Jeremi 42
42
Jeremi el ndeg Judag kad ãin dɔning Judat kɔ al
1Bɨradɔ ɓut ngéɗɔɔ tube, Johanan ngon Kareah, Jejania ngon Hosaja kɨ deg tube, mba girra dɔ kɨdut mbã kɨbo, ndɔt'n kɨro Jeremit, ngekelta kɨta Luwaht, 2elɨna anan: Ad ko kɨ rotĩ loj i nya kɨ ta kɨroit, na i kɔ Bɨraɓe Luwah loi kɨta ndeg deg'n ɗan kɨta kete jin ngãibe na kɨ tel deg kɨ tẽbe tit'n i ndɨ oon kɨ kumi. 3Kɨ Bɨraɓe Luwah loi ɔj'j ɗob kɨ sumba kad kɨ ndulo go kɨ nya'n sumba kad kɨ ɗa.
4Jeremi, ngekelta kɨta Luwaht, eld an: M'oo dɔ. Oon, m'a m'kɔ Bɨraɓe Luwah losɨ kɨgo kɔt losɨ. Ta kɨɗen in Bɨraɓe a tursɨ a ne, m'a mad i gerɨn kɨkanj ya dɔ ta ad. 5Elɨn Jeremi anan: Kɨ Bɨraɓe i ngemanaj kɨjeje kɨ kɨro mbɨnajt, ĩla kɨ ɗa nya kɨɗen in Bɨraɓe Luwah loi a eli kad i ndaj mbera al. 6Ke kɨmaj, ke kɨmajal kaa ne, j'a kɨ j'oo dɔ ndi Bɨraɓe Luwah loj ĩn kɨ lai kɨroat kad kɨ ndɨ kɨ ronel ĩla kɨ tel roj gotat lo Bɨraɓe Luwah loj.
7Go ndɔt kɨkɨlah ta lo Bɨraɓe ɗe ro Jeremit 8na Jeremi kun Johanan ngon Kareah kɨ bɨradɔ ɓut ngéɗɔɔ tube'n ĩn nat sia kɨ deg tube, kɨdug kɨ kɨbog, 9eld an: Titbe takel Bɨraɓe Luwah lo Israel in i lamɨn kɨroat kad m'ɔja kɔ kɨ rotĩ losɨ.
10Ĩla i ndin dɔningt'n ɗan a ne,
m'a m'adsɨ ndɨn londɨsɨt
na m'a m'nujsɨ kɔ al.
Mam hɔ nyasɨ ningt,
m'a m'ɔrrsɨ kɔ gog al,
na m'a m'nyago majal'n
m'ndig ɗa sesɨ nõ kɔ.
11Ot ɓoolɨn ngar kɨ Babilon
in i ndɨ ɓoolɨna,
ot ɓoolɨna, kel Bɨraɓe,
kɨta m'a mĩ sesɨ
kad m'ajsɨ kɨ m'ug m'ɔrrsɨ jiat.
12M'a m'ɔjsɨ kamkẽ
kɨtakad ĩ tɔ kɨ ɔjsɨ kamkẽ ho.
A tel sesɨ kad i ndɨn dɔningt losɨ gog.
13Na ĩla i turɨn anan: J'a kɨ ndɨ dɔningt'n ɗan al. I telɨn rosɨ go tat lo Bɨraɓe Luwah al, 14na i elɨn a nan: Ã ã, j'a j'aw dɔning Ejipt't, lot'n j'a kɨ j'oo ro al, ke ndi tow, ɓoo a ɗaji al tɔ, nu la j'a kɨ ndit ye. 15Kɨtɔ 'nten, tajigla oon dɔ ta lo Bɨraɓe ĩn ndeg Juda kɨnãi. Titbe takel Bɨraɓe Ngekoosɨg, Luwah lo Israel.
Ĩla i telɨn takumsɨ
kɨta kaw Ejipt't
na awɨn kɨ i ndɨn nu a ne,
16titbe kaa a i ngahn nyakat
kam dɔning Ejipt't
na ɓoo in i ɓoolɨna nõ
a ngahsɨ kam dɔning Ejipt't,
nu la a i oin tit ye.
17Tubeg'n telɨn takumd
kɨta kaw Ejipt't kad ndɨnt
a oin ta nyakat't kɨ bo kɨ yokoosɨ.
De kɨɗa kudt'n a nãi kɨ dɔn dõ
ke a aj kam nyakɨtot'n
m'a mad so dɔdt goto.
18Kɨtɔ titbe kel Bɨraɓe Ngekoosɨg, Luwah lo Israel Tit'n m'ũ wong lom kɨ wong lom kɨtɔlsɔkɨr dɔ ngendɨ Jerusalemt ye, titbe tɔ wong lom a so dɔsɨt ĩla i awɨn Ejipt't. A ĩn nya kɨndɔl kɨ nya kɨya kɨ nya godɔt kɨ nyakid na a i oon lon ɗan gog 19Ĩn ndeg Judag kɨnãi, Bɨraɓe elsɨ ta 'nten woi, an: Ot kawɨn Ejipt't. I gerɨn jeje, m'ug m'elsɨ ɓone. 20Ĩn kɨɓeg, i ndɨ goolɨn rosɨ ta gool kɨta i lamɨn ro Bɨraɓe Luwaht losɨ anan: I kɔ kɨtatɔj ro Luwaht ad kɨ ger nya kɨɗen in Bɨraɓe Luwah loj a el na j'a kɨ ɗa. 21M'elsɨ m'tɔ wakɨsɨ woi ɓone, na i oon dɔ ndi Bɨraɓe Luwah losɨ al, ke nya kɨɗen in Bɨraɓe lamɨn kad m'elsɨ. 22Tajigla i gerɨn jeje, a i oin ta nya kat't kɨ ɓo kɨ yokoosɨ kam lot kɨ i ndig kawɨn ndɨnt.
Currently Selected:
Jeremi 42: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
