Jeremi 43
43
Takɨgang kɨdɔ Ejipt't
1Lon Jeremi tɨga kelta tube kɨ deg, ad i tag lo Bɨraɓe Luwah lod tube, tag tube'n Bɨraɓe Luwah lod ndaa mber kad eld 2Ajaria ngon Hosaja kɨ Johanan ngon Kareah kɨ ngedɔngang'n non tube elɨn Jeremi anan: I el takɨbal an: Bɨraɓe Luwah loj ndai mber kad elj an: Ot kawɨn Ejipt't kad i ndɨnt nu. Luwah eli ta titbe al. 3Na Baruk ngon Nerija la silai dɔjt kɨtakad laj ji Kaldeagt kad tɔljɨn ke kɨ n'awɨn sej ɓert Babilon.
4Johanan ngon Kareah kɨ bɨradɔ ɓut ngéɗɔɔ tube kɨ deg tube telɨn rod go tat lo Bɨraɓe al in ndad mber kad ndɨn dɔning Judat. 5Na Johanan ngon Kareah kɨ bɨradɔ ɓut ngéɗɔɔ tube oin ndeg deg tube kɨnãi Juda ĩgɨn tĩn na ku girrdegt tube kɨ lo kɨɗen in tuɓandt na telɨn kɨta ndɨ dɔning Judat, 6dekɨdɨngãg, dekɨdẽg, ngang kɨ ngan kɨdẽ lo ngar kɨ deg tube'n Nebujaradan, bɨradɔ ngéngomlo, nyad ji Gedaliat ngon Ahikam, kɨta Luwaht, kɨ Baruk ngon Nerija. 7Awɨn dɔning Ejipt't kɨta telɨn rod go tat lo Bɨraɓe al na ten Tapanes.
Jeremi ndɔ'n ndil kad Nebukadnesar a taa dɔning Ejipt
8Ta lo Bɨraɓe'n el Jeremit Tapanes, an:
9Ɔi mbalg kɨ bobo jiit, i yarod nõ Juipgt kam bɔr pur brikt in i kad tabit't kuju lo Paraõ, Takpanes. 10A i el Juipg an: Titbe takel Bɨraɓe Ngekoosɨg, Luwah lo Israel; Oon, m'a m'la m'kun Nebukadnesar, ngar kɨ Babilon, ɓer lom, m'a m'nda pong kõɓe loa dɔ mbalgt'n non ĩn m'yarod, na a la pal kub lon dɔdt. 11A ɗe nuj dɔning Ejipt; ĩgɨn mbool dã kɨta koi a ne, a oin; ĩgɨn mbool dã kɨta ɗa ɓer a ne, a ɗan ber; ĩgɨn mbool dã kɨta tɔl kɨ kiyaɗɔɔ a ne, kiyaɗɔɔ a tɔld ho. 12M'a m'la horr kuj yog kɨ Ejipt't. Nebukadnesar a lad horr, a oi yog'n non aw sed jint, a ut ron kɨ dɔning Ejipt tit'n ngéngombatg a dulon ron kɨ kubji lon ye be na a tee ko lot'n non kɨ lapia. 13A to ɓakumtanyag kɨtɔsɨ kɨ Bet Semes kam dɔning Ejipt't kɔsɨkɔsɨ, a la horr kuj yog kɨ Ejipt't.
Currently Selected:
Jeremi 43: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
