Jeremi 41
41
Ismael tɔl Gedalia
1Kam naht kɨkõtanãimɨta Ismael ngon Netania, ngon Eli Sama, in i girr ngar ɗe nat kɨ kɨmadg ku kɨbogt lo ngar kɨ deg kɨlah nat sia, awɨn ro Gedaliat, ngon Ahikam Mispat, na san nya nat sia Mispa. 2Ismael ngon Netania bai nat kɨ deg kɨkɨlah ĩgɨn awɨn nat sia, gan Gedalia ngon Ahikam, ngon Sapan, kɨ kiyaɗɔɔ. Titbe la tɔlɨn ne Gedalia'n ngar kɨ Babilon ndaa ngekõɓe dɔ dɔningt. 3Ismael tɔl Juipg tube'n ĩn ro Gedaliat Mispa nat kɨ ngéɗɔɔ lo Kaldeag ĩgɨn ĩn lot'n non tɔ.
4Go ndɔt kɨjoo ĩn tɔlɨn ne Gedalia ye lon de kɨɗa kɨ ger goto ɓaitɔ, 5deg madg ɗen ko Sikem kɨ Silo kɨ Samari. Ngɨsen mbaitad, kub lod i kɨtil jengjeng na jan rod hut hut kɨ do. Ɗen kɨ kadkari nduj kɨ nyakɨkootmbĩ kɨta kawɨn kuju lo Bɨraɓe. 6Ismael ngon Netania ɓai Mispa, aw ndɔd'd, ndia kɨ nõ kumɨnt na lon ndɔd'd ye, eld an: I ɗen ad j'awɨn ro Gedaliat ngon Ahikam. 7Lon andɨn kam ɓebot ye Ismael ngon Netania kɨ deg kɨ ĩn nat sia tɔlɨnd, ũn nind kam bulomant 8na deg kɨlah kudt elɨn Ismael anan: Ot tɔljɨn kɨta j'aw kɨ nyasa loj kɨyarɔ kam ndɔɔt nõ, ad i nyako gem kɨ ɔrj kɨ yib kɨ tej. Kɨtɔ 'nten nyad na tɔldɨn nat kɨgankõdg al. 9Buloman in Ismael ũ nin deg tube kɨ tɔld ro Gedaliat tit i bulo in ngar Asa ur kɨta ɓool Baesa, ngar kɨ Israel. Bulo'n non la Ismael ngon Netania ɗoosɨ kɨ nin deg in tɔld ye.
10Ismael ho ndeg deg kɨnãi Mispa ɓert, ngan kɨdẽg lo ngar kɨ deg tube kɨnãi ĩn Nebujaradan, bɨradɔ ngengomlo, nyad ad Gedalia ngon Ahikam. Ismael ngon Netania aw sed ɓert, na tɔi aw kad ndah dɔning lo Amoniag gang.
Ismaelag kɨ hɔnd ɓert ye nyand dõ
11Lon Johanan ngon Kareah kɨ bɨradɔ ɓut ngéɗɔɔg ĩgɨn ĩn nat sia oon hoita nyaɗa kɨmajal'n Ismael ngon Netania ɗa ye, 12ɔin deg lod tube na awɨn kɨta ro Ismael ngon Netania, ndɔdna ta man kart kɨbo kɨ Gabaõ. 13Lon deg tube kɨ ĩn nat kɨ Ismael oon Johanan ngon Kareah kɨ bɨradɔ ɓut ngéɗɔɔ tube nat sia ye, ɗan ronel. 14Deg tube ĩgɨn Ismael hɔd Mispa, ndɨ aw sed ɓert ye, telɨn gog, ndan rod nat kɨ Johanan ngon Kareah 15na Ismael ngon Netania ãi nat kɨ deg jijoo nõ Johanant, aw ro Amoniagt.
16Johanan ngon Kareah kɨ bɨradɔ ɓut ngéɗɔɔ tube'n ĩn nat sia oin deg'n ajɨnd ji Ismaelt ngon Netania ĩgɨn ɔind Mispat got'n tɔl Gedalia ngon Ahikam, ad i ngéɗɔɔ, dekɨdẽg, ngang, kɨ kùj dekɨdɨngãg ĩgɨn Ismael ɗe sed Gabaõ. 17Ɓai awɨn na duban kuj mbahgt kɨ Kimham in i nderbe kɨ Betlehem kɨta sahn ɗob kaw Ejipt't 18sãi kɨ Kaldeag kɨta Ismael ngon Netania tɔl Gedalia ngon Ahikam in ngar kɨ Babilon ndaa ngekõɓe dɔ dɔningt.
Currently Selected:
Jeremi 41: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
