Jeremi 35
35
Rekabiag ĩn ngetelrogotat
1Kaglot lo Jojakim ngon Josias, ngar kɨ Juda, ta ɗe ro Jeremit kokɨro Bɨraɓet, an:
2Aw ro Rekabiag kujt lod, el sed ta na i ɗe sed kam kujt lo Bɨraɓe, kam ngon kujt mad, i ad'd kasɨnduu kad ãin. 3Titbe m'un Jaajania ngon Jeremi, ngon Habajinia, kɨ ngankõag kɨ nganag tube kɨ ngékɨɓe lo Rekab tube, 4m'ɗe sed kam kujt lo Bɨraɓe, kam kujt kɨkeme lo ngan Hanan, ngon Jigdalia, de lo Luwah, in i kad kujt lo mbaiɓeg kɨ dõ dɔ kujt lo Maaseja, ngon Salum, ngengom tabit. 5M'nda jog kɨ ɗoosɨn kɨ kasɨnduu kɨ kopg nõ ngékɨɓe lo Rekab na m'eld m'an: Ãin kasɨ nduu.
6Na turmɨn anan: Jĩ, j'ain kasɨnduu al kɨta bɔwjg Jonadab, ngon Rekab, ndaj mber an:
A ãin kasɨnduu al bat,
ĩn ke ngansɨg.
7Ot ɗan kuj,
ot duwɨn nyako,
ot hɔn ndɔɔ nduu
ad i ndin ne al
na a i ndɨ kam kujkubgt
ndɔ ndisɨ kɨdɔ dõ tube
kɨtakad i ndin kɨ dɔsɨ dõ kaglo ngãibe
dɔningt'n i ndin mbah kamt.
8Kɨ tel roj go nyagt tube'n bɔwjg Jonadab ngon Rekab ndaj mbera. J'a j'ain kasɨnduu al kɨ ndɔjg tube ĩn kɨ ndɨn kɨ dɔj dõ, ad i jĩn kɨ nẽijg kɨ nganjg kɨdɨngã kɨ kɨdẽ. 9J'a kɨ ɗa kujg kad kɨ ndɨnt al, ndɔɔ nduu loj goto, ndɔɔ kɨ konya kɨta dub goto 10na jĩ kɨ ndɨ kam kujkubgt, kɨ tel roj go tat, kɨ ɗa nyag tube ĩn bɔwjg Jonadab ndaj mbera. 11Na lon Nebukadnesar, ngar kɨ Babilon, ɗe ɗɔɔ kɨ dɔning'n ɗan a ne, j'el j'an: Ad j'awɨn Jerusalem kɨta ɓool ngéɗɔɔg lo Kalde ag kɨ ngéɗɔɔg lo Siriag. Titbe la kɨ ndi'n Jerusalem ye.
Judag ĩn ngetelrogotatal
12Kamla ta lo Bɨraɓe ɗe ro Jeremit an: 13Titbe takel Bɨraɓe Ngekoosɨg, Luwah lo Israel; Aw el deg kɨ Juda kɨ ngéndɨ Jerusalem an: A i tan nyandoo kad oon ne dɔ ta lom al e? Takel Bɨraɓe. 14Rekabiag ngomɨn go tag lo Jonadab ngon Rekab'n nda mbera nganɨn kad ãin kasɨnduu al, ĩn tɔ mbetɨn kãi kasɨnduu mbã ɓone kɨta telɨn rod go tat lo bɔwd. Na mĩ, m'elsɨ ta kɨkanj nya ta na i oon dɔ ta lom al. 15Ɓerg lom tube m'lad kɨrosɨt, ad i ngekelta kɨtamt, m'lad kɨkanj nya ta kad elsɨn anan: Kɨ dekɨɗen kusɨt tel, nyàgo majal lon kɔ, oon go kɨlaɗasɨ, ot ndulon go yog kad i ɗan kɨlaɓer lod, kamla a i ndin kam dɔningt'n m'adsɨ kɨ bɔwsɨg. Na i nelɨn mbisɨ kɨromt al. 16Ngan Jonadab, ngon Rekab, ngomɨn go mberkɨnda lo bɔwd in ndad na deg'n ɗan telɨn rod go tat lom al. 17Kɨtɔ 'nten, titbe takel Bɨraɓe Ngekoosɨg, Luwah lo Israel: Oo, m'ndɨ m'ɗe kɨ nyakɨto in m'eltaa kɨdɔ Judat kɨ kɨ do ngendɨ Jerusalemt tube kɨta m'eld taa na oon dɔ al, m'Kund na turɨn go al tɔ.
18Na Jeremi el nge kɨ ɓe lo Rekab an: Titbe takel Bɨraɓe Luwah lo Israel; kɨta i telɨn rosɨ go tat lo bɔwsɨ Jonadab na i ngomɨn go tag loa tube kɨ nyag tube'n ndasɨ mbera. 19Kɨtɔ 'nten la Bɨraɓe Ngekoosɨg, Luwah lo Israel elɨn an: Jo Nadab ngon Rekab a nal de kɨ ngeɗa nomt al bat.
Currently Selected:
Jeremi 35: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
