nyat kɨkootɓool a ne,
a so kam mbent na de'n tee kam
mbent kɨtɨga a ne,
a so gumt kɨta mad bal ndakɔj ɗe
dɔ Moabt.
Titbe la i takel Bɨraɓe ye.
45Ngékãig duban ɗan ndil Hesbont
na tɔgd goto,
horr ndɨ tee kam Hesbont,
ndõhorr ndɨ tee dan Sihõt,
oon nusɨ dɔning Moab kɔtko kɨɗa
kɨ kɔtko mad
kɨ kahdɔ ngang ngetaaɗɔɔg.
46Moab, be to loi,
deg lo yo Kemos nujɨm
kɨta awɨn kɨ ngani kɨdɨngã
kɨ kɨdẽ ɓert.
47Kam ndɔgt kɨdɔboit m'a m'ɔrr
Moab kam ɓert.
Titbe la i takel Bɨraɓe ye.
'Nten la i takɨgang kɨdɔ Moabt ye.
Takɨgang lo Bɨraɓe kɨdɔ Amoniagt.
Currently Selected:
Jeremi 48: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
