Jeremi 40
40
Jeremi ndɨ Juda, Gedalia i ngekõɓe
1Ta'n ɗe ro Jeremit kokɨro Bɨraɓet got'n Nebujaradan, bɨradɔ ngengomlo, ɔrr Jeremi nyàa dõ Ramat. Lon ngahn Jeremi ye, i kɨ dɔɔ kɨ jinjir ku degt ĩgɨn hɔnd Jerusalem kɨ Juda, ndɨ awɨn sed Babilon.
2Bɨradɔ ngengomlo kun Jeremi na ela an: Bɨraɓe Luwah loi elta dɔ nujt'n ndɨ ɗe dɔ lot'n ɗan. 3Nya'n Bɨraɓe eltaa, ada ɗe na tɔl kona tit'n elɨn na nyag 'nten ɗen dɔsɨt kɨta i ɗan majal ndoorɨn ne Bɨraɓe na oon dɔ ta loa al. 4Tajigla oo, m'ɗa m'ɔrr jinjir kɨ jiit ɓone. Ĩla i ndig kaw sem nat Babilon a ne, i ɗe na m'a m'oo goi. Ĩla i ndig kaw nat sem Babilon al a ne, ot ɗe. Oo, dɔning tube i nõit; aw lo kɨɗen in kami ndig kawt. 5Na lon Jeremi ndɨ ga ta ɓaitɔ ye. Nebujaradan ela an: I tel aw ro Gedaliat ngon Ahikam, ngon Sapan, in ngar kɨ Babilon ndaa ngekõɓe dɔ ɓebogt kɨ Juda, i ndɨ nat sia ku degt ke aw lo kɨɗen in kami ndig kawt. Bɨradɔ ngengomlo ada nyasa kɨ kadkarig na ndaa ɗobo ada aw. 6Jeremi aw ro Gedaliat, ngon Ahikam, ɓebot kɨ Mispa na ndɨ nat sia ku ndeg degt kɨnãi dɔningt'n non.
7Lon bɨradɔg kɨdɔ ɓut ngéɗɔɔt tube'n ndɨ kam mut nat kɨ deg lod oon hoi ngar kɨ Babilon nda Gedalia ngon Ahikam ngekõɓe dɔ dɔningt na ada de kɨdɨngãg kɨ dekɨdẽg kɨ ngang nat kɨ ngendog kɨdɔningt ĩgɨn awɨn sed Babilon al, 8awɨn ro Gedaliat Mispa, ad i Ismael ngon Netania Johanan kɨ Jonatã ngan Kareah, Seraya ngon Tanhumet, ngan Epai, de kɨ Netopa, kɨ Jejania ngon Maakatit, ĩn kɨ deg lod. 9Gedalia ngon Ahikam, ngon Sapan, nda yo ad'd kɨ deg lod an: Ot ɓoolɨn ɗa ɓer lo Kaldeag. I ndɨn dɔningt, i ɗan kɨlaɓer adɨn ngar kɨ Babilon a ne, a i ngahn lapia. 10Oon, mĩ ta, m'ndɨ Mispa ɓakumtasi nõ Kaldeagt ĩgɨn a ɗen rojt. Na ĩn, i kawɨn man nduu kɨ kandnyag kɨ yib, ũn kam jogt losɨ na i ndɨ kam ɓebogt losɨ ĩn i ndɨnt.
11Juipg tube'n ndɨn dɔning Moab, be lo Amoniag, dɔning Edom kɨ ngéndɨ dɔningg kɨ dang dang oon hoi ngar kɨ Babilon nya ndeg deg kɨ Juda na ad'd Gedalia ngon Ahikam ngon Sapan, kad õɓe dɔdt. 12Kamla Juipg tube'n tɨnda tĩd kɨ lo kɨ ɗen, tel awɨn dɔning Juda ro Gedaliat Mispa na kawɨn man nduu kɨ kand nyag ngãibe kɨnat.
13Johanan ngon Kareah kɨ bɨradɔg kɨdɔ ɓut ngéɗɔɔ tube kɨ kam mut ɗen ro Gedaliat Mispa, 14elɨna anan: I ger ta kad Baalis, ngar lo Amoniag, nda mber Ismael ngon Netania kad tɔli ale? Na Gedalia ngon Ahikam ad kamɨn dɔt al. 15Johanan ngon Kareah elta kɨ Gedalia gid tilt Mispa, an: Nyam ad m'aw m'tɔl Ismael ngon Netania; de mad kɨ a ger goto. Kɨtɔɗi i nyàa kad tɔli a? Kɨtɔɗi Juipg tube'n kawɨn'na roit a tĩn na, na ndeg Judag kɨnãi ye, kɨ nujɨn a? 16Gedalia ngon Ahikam tur Johanan ngon Kareah, an: Ot ɗa nya 'nten kɨta ta in i el dɔ Ismaelt i takɨbal.
Currently Selected:
Jeremi 40: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
