Jeremi 36
36
Jeremi ad Baruk ndang maktub
1Ɓal kɨkõsɔɔ lo kõɓe lo Jojakim ngon Josias, ngar kɨ Juda, ta lo Bɨraɓe ɗe ro Jeremit an:
2Un maktub, i ndang tag tube'n m'eli dɔ Israelt kɨ kɨdɔ Judat kɨ girrdeg tube, kete lon m'eli ta kaglot lo Josias mbã ɓola. 3Maj a ne, ngékɨɓe lo Juda a oon dɔ ta nyakɨto tube'n m'ɔj kad m'ɗa sed ad dekɨɗen tel nyàgo majal lon kɔ, kamla m'a m'nyago ɗagootal lod kɨ majal lod kɔ ho ye.
4Jeremi kun Baruk ngon Nerija na Baruk ndang ta in Jeremi ela kam maktubt, ad i tag tube'n Bɨraɓe el Jeremi. 5Goot gog Jeremi ndamber Baruk an: Mĩ dangait ad m'asɨ kaw kam kujt lo Bɨraɓe al, 6na ĩ kɨ dɔi aw, i da maktub, ad i tag lo Bɨraɓe kɨ tee tamt in i ndang kam maktubt. I da kɨ mbi degt kam kujt lo Bɨraɓe ad oon ndɔ kogro nyasat na i tɨda kɨ mbi degt tube'n ɓain ko Judat kɨ ɓebog lod. 7Maj a ne, ko kɨ rotĩ lod a tee ro Bɨraɓet na dekɨɗen a tel nyàgo kɨlaɗan kɨmajal kɔ kɨta wong, wong kɨtɔlsɔkɨr in Bɨraɓe eltaa dɔ degt'n ɗan, i kɨbobe. 8Baruk ngon Nerija ɗa nyag tube ĩn Jeremi, ngekelta kɨta Luwaht, ndaa mbera na da ta lo Bɨraɓe kɨ kam maktubt'n non kam kujt lo Bɨraɓe.
Tɨdan maktub na lan horr
9Ɓal kɨkõmi lo Jojakim ngon Josias, ngar kɨ Juda, kɨ nah kɨjikɨɗa ye, lan mber kogro nyasa nõ Bɨraɓet kɨta ngéndɨ Jerusalem tube kɨ deg tube ĩn ɓain kam ɓebogt kɨ Juda, ɗen Jerusalem. 10Baruk tɨda tag lo Jeremi kɨ kam maktubt kɨ mbi degt tube kam kujt lo Bɨraɓe, kam ngon kujt lo Gemaria ngon Sapan, ngendangmaktub, in i kam natlot kɨ dõ ta tabit't kɨkij lo kuj lo Bɨraɓe.
11Mika ngon Gemaria, ngon Sapan, oo dɔ tag lo Bɨraɓe tube kɨ kam maktubt 12na ɓai aw kuju lo ngar kam ngon kujt lo ngendang maktub, lot'n mbaiɓeg tube ndɨnt, ad i Elisama ngendang maktub, Delaja ngon Semaja, Elnatan ngon Akbor, Gemaria ngon Sapan kɨ Sedekias ngon Hanania kɨ ndeg mbaiɓeg tube. 13Mika ɔrrd hoi tag tube'n oo dɔ lon Baruk ɗa da maktub kɨ mbi degt.
14Kamla mbaiɓeg'n non tube lan Yehudi ngon Netania, ngon Selemia, ngon Kusi, kɨro Barukt kad ela an: Un maktub kan i da kɨ mbi degt nõ jiit, i ɗen. Baruk ngon Nerija un maktub jint, awɨn rodt. 15Elɨna anan: Ndɨ ber, i da maktub 'nten kɨ mbijit. Baruk da kɨ mbidt. 16Lon oon dɔ tag 'nten tube woi ye, nɔlɨn takum'na kɨta ɓoolɨn na elɨn Baruk anan: Rota, j'a kɨ j'ɔrr hoitag 'nten tube kad ngar oo.
17Ndɨjen Baruk anan: Elj, titbãi i ndangɨn tag 'nten tube kɨ tee taat? 18Baruk turd an: Elɨm tag 'nten tube kɨ tan na m'ndang kam maktubt kɨ man ndang maktub. 19Mbaiɓeg elɨn Baruk anan: Aw, i yaroi, ĩn kɨ Jeremi tu kad de mad ger londɨsɨ al.
20Kamla nyan maktub kam kujt lo Elisama, ngendangmaktub, na awɨn ro ngart natbet loa, ɔrrɨn hoi lot'n non tube kɨ mbi ngart. 21Ngar la Yehudi kad un maktub'n non na Yehudi un kam kujt lo Elisama, ngendang maktub, tɨda kɨ mbi ngart kɨ mbaiɓeg loa tube'n ndin ro ngart. 22Ngar ndɨ kam kujt lon dɔnah kult i nah kɨkõjikɨɗa, horr ndɨ õ nõat kam gajot. 23Lon Yehudi tɨda mbi maktub asɨ mɨta ke so woi ye ngar ta jiat, tɨja gang kɨ kia lo ngendang maktub na laa horro kam gajot ad horr õa kɨtaagbe. 24Ngar kɨ nge kɨlaɓerg lon tube oon dɔ tag 'nten na ɓoolɨn al, tilɨn kubg lod al tɔ. 25Taa ne, elɨna taan kɨ Delaja kɨ Gemaria kɔn ngar kɨ rotĩd kad la horr maktub al na oo dɔ ta lod al. 26Ngar ndamber Jerahmeel ngon ngar, Seraja ngon Ajriel kɨ Selemia ngon Abdeel kad hɔn Baruk, ngendangmaktub, kɨ Jeremi, ngekelta kɨta Luwaht, na Bɨraɓe ɓɔd.
Baruk ndang tag tube kij gog
27Goot'n ngar la horr maktub in Baruk ndang ta kɨ tee ta Jeremit kamt ye ta lo Bɨraɓe ɗe ro Jeremit an: 28Un maktub mad kɨɗang, i ndang tag tube'n i kam maktubt kɨdasa nõ in Jojakim, ngar kɨ Juda Ia horr. 29Ta kɨdɔ Jojakimt, ngar kɨ Juda, taa ne a i el an: Titbe takel Bɨraɓe; I la horr maktub 'nten na i el an: Kɨtɔɗi i ndangɨn tag 'nten an: Ngar kɨ Babilon a ɗe nuj dɔning'n ɗan ad deg kɨ dãg a goton a? 30Kɨtɔ 'nten la Bɨraɓe elta dɔ Jojakimt, ngar kɨ Juda an: De loa mad kɨ a ndɨ dɔ pong kõɓet lo Dabid goto na a lan nina dan kada kad tɨnga kɨ kam kult kɨ kondɔ. 31M'a m'nda m'ɔja, ĩn kɨ ngankaa kɨ ngékɨlaɓerg loa kɨta ɗagootal lod. M'a mad nya kɨto tube ɗe dɔdt kɨ dɔ ngendɨ Jerusalemt kɨ deg kɨ Juda in m'eld taa na ndigɨn ko dɔ al.
32Kamla Jeremi un maktub mad kɨɗang ad Baruk ngon Nerija, ngendangmaktub, na Baruk ndang ta kɨ tee ta Jeremit, ad i tag tube kɨ kam maktubt in Jojakim, ngar kɨ Juda, la horr. Ndang ta madg kɨɗang kɨ tit sia ngãibe tɔ.
Currently Selected:
Jeremi 36: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
