Jeremi 46
46
Takɨgang lo Bɨraɓe kɨdɔ Ejipt't
1Ta lo Bɨraɓe'n ɗe ro Jeremi, ngekelta kɨta Luwaht, dan dɔ girrdeg kɨ dang dang.
2Ta kɨdɔ Ejipt: Ta kɨdɔ ngéɗɔɔ lo Paraõ Neko, ngar kɨ Ejipt'n i nderbe kɨ bah Eprat kɨ Karkemis, in ngar kɨ Babilon teta ɗɔɔ kam ɓalt kɨkõsɔɔ lo Jojakim ngon Josias, ngar kɨ Juda.
3I ɗan go der kɨdu kɨ kɨbo
na awɨn ɗɔɔ.
4I ndan sird gid sɨndagt,
i alɨn dɔt, ĩn ngékalsɨndag,
i lan tage dɔsɨt,
ɔlɨn ndɔ'n ningag losɨ, i lan parhand.
5Ɗi m'ndɨ m'oo a?
Ndɨ ɓoolɨn ad telɨn kɨgog.
Tetɨn gõɗɔɔg lod ad ãin na
kɨ kanj mbel god,
kɨngasa gad kɨ log tube.
Titbe la i takel Bɨraɓe ye.
6Ngekãi ngɔd ngãi kaa a ãi al,
gõɗɔɔ kaa a aj al.
Ko jigel ta bah Eprat't
gan njad gigt, son.
7Nõ ndɨ ɓai tit'n man bah Nil be,
tit bahg ĩgɨn mandii ndɨ nun kɨ tɔg a?
8Ejipt la ndɨ bai tit'n bah Nil,
tit bahg ĩgɨn mandii ndɨ nũ kɨ tɔg.
El an: M'a m'ɓai,
m'a m'ut takum dɔning tube,
m'a m'nuj ɓebog kɨ ngendɨt tu.
9Awɨn, ĩn sɨndag.
Ɔrrɨn ngɔd ĩn pusɨɗɔɔg. Ĩn kɨrãɗɔɔg,
i tee awɨn. Ĩn ngendɨ Etiopi kɨ Put,
ngeto der, ĩn deg kɨ Lud,
ngenda kɨrã dɔ gãt.
10I ndɔ lo Bɨraɓe Luwah Ngekoosɨg
i ndɔ nda ngɨra kad nda ngɨra dɔ madngétant.
Nyakat a tɔl deg mbã asa nak,
m'ɔsɨd a ɗaa kasɨt
kɨta i kadkari kɨjakɔ
lo Bɨraɓe Luwah Ngekoosɨg
kam dɔningt kɨjigel kad bah Eprat't.
11Aw Galaad,
i taa kɨ baume in ngomand,
ngon kɨdẽ kɨ Ejipt.
I ndɨ ãi kĩ kɨ dang dang kari pãbe
na a i yoot al.
12Girrdeg kɨ dang dang
oon hoi rosɔl loi,
na ndiko loi ndɨ ɗoosɨ dɔning
kɨta gõɗɔɔ ga njan
gigt ro gõɗɔɔt
ad ĩn tujoo son nat.
Takɨgang lo Bɨraɓe kɨdɔ Nebukadnesart
13'Nten la i ta'n Bɨraɓe el Jeremi, ngekelta kɨtant, dɔ ɗet lo Nebukadnesar, ngar kɨ Babilon, kad n'tadɔning Ejipt.
14I ɔrr hoia Ejipt't,
i lan mbera Migdol,
I lan mbera kam ɓet kɨ Nop
kɨ Tapanes anan: I ɓai, i ɗago roi
kɨta nyakat ndɨ tɔl deg gug dɔi.
15Kɨtɔɗi tetɨn gõɗɔɔg loi a?
Ɗàn bijir al kɨta Bɨraɓe ɔsɨ lad.
16Ad deg ngãibe gan njad gigt,
kɨmad so dɔ kɨmadt
na elɨn anan:
Ad kɨ tel j'awɨn ro degt loj
kɨ dɔning kooj'j,
j'a j'ãi kɔ sãi
ta kiyaɗɔɔt kɨ ngenuj nya.
17Nu la kont anan:
Paraõ ngar kɨ Ejipt.
I kah kɨ ko kari, nya kaglo ad tɔi.
18Ngar kɨ tɔa i Bɨraɓe Ngekoosɨg an:
M'ndɨ kɨ dɔm dõ
tit mbalbo Tabor ku mbalgt
tit mbalbo Karmel
kɨ kad bahbot. A ɗe.
19Ngéndɨ Ejipt't,
i ɗan go nyag losɨ
kɨta kaw ber kɨta Nop a tel gootɓe,
horr a õa, ngendɨt a goton.
20Ejipt i ngon mang kɨmaj,
ngenuj nya ndɨ ɗe ko jigelt.
21Ngeɗɔɔg loa kɨ bajid
ĩn kamat tit'n ngan mangg
kɨ rod bo mbulmbul be;
ĩn tɔ telɨn gid'd,
ãin na tube kɨ kanj duba.
22Oon kah tit kah li kɨ ãi be
kɨta koosɨ ngéɗɔɔ
ndɨ ndɔt'n kɨ ketekete,
ndɨ ɗe ɗɔɔ dɔat kɨ kɨngag
tit'n nge ga kag be.
23A gan kag ku loa kɔ.
Titbe la i takel Bɨraɓe ye.
Ke neni dum kandt,
kɨta ɓain ngãibe tɔin
kɨbetg kɨ dum da kɔrrd
24Ngon kɨdẽ kɨ Ejipt i kɨ rosɔl,
i kɨ la ji degt kɨko jigel.
Ta lo Bɨraɓe kɨdɔ Israelt
25Bɨraɓe Ngekoosɨg, Luwah lo Israel, el an: Oo, m'a m'nda m'ɔj Amon, yo kɨ ɓebot kɨ Nõ, Paraõ, dɔning Ejipt, yog loa kɨ ngarg loa, Paraõ kɨ deg tube'n ɓan kula. 26M'a m'lad ji degt ĩgɨn ndɨ sahn tɔld, ji Nebukadnesar, ngar kɨ Babilon, kɨ ɓerg loa na go nyagt 'nten deg a ndɨn Ejipt't tit'n kam ndɔgt kɨmaɗi be.
Titbe la i takel Bɨraɓe ye.
27Na ĩ ɓer lom Jakob,
ot ɓool, ah Israel,
ot kad kɨngasa gai.
Kɨtɔ m'a m'ug m'ɔrri
kam dɔningt kɨsãi,
m'a m'ɔrr ngankai
dɔningt'n ɗan ɓer tit.
Jakob a tel,
a ndɨ kɨ lapia,
a ngah lo taakò
kanj kad de ndaa ɓoolt.
28In ɓer lom Jakob, ot ɓool.
Titbe la i takel Bɨraɓe ye.
Kɨtɔ mĩ sei nat.
M'a m'nuj girrdeg
tube ĩgɨn m'tɨnda m'tĩsɨ kudt,
na ĩn, m'a mad i goton al.
M'a m'nda m'ɔji
kɨ takɨgang kɨ goɗobat
na m'a m'nyasɨ
kɨkanj ndakɔj al.
Currently Selected:
Jeremi 46: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
