Jeremi 34
34
1Ta'n ɗe ɗɔɔ Jeremit kokɨro Bɨraɓet lon Nebukadnesar ngar kɨ Babilon kɨ ngéɗɔɔ loa tube kɨ kõɓeg tube kɨdɔningt ĩgɨn ĩn girr tɔgt loa kɨ deg tube ron kɨ Jerusalem kɨ ɓebog loa tube, an:
2Titbe takel Bɨraɓe Luwah lo Israel Aw, el Sedekias ngar kɨ Juda an:
Titbe la i takel Bɨraɓe ye.
Oo, m'ndɨ m'la ɓebo'n ɗan ji ngart kɨ Babilon kad la horr. 3Ĩ kɨdɔi a i tee jiat al, a hɔin na a lain jiat, kumi a oo kum ngar kɨ Babilon, a eli ta kɨ tan na a i aw Babilon. 4Ah Sedekias, ngar kɨ Juda, i oo dɔ ta lo Bɨraɓe. Titbe takel Bɨraɓe dan dɔi; A i ɔi koi nyakat al. 5A i oi koi kɨ lapia, na tit'n la'n horr nyag kɨkootmbĩ kɨ bɔwig ad i ngarg kɨkete nõit ye, titbe tɔ a la'n horr nyag kɨkootmbĩ kɨtɔi, na a nõin anan: Ah ngej. Kɨtɔ m'elta 'nten woi.
Titbe la i takel Bɨraɓe ye.
6Jeremi, ngekelta kɨta Luwaht, el Sedekias ngar kɨ Juda ta 'nten tube Jerusalemt. 7Na ngéɗɔɔ lo ngar kɨ Babilon ɗɔɔ Jerusalem kɨ ɓebog kɨ Juda tube kɨ Lakis kɨ Ajeka kɨta ĩn ɓebog kɨ ngang kɨnãi ku ɓebogt kɨ Juda.
Nyan ɓerg dõ na tel hɔnd gog
8Ta'n tee kokɨro Bɨraɓet, ɗe ro Jeremit got'n ngar Sedekias un kon nat kɨ deg tube ngéndɨ Jerusalem kad la'n mber ta nya ɓerg dõ 9kɨtakad dekɨɗen nya ber lon, ad i Hebre kɨdɨngã ke kɨdẽ, ada aw de ta nyan, kɨ de mad ho ngonkõn Juip kam ɓert al ta. 10Mbaiɓeg tube kɨ deg tube'n ĩn kam kunkɔt'n non ye ndigɨn kad dekɨɗen nya ɓer lon kɨdɨngã ke kɨdẽ kad ɗa ɓer gog al. Telɨn rod go tat, nyan ɓerg dõ. 11Goot gog tel nyan go takɨkɔj'n non na telɨn kɨ ɓerg lod kɨdɨngã kɨ kɨdẽ ĩgɨn ɔrrɨnd dõ kete, ɗand lo ngetɔgt kad telɨn ɓerg kɨdɨngã kɨ kɨdẽ.
12Kamla ta lo Bɨraɓe ɗe ro Jeremit in i ta kɨla kokɨro Bɨraɓet, an: 13Titbe takel Bɨraɓe Luwah lo Israel; M'un kom nat kɨ bɔwsɨg ndɔ in m'teen sed kam dɔning Ejipt't kɨtɨga, lo ɗa ɓert, m'an: 14Go ɓalt kɨtanãimɨta a ne, de kɨ ɗen a nya ngonkõn Hebre'n ndugoa. A ɗa ɓer adi ɓal kɨbojidet, kamla a i nyàa de ta nyan, na bɔwsɨg telɨn rod go tat lom al, nelɨn mbid dɔ tat lom al tɔ. 15Na i tel ton tasɨ dɔt ɓone, i ɗan nya'n i kɨdenesew takum'mt ad dekɨɗen la mber ta nya dõ kɨro madɓent, na i nda kunkɔ nomt kamkujt'n kunɨn tɔm dɔt. 16Na gog got i mbelɨn takɨkɔj losɨ adɨn tɔm tel kɨ yerr na dekɨɗen kusɨt tel kɨ ber lon kɨ dɨngã kɨ kɨdẽ ĩgɨn i nyand dõ ad awɨn woi ye; i ɗand lo ngetɔgt ad tel ɗan ber gog.
17Kɨtɔ 'nten, titbe takel Bɨraɓe: I oon dɔ ta lom al, i lan mber ta nya dõ, dekɨɗen kɨro ngonkõnt, dekɨɗen kɨro madɓent, jeje al. Oo, m'ndɨ m'la kɨ nyakat kɨ yokoosɨ kɨ ɓo dɔsɨt, a i telɨn nya kɨkootɓool kɨro kõɓegt tube kɨ dɔningt. 18Deg'n tɔin dɔ kunkɔ lom na ngomɨn ta kunkɔ kɨ unɨn nomt al, gangɨn dan ngon mang nat joo, na tɔin mbɨna gajat kɨjoo nõ. 19M'a m'la mbaiɓeg kɨ Juda kɨ mbaiɓeg kɨ Jerusalem kɨ kùj dekɨdɨngãg kɨ ngejanyamosɨ kɨ deg tube kɨdɔningt ĩgɨn tɔin mbɨna gaj ngon mangt, 20m'a m'lad ji madngétadgt kɨ ji deg ĩgɨn ndɨ sahn tɔld na nind a tel nyasa yelg kidõ kɨ dãg kɨdɔningt. 21M'a m'la Sedekias, ngar kɨ Juda, kɨ mbaiɓeg loa ji madngétadgt kɨ deg ĩgɨn ndɨ sahn tɔld kɨ ji ngéɗɔɔt lo ngar kɨ Babilon ĩgɨn ɔrrɨn rod kɔ rosɨt woi. 22Oon, m'a m'nda mber.
Titbe la i takel Bɨraɓe ye.
M'a m'tel sed kad ɗɔɔn ɓebo'n ɗan, a tan na a lan horr. M'a mad ɓebog kɨ Juda telɨn gootɓe kɨkanj ngendɨt.
Currently Selected:
Jeremi 34: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
