Jeremi 39
39
Kaldeag tan Jerusalem
1Ɓal kɨkõjikɨɗa lo Sedekias ngar kɨ Juda, kɨ nah kɨkɨlah ye ngar Nebukadnesar ɗe kɨ ngéɗɔɔ lon tube, lan na gugɨn dɔ Jerusalem. 2Bal Sedekias kɨ kõ kɨlah gidaikɨɗa, ndɔ kɨjikɨɗa lo nah kɨkõsɔɔ ye tɔsɨn ndogbɔrr lo ɓebo mbutɨn. 3Mbaiɓeg tube lo ngar kɨ Babilon a ndɨn nat ndin tabit't kɨ dene, ad i Nergal Sareser, Samgar Nebo, Sarsekim bɨradɔ kùj dekɨdɨngãg, Nergal Sareser bɨradɔ ngéterr kɨ ndeg mbaiɓeg lo ngar kɨ Babilon. 4Lon Sedekias, ngar kɨ Juda, kɨ ngéɗɔɔ tube oon ye, teen kam ɓebot, ãin na kondɔ kɨ ɗob kaw ndɔɔ lo ngar kɨ tabit kɨ mbɨna ndogbɔrrgt kɨjoo na unɨn ɗob kaw dɨlambot. 5Ngeɗɔɔg lo Kaldeag tuɓan god, ngahn Sedekias kam dɨlambot kɨ Jeriko, hɔn na awɨn sia ro Nebukadnesar, ngar kɨ Babilon, ɓebot kɨ Ribla kam dɔning Hamat. Nu la Nebukadnesar gang to dɔat ye. 6Ngar kɨ Babilon tɔl ngan Sedekias ɓebot kɨ Ribla ta kum Sedekiast. Ngar kɨ Babilon tɔl kɨbog lo Juda tube, 7kamla tɔsɨ kum Sedekias tɔɔ, na dɔa kɨ jinjir ningakasɨ kɨta kaw sia Babilon. 8Kaldeag lan horr kuj lo ngar kɨ kujg lo deg na tɔsɨn ndogbɔrr kɨ Jerusalem tɨlan. 9Nebujaradan, bɨradɔ ngéngomlog, ho ndeg deg kɨnãi kam ɓe bot'n ɗan aw sed ɓert Babilon, ad i deg ĩgɨn ten, awɨn roat kɨ ndeg deg kɨnãi. 10Na Nebujaradan, bɨradɔ ngengomlo, nya ngéndog ku degt kam dɔning Judat ad'd ndɔɔ ndug kɨ ndɔɔg.
Jeremi tee dangait
11Nebukadnesar, ngar kɨ Babilon, ndamber Nebujaradan, bɨradɔ ngengomlo, dɔ Jeremit an: 12Una na oo goa maj. Ot ɗa sia nya mad kɨ majal na i ɗa sia kɨgo ndigt loa. 13Nebujaradan, bɨradɔ ngéngomlo, kɨ Nebusajban bɨradɔ kujde kɨ dɨngãg, kɨ Nergal Sareser, bɨradɔ ngéterr, kɨ mbaiɓeg tube lo ngar kɨ Babilon 14lan kɨla kad ɔrrɨn Jeremi natlot kɨ kuj dangai, lana ji Gedaliat ngon Ahikam, ngon Sapan, kad aw sia ɓe lon na ndɨ ku degt.
Bɨraɓe un kɔn kɨta ngom Ebed Melek
15Ta lo Bɨraɓe'n el Jeremit lon i kɨkut kam natlot kɨ kuj dangait, an: 16Aw, elta kɨ Ebed Melek de kɨ dɔning Etiopi, an: Titbe kel Bɨraɓe Ngekoosɨg, Luwah lo Israel: Oo, m'a m'tɔl kon tag lom in m'el kɨdɔ ɓebot'n ɗan, a i majal na maj kɨɗa al. A ɗa nya takumit ndɔ'n ɗan 17na kam ndɔt'n ɗan m'a m'ug m'ɔrri.
Titbe la i takel Bɨraɓe ye.
A i so ji degt ĩn i ɓoold al. 18Rota m'a m'aji, a i so ta nyakat't al, ndii kɨ dɔ dõ a i nyatetɗɔɔ loi kɨta i ɓakulɨm. Takel Bɨraɓe.
Currently Selected:
Jeremi 39: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
