Jeremi 44
44
Judag a nujɨn kam dɔning Ejipt't
1Bɨraɓe elta Jeremi kad el Juipg tube kɨ ngéndɨ dɔning Ejipt't kɨ ngéndɨ ɓet kɨ Migdol, Takpanes kɨ Nop kɨ ngéndɨ kam dɔning Patrost, an:
2'Nten la i takel Bɨraɓe kɨ Ngekoosɨg, Luwah lo Israel; I oon kamkɔl'n mad so dɔ Jerusalemt kɨ kɨdɔ ɓebogt kɨ Juda tube. Oon, ɓola telɨn gotɓe kɨ de gotot 3kɨta majal'n ɗan, sɔkɨmɨn ne ad wong ndu kɨta awɨn lan horr nyag kɨkootmbĩ adɨn yog ĩn gerɨnd al, ĩn kɨ bɔwsɨg tu. 4M'la ɓerg lom rosɨt, ad i ngekelta kɨtamt, m'lad kɨkanj nya ta kɨ elsɨn anan: Ot ɗan nya kɨyerr 'nten in m'ndig al. 5Na oon dɔ al nelɨn mbid kad tel nyan go majal lod al, nyan ta la horr nyag kɨkootmbĩ kad yog al tɔ. 6Kɨtɔ 'nten wong lom, wong kɨtɔlsɔkɨr ɗen dɔdt, oon ɓebog kɨ Juda kɨ ɗobg kɨ Jerusalem ad telɨn gotlo kɨtuj tit'n i ndɨ oon ne ɓone.
7Tajigla, titbe takel Bɨraɓe Luwah Ngekoosɨg, Luwah lo Israel; kɨtɔɗi i ɗan majal kɨbobe ndoorɨn ne rosɨ kad i tɔlɨn dekɨ dɨngãg, dekɨdẽg, ngang kɨ ngan kasɨg kam dɔning Judat mbã de mad kɨnãi adsɨ goto a? 8Kɨtɔɗi i sɔkɨmɨn kɨta kɨlaɗa jisɨ ad i lan horr nyag kɨkootmbĩ adɨn yog kɨdɔning Ejipt't, lot'n i awɨnt kad i ndin kad i nujɨn na i telɨn nya kɨndɔl kɨ nyakid ku girrdegt tube kɨdɔningt a? 9Kamsɨ oi dɔ ɗagootal lo bɔwsɨg, kɨ majal lo ngarg kɨ Juda, kɨ majal lo nẽdg, kɨ majal lo nẽsɨg m'ɗan kam dɔning Judat kɨ dɔ ɗobg kɨ Jerusalem a? 10Sɔlɨn dɔd al mbã ɓone, ɓoolɨn al, ngomɨn go mberkɨndag lom ke ndikung lom in m'nda nõsɨt kɨ nõ bɔwsɨgt al. 11Kɨtɔ 'nten, titbe takel Bɨraɓe Ngekoosɨg, Luwah lo Israel; Oon, m'ndɨ m'teltakumm kɨ dɔsɨt kɨtakad nyakɨto so dɔsɨt kad Judag goton kɔ. 12M'a m'oi ndeg Judag kɨnãi ĩgɨn telɨn kumd kɨ n'awɨn dɔning Ejipt kad kɨ ndin nu, ĩn tube a nujɨn, a son kam dɔning Ejipt't, a nujɨn ta nyakat't kɨ bo mba girra dɔ kɨdut mbã kɨbo, a oin ta nyakat't kɨ ɓo, a ĩn nya kɨndɔl kɨ nya kɨya kɨ nya godɔt kɨ nyakid. 13M'a m'nda m'ɔj ngendɨ dɔning Ejipt tit'n m'nda m'ɔjɨn Jerusalem kɨ nyakat kɨ bo kɨ yokoosɨ ye be. 14De kɨɗa a tee ãi ku ndeg Judagt kɨ nãin al, ad i ĩgɨn ɗen dɔning Ejipt't kɨta hɔlondɨ, na ndan kamdt kad telɨn dɔning Judat, lot'n ndigɨn kɨ n'telɨn ndɨnt gog, kɨta a telɨn al, na kɨmadg kɨ ngékãi tã.
Deg kɨ Judat lan kadkarig adɨn yo mad kɨmbah
15Dekɨdɨngãg tube kɨ gerɨn ta kad nẽdg lan horr nõkag kɨkootmbĩ adɨn yog, koosɨ dekɨdẽg ĩgɨn ɗan lot'n non kɨ deg tube ngendɨ Patros kam dɔning Ejipt't turɨn Jeremi anan: 16J'a kɨ tel roj go tat loi kɨ i elj kam tɔ Bɨraɓet nõ al bat, 17na jĩ, j'a kɨ ɗa kɨgo tat kɨ tee tajt, j'a kɨ la horr nyag kɨkootmbĩ jad ngar kɨdẽ kɨdɔrãt kɨ kadkari nyakãi tit'n kɨ ɗan maɗi, jĩ kɨ bɔwjg kɨ ngarg loj kɨ mbaiɓeg loj kam ɓebogt kɨ Juda kɨ dɔ ɗobg kɨ Jerusalem. Kaglo'n non jĩ kɨ nyasa kɨta mbuj, jĩ kɨ ronel na j'oo nyakɨto al.
18Na lon kɨ nya ta la horr nyag kɨkootmbĩ kad ngar kɨdẽ kɨ dɔrãt, na Jada kadkari nyakãi al ye, kɨ nal nyag tube na kɨ tuj ta nya kat't kɨ ɓo tu. 19Na dekɨdẽg elɨn anan: Lon kɨ la horr nya kɨkootmbĩ jad ngar kɨdẽ kɨdɔrãt, Jada nya kãi a ne, i kɨgo ndigt lo ngawjg la kɨ ɗan nyasa kɔsɨgon kɨ kadkari nya kãi ale?
20Kamla Jeremi el deg tube, ad i dekɨdɨngãg kɨ dekɨdẽg kɨ deg tube'n turɨna ta, an: 21Nonkag kɨkootmbĩ in i lan horrt kam ɓebogt kɨ Juda kɨ dɔ ɗobg kɨ Jerusalem, in kɨ bɔwsɨg kɨ ngarg õsɨ kɨ mbaiɓeg losɨ kɨ deg kɨdɔningt ye, Bɨraɓe ga kamɨn dɔt ke and kam tagaht ale? 22Bɨraɓe asɨ ndɨ badɔt al ta kɨta kɨlaɗasɨ kɨmajal, kɨta nyag kɨyerr ĩgɨn i ɗan ad dɔning losɨ tel nya kɨtuj, tel gootɓe kɨ nya kɨndɔl tit'n i ndɨ oon ne ɓone 23kɨta i lan horr nõkag kɨkootmbĩ, i ɗan majal ndoorɨn ne Bɨraɓe kɨta i oon dɔ ta lo Bɨraɓe al, i ngomɨn go mberkɨnda al, ke tagkɨgang loa ke najkɨmag loa. I kɨta 'nten la kamkɔl ɗen dɔsɨt tit'n i ndɨ oon ne ɓola.
Ejipt a so ji madngétaat
24Jeremi tel elta kɨ deg tube kɨ dekɨdẽg tube an: Oon dɔ ta lo Bɨraɓe ĩn Judag tube, ngendɨ dɔning Ejipt't. 25Titbe takel Bɨraɓe Ngekoosɨg. Luwah lo Israel; Ĩn kɨ nẽsɨg, i elɨn ta kɨ tasɨ na nya'n i elɨn nõ i tɔlɨn kona kɨ jisɨ. I elɨn anan: J'a kɨ tɔlkon kunkɔ loj in j'un kad kɨ la horr nõkag kɨkootmbĩ jad ngar kɨdẽ kɨdɔrãt, Jada kadkari nya kãi to. Rota a i tɔlɨn kon kunkɔg losɨ, a i ɗan kɨgo kunkɔt losɨ. 26Kɨtɔ 'nten, oon dɔ ta lo Bɨraɓe'n deg kɨ Juda tube, ngendɨ dɔning Ejipt't; Oon, m'nda yo dɔ tɔmt kɨbo.
Titbe kel Bɨraɓe.
De mad kɨɗa kɨ Juda kɨkad tee tan kunɨn tɔm kam dɔning Ejipt't kɨ kan: Bɨraɓe Luwah ndɨ kɨ dɔ dõ. Goto. 27Oon, m'ndɨ m'oo god kɨta ɗa sed majal na maj kɨɗa al na deg kɨ Juda tube, ngendɨ dɔning Ejipt't, a nujɨn ta nyakat't kɨ bo mbã kɨ ad goton kɔ.
28Ĩgɨn a ajɨn ta nyakat't a ĩn tẽbe, a ɓain dɔning Ejipt't, tel ĩn kɨ dɔning Judat na ndeg Judag kɨ awɨn dɔning Ejipt't kɨta ndi nu ye, a gerɨn ke ta lo nõ a to kɨɗubagt a, lom ke lod. 29'Nten i nyakɔj kɨtasɨ.
Titbe la i takel Bɨraɓe ye.
M'a m'nda m'ɔjsɨ kam lot'n ɗan kɨtakad i gerɨn ne rota a tɔlɨn kon tag lom dɔsɨt kɨ nyakɨto. 30Bɨraɓe el titbe an: Oon, m'a m'la Paraõ Hopra, ngar kɨ Ejipt, ji madngétaat ĩgɨn ndɨ sahn tɔla tit'n m'lan Sedekias, ngar kɨ Juda, ji Nebukadnesart ngar kɨ Babilon, ji madngétaat'n sah tɔla.
Currently Selected:
Jeremi 44: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
