Jeremi 38
38
Lan Jeremi bulomant kɨ yii
1Sepatia ngon Matan, Gedalia ngon Pasur, Jukal ngon Selemia kɨ Pasur ngon Malkija oon dɔ tag'n Jeremi el deg tube an: 2Titbe kel Bɨraɓe; De'n a ndɨ kam ɓebot'n ɗan a ne, a oi ta nya kat't kɨ bo kɨ yokoosɨ na de'n a tee aw ro Kaldeagt a ne, a ndɨ kɨ dɔ dõ. Ndia kɨ dɔ dõ a i nyatetɗɔɔ loa a ndɨ kumkajir. 3Titbe takel Bɨraɓe Rota, ɓebo'n ɗan a so ji ngéɗɔɔt lo ngar kɨ Babilon kad tan.
4Mbaiɓeg elɨn ngar anan: Ad tɔlɨn de'n ɗàn ko kɨta ad ro ngéɗɔɔ kɨ nãin kam ɓebot'n ɗan oi siw kɨ deg tube ĩn eld ta kɨ titbe. De ɗan ndɨ sah maj lo deg al na ndɨ sah nujd. 5Ngar Sedesias tur an: Oon, i jisɨt kɨta ngar ɗa tɔg ɗa nya mad kɨ ndoorsɨ al. 6Kamla hɔn Jeremi, lana kam bulomant lo Malkija, ngon ngar, in i kam natlot lo ngengomlo. Tuin Jeremi kɨ kila kɨ kam bulomant. Man goto kam bulot'n non, i bɔr koon na Jeremi and kam bɔrt.
7Ebed Melek, de kɨ dɔning Etiopi, kùj dekɨdɨngã kɨ kam kujt lo ngar oo hoi la Jeremi kam bulomant. Ngar ndɨ tabit't lo Benjami. 8Ebed Melek tee kuju lo ngar na elta kɨ ngar an: 9Ah ngar kɨ ngeem, oo, deg'n ɗan nya kɨmajal lon ɗan titbe kɨ Jeremi, ngekelta kɨta Luwaht, lana kam bulomant. Ɓoo a tɔla kam lot'n ɗat nõ kɨta nyasa goto kam ɓebot'n ɗan. 10Ngar ndamber Ebed Melek, de kɨ Etiopi, an: Oi deg dɔmɨta nat sei nẽbe, i ɔr Jeremi, ngekelta kɨta Luwaht, kam bulomant kɨtɨga kete lon woi al ɓaitɔ. 11Ebed Melek oi deg nat sen, awɨn kuju lo ngar, and ber, aw girr lo ɓo nya majgt, oi ta kubg kɨtil kɨ ngis kubg, dɔd ta kɨlat, la ad Jeremi kam bulomant. 12Ebed Melek, de kɨ Etiopi'n non, el Jeremi an: I la ta kub kɨtil kɨ ngis kubg 'nten girr koit ad kɨla i dɔt. Jeremi ɗa titbe. 13Ɔrrɨn Jeremi kɨ kɨla, ten sia kam bulomant kɨtɨga. Jeremi ndɨ kam natlot lo ngengomlo.
14Ngar Sedekias la kɨla go Jeremit, ngekelta kɨta Luwaht, kad ɗe ront tabit't kɨkõjoo lo kuj lo Bɨraɓe. Ngar el Jeremi an: M'ge ndɨjei ta mad, ot yam dɔ nya mad. 15Jeremi tur el Sedekias an: Ĩla m'eli a ne, rota, a i tɔlɨm kɔ ale? Ĩla m'adi takɔj kaa ne a i oo dɔ al. 16Ngar Sedekias nda yo loyarot ad Jeremi, an: Tit'n Bɨraɓe Ngendahj ndɨ kɨ dɔn dõ ye, m'a m'tɔli al, m'a m'lai ji degt ngésah tɔli al tɔ. 17Kamla Jeremi el Sedekias an: Titbe takel Bɨraɓe Luwah Ngekoosɨg, Luwah lo Israel; Ĩla i aw ro mbaiɓegt lo ngar kɨ Babilon a ne, a aj na ɓebo'n ɗan a lana horr al. A i ndɨ kɨ dɔi dõ kari, ĩn kɨ ngékɨɓe loi, 18na ĩla i aw ro mbaiɓegt lo ngar kɨ Babilon al a ne, a lan ɓebo'n ɗan ji Kaldeagt kad lan horr na ĩ ta, a i tee jidt al. 19Ngar Sedesias el Jeremi an: M'ndɨ m'ɓool Judag ĩgɨn awɨn ro Kaldeagt nõ, m'ndɨ m'ɓool na ɓeta lamɨn jidt ad m'tel nya godɔt. 20Jeremi tur an: A lain jidt al. Oo dɔ ndi Bɨraɓe kɨgo tat'n m'eli. A i ngah maj, a i ndɨ kɨ dɔi dõ. 21Na ĩla i mbet tee a ne, oo nya in Bɨraɓe adɨm m'oo kam ndilt laten: 22Ndeg dekɨdẽg tube'n nãin kam kujt lo ngar kɨ Juda, ndɨ ɔrrɨnd kɨtɨga, ndɨ awɨn sed ro mbaiɓegt lo ngar kɨ Babilon na dekɨdẽg'n non a lain pat anan:
Namig kɨjeje goolɨn,
dumɨn dɔi,
tajigla njai dub kam bɔrt
ad namig nyain kɔ.
23Titbe a ɔrrɨn nẽig tube kɨ nganig, a awɨn sed ro Kaldeagt na in, a i tee jidt al. Ngar kɨ Babilon a hɔi, na a la horr ɓebo'n ɗan tɔ ho. 24Sedekias el Jeremi an: Ĩla i ad de mad oo ta 'nten al a ne, a i oi al. 25Ĩla mbaiɓeg oon hoi kad m'el sei ta, ĩla elɨn anan: Ɔrj hoi ta in i el ngar nõ kɨ ta in ngar eli, ot yaj dɔ taa na j'a kɨ tɔli al, 26a i eld an: M'ko ngar kad tel sem kam kujt lo Jonatã gog al na ɓeta m'oi tit.
27Mbaiɓeg'n non tube ɗen ro Jeremit ndɨjena ta na Jeremi turd ta kɨgo tat'n ngar ndaa mbera. Ndin tad mbo kɨta ta 'nten tĩn kɨ log al ɓaitɔ.
28Na Jeremi ndɨ kam natlot lo ngéngomlo nõ mbã ndɔt'n tan Jerusalem.
Currently Selected:
Jeremi 38: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
