Jeremi 33
33
Ta lo kõɓe lo Dabid in a ɗe
1Ta lo Bɨraɓe ɗe ro Jeremit nja kɨkõjoo lon i kam natlot lo ngengom lo ɓaitɔ, an: 2Titbe takel Bɨraɓe Ngendah dɔning, Ngebaah kad to lotont tɔa i Bɨraɓe: 3I ko kɨ dɔmt na m'a m'turi, m'a m'ɔji nyag kɨbobo, nyag kɨyarɔ kɨ i gerd al. 4Kɨtɔ titbe takel Bɨraɓe Luwah lo Israel dɔ kujgt kɨ ɓebot'n ɗan kɨ kujg lo ngarg kɨ Juda ĩgɨn tetɨnd kɨber kɨtakul lo kɨ ban kɨ dõ kɨ nyakatg. 5Deg a teen kɨta ɗɔɔ kɨ Kaldeag, na kari kɨndang kɨta nin deg a ɗoosɨn lo kɨ ɓebot, deg'n m'a m'tɔld kam wongt lom, wong lom kɨtɔlsɔkɨr, kɨ to m'yaro takum'm ro ɓebot'n ɗan kɨta nyaɗa kɨgoot al lod. 6Oo, m'a m'ada yoot kɨ lapia, m'a m'yootd, m'a mad lapia kɨ nyaɗakɨro ban rodt tit man kɨɓa kɨtɔmbuj. 7Deg kɨ Juda kɨ deg kɨ Israel ĩgɨn hɔnd ɓert, m'a m'ɔrrd m'ɗe sed gog kad ndɨn londɨdt kɨ maɗi. 8M'a m'ard nyang dɔ ɗagootalgt lod tube'n ɗan ndoormɨm, m'a m'nyago majalg lod tube kɔ ĩn ɗan ɔsɨmɨn ne ta kɨ majal kɨɗen in tɔnmɨn ne ɗɔɔ. 9Ɓebo'n ɗan a i nya ronel kɨ ndub kɨ kɔsɨgon kɨtɔm ku girrdegt tube'n a oon ta lo maj kɨɗa tube kɨ m'a m'ɗa sed, lapia'n non tube, taa a yad biw, a õ kamd, titbe tɔ la i majkurr in m'a m'ad'd ye. 10Titbe takel Bɨraɓe: Kam lot'n ɗan in i elɨn ta dɔat anan: I gootɓe, de ke dã gotot. Kam ɓebogt kɨ Juda kɨ dɔ ɗobg kɨ Jerusalem in tel gotɓe kɨ de gotot, ngéndɨt ke dan gotont, 11kam logt'n ɗan la deg a oon dɔ ndɨ ko ronel kɨ kamnda, ndɨ pa lo ngetaa dekɨdẽkij kɨ ndɨ pa lo ngetaangaw kij kɨ ĩgɨn elɨn anan: I ndubɨn Bɨraɓe Ngekoosɨg kɨ tɔ Bɨraɓe i kɨmaj, nyaɗakɨro loa tokɨnõt. Ndɨ deg ĩgɨn adɨn kadkari mersi kɨ ɗa kam kujt lo Bɨraɓe. Kɨtɔ m'a m'tel kɨ deg'n hɔnd ɓert kɨ dɔningt'n ɗan, m'a m'ndad gog tit kɨmaɗi.
Titbe la i takel Bɨraɓe ye.
12Titbe takel Bɨraɓe Ngekoosɨg: Kam lot'n ɗan in tel gootɓe kɨ kanj de ke dan kɨ kɨ kam ɓebogt loa, a i londɨ ngekulnyag'n a adɨn but nyakulg lod taan kò tit. 13Kam ɓebogt kɨ dɔning mbalt kɨ ɓebog kɨ dɨlalot kɨ ɓebog kɨko jikõ, kam dɔning Benjamit kɨ log kɨ gugɨn dɔ Jerusalem kɨ ɓebog kɨ Juda batg a tɔin kɨgoagoa girr ji ngedakɔrd.
Titbe la i takel Bɨraɓe ye.
14Oon, ndɔg ndɨ ɗen nõ.
Titbe kel Bɨraɓe.
Lon m'a m'tɔl ta ta kɨmaj in m'el kete dɔ ngékɨɓet lo Israel kɨ ngékɨɓe lo Juda. 15Ndɔt'n non kɨ kaglo'n non la m'a mad Dɔj kɨdenesew ba ko ngɨra Dabidt, a gangta denesew kɨ kɨ goɗobat kam dɔningt. 16Ndɔt'n non Juda a aj na Jerusalem a ndɨ londɨnt lom. Oon tɔ in a kunɨna ne laten: Bɨraɓe i denesew loj. 17Kɨtɔ titbe takel Bɨraɓe: Dabid a nal ngegagootɨn dɔ pong kõɓet lo ngékɨɓe lo Israel al. 18Lebiag ngejanyamosɨ a nalɨn ngégagootd nomt kɨta la kadkarig kɨ lahort kɨ kadkari nduj kɨ kadkarig kɨjakɔ kɨndɔgndɔg al. 19Ta lo Bɨraɓe'n el Jeremit an: 20Titbe takel Bɨraɓe; Ĩla i asɨ gangɨn kunkɔ lom nat kɨ lo kɨkada kɨ lo kɨ ndɔ mbã lo kɨkàda kɨ lo kɨndɔ a ɗen kaglo lod al a ne, 21kamla kunkɔ lom a gangɨn na kɨ ɓer lom Dabid mbã kad nal ngon kɨ a ndɨ dɔ pong kõɓet loa. Titbe tɔ kunkɔ lom kɨ Lebiag ngejanyamosɨ, ngékɨlaɓerg lom. 22Tit'n koosɨg kɨdɔrãt ĩn kɨ dum da kɔrd ye kɨ ngár kɨ bahbot dum mbɔj, titbe tɔ m'a mad koh ɓer lom Dabid bɨla kɨdɔtdɔt kɨ koh Lebiag ngékɨlaɓerg lom. 23Ta lo Bɨraɓe'n el Jeremit an: 24I oo dɔ ta'n deg'n ɗan ndɨ elɨn ale? Anan: Girrdeg jo ĩn Bɨraɓe kɔtd ye, lad kɔ. Titbe tɔ kidɨn deg lom mbã õd tit girrdeg al be. 25Titbe takel Bɨraɓe: Ĩla m'un kom nat kɨ lo kɨ kàda kɨ lo kɨndɔ al, ĩla m'nda mber dɔrã kɨ dɔning al a ne, 26titbe tɔ m'a m'la koh Jakob kɨ koh ɓer lom Dabid kɔ kad m'un ngonkaa mad õbe dɔ nganka Abraham kɨ Isaak kɨ Jakob al. Oo, m'a m'tel sed ɓeɓert kad m'oo kumtondo lod ye. A awɨn kɨ Sedekias Babilon.
Currently Selected:
Jeremi 33: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
