Jeremi 29
29
Maktub kɨta ngendɨ ɓert Babilon
1'Nten i ta kɨ kam maktubt in Jeremi, ngekelta kɨta Luwaht, ko Jerusalem la'n kɨro ndeg kɨbogt ĩgɨn ndin ɓeɓert kɨ ngejanyamosɨ kɨ ngekelta kɨta Luwaht kɨ deg tube'n Nebukadnesar ɔid Jerusalemt, aw sed Babilon, 2got in ngar Jekonia ɓain Jerusalem nat kɨ ngar kɨ dẽ, kɨ kuj dekɨdɨngãg kɨ mbaiɓeg kɨ Juda kɨ kɨ Jerusalem kɨ ngejakag kɨ kodg. 3Ad maktub'n non ji Eleajar ngon Sapan kɨ Gemaria ngon Hilkɨja ĩgɨn Sedekias, ngar kɨ Juda, lad Babilon ro Nebukadnesar, ngar kɨ Babilon. Ta kɨ kam maktubt el titbe:
4Titbe takel Bɨraɓe Ngekoosɨg, Luwah lo Israel, kɨ ro ɓergt tube'n m'ɔid Jerusalem m'ɗe sed Babilon. 5I ɗan kujg i ndɨnt, i hɔn kagg nya kam ndɔɔt i san kanda. 6I taan dekɨdẽg oojɨn ngan kɨdɨngã kɨ kɨdẽ, i taan dekɨdẽg adɨn ngansɨg kɨdɨngã, adɨn ngansɨg kɨdẽ taan ngaw kad oojɨn ngan kɨdɨngã kɨ kɨdẽ kɨtakad kɔrrsɨ bɨla kɨdɔtdɔt nu kad i telɨn deg kɨ tẽbe al. 7I sahn maj kɨta ɓebo'n ɗan, lot'n mad awɨn sesɨ ɓer tit i kɔn Bɨraɓe kɨtɔa kɨta kam lapiat loa la ĩn to a i ngahn ne lapia ho.
8Kɨtɔ titbe takel Bɨraɓe Ngekoosɨg, Luwah lo Israel: Ot kadɨn ngekelta kɨta Luwaht kɨ ngendõte losɨ ĩgɨn ĩn kusɨt goolsɨ, ot kon dɔ ta nig lod ĩgɨn ndɨ nin 9kɨta i takɨbal la deg'n non ndɨ elɨn kam tɔmt ye. Mĩ m'lad al.
Titbe la i takel Bɨraɓe ye.
10Kɨtɔ titbe takel Bɨraɓe: Lon ɓal dɔtanãimɨta asɨ kɨta Babilon a ne, m'a m'ga kamm dɔsɨt, m'a m'tɔl kon ta lom in m'el dɔsɨt kad m'ɗe sesɨ gog kam lot'n ɗan. 11Kɨtɔ m'ger kɔjtaɗa in m'ɔj kete dɔsɨt.
Titbe la i takel Bɨraɓe ye.
I kɔjtaɗa kɨlapia, i majal al, kad m'adsɨ kam kɨndahdɔt kɨ to kaglo kɨ ndɨ ɗe. 12Kamla a i kunɨn tɔm, a i kɔmɨn na m'a m'oo dɔ ko losɨ. 13A i sahmɨn, a i ngahmɨn tɔ lon i sahmɨn kɨ ngarkamsɨ tube. 14M'a mad i ngahmɨn.
Titbe kel Bɨraɓe.
M'a m'tel sesɨ ko kam ɓeɓert, m'a m'kawsɨ kɨ nat ku girrdegt kɨ dang dang kɨ log tube in m'tuɓasɨ kɔ tit.
Titbe kel Bɨraɓe.
M'a m'tel sesɨ kam lot'n ɗan, lot'n i ɓain tit awɨn ber.
15Kɨtɔ i elɨn anan: Bɨraɓe bai kɨ ngekelta kɨtant Babilon adj.
16Titbe Bɨraɓe el dan do ngar ngendɨ dɔ pong kõɓet lo Dabid kɨ deg tube ngendɨ ɓebot'n ɗan, ngankõsɨg ĩgɨn awɨn ɓer nat sesɨ al. 17Titbe takel Bɨraɓe Ngekoosɨg: Oon, m'a m'la kɨ nyakat kɨ ɓo kɨ yo koosɨ dɔdt, m'a m'teld tit'n kand mbaiɓood kɨmajal'n de asɨ sa al kɨtɔ majal loa kɨngãi. 18M'a m'tuɓagod kɨ nyakat kɨ bo kɨ yokoosɨ, m'a m'lad ji degt kad awɨn sed girr kõɓegt kɨ dang dang tube. A ĩn nyakɨndɔl kɨ nya kɨya kɨ nya godɔt kɨ nya kid ku girrdegt ĩgɨn m'a m'tɨnda tĩdt tube. 19Kɨtɔ oon dɔ tag lom al, kel Bɨraɓe. M'la ngékɨlaɓerg lom rodt, ngekelta kɨtamt ĩgɨn m'lad kɨ kanj nya ta na oon dɔ al.
Titbe kel Bɨraɓe.
20Na ĩn ta, oon dɔ ta lo Bɨraɓe ĩn ɓerg tube'n m'ɔisɨ Jerusalemt, m'aw sesɨ Babilon.
21Titbe kel Bɨraɓe Ngekoosɨg, Luwah lo Israel, kɨdɔ Akabt ngon Kolaja kɨ Sedesias ngon Maaseja ĩgɨn elsɨn ta kɨ bal kam tɔmt; m'a m'lad ji Nebukadnesar, ngar kɨ Babilon, kad tɔld takumsɨt. 22A ĩn nya kɨ ndɔl ku ɓergt kɨ Juda tube'n ndin Babilon. Deg a elɨn anan: Kɨ Bɨraɓe ɗa sesɨ tit'n ɗan kɨ Sedekias kɨ Akab be, ĩgɨn ngar kɨ Babilon tɨngad horro. 23Kɨtɔ ɗan nya kɨyerr ku Israelagt, sahn dekɨdẽg lo madɓedg, na elɨn takɨbal kam tɔmt, ta'n m'ndad mbera al. M'ger na mĩ ngemanaja.
Titbe kel Bɨraɓe.
Ta lo Semaja, ngekeltakɨbal
24A i el Semaja, de kɨ Nehelam, an: 25Titbe kel Bɨraɓe Ngekoosɨg, Luwah lo Israel: I la kɨ maktubg kam tɔit kɨro degt kɨ Jerusalem tube kɨ Soponi ngejanyamosɨ, ngon Maaseja, kɨ kɨro ngejanyamosɨgt tube an: 26Bɨraɓe ndai ngejanyamosɨ gan got Jehojada ngejanyamosɨ kɨtɔkad in bɨradɔ kuj lo Bɨraɓe kɨ de kɨ ɗen in nya hãna na tel ron ngekelta kɨ ta Luwaht, kad i la horr njaat kɨ dɔa kɨ jinjir. 27Kɨtɔ 'nten kɨtɔɗibai i ndang Jeremi, de kɨ Anatot, in tel ron ngekelta kɨta Luwaht rosɨt al a? 28Kɨtɔ la kɨla kɨrojt Babilon an: Ɗà ber losɨ a aw sãi. I ɗan kujg i ndɨnt i hɔn nya kam ndɔɔt i san kanda. 29Soponi ngejanyamosɨ da maktub 'nten nõ Jeremit, ngekelta kɨ ta Luwaht. 30Kamla ta lo Bɨraɓe ɗe ro Jeremit an: 31I la kɨla kɨro degt tube kɨ hɔnd ɓert an: Bɨraɓe elta titbe do Semajat, de kɨ Nehelam, an: Kɨtɔ Semaja elsɨ takɨbal kanj kad m'laa, dum dɔsɨ ad i ɗà dɔ takɨbalt. 32Kɨtɔ 'nten, titbe kel Bɨraɓe; oon, m'a m'nda m'ɔj Semaja, de kɨ Nehelam, nat kɨ ngankaa. De loa kɨɗa kɨ kad ndɨ ku degt lom goto, a oo maj in m'a m'ɗa kɨ deg lom al.
Titbe kel Bɨraɓe.
Kɨta elta ndoorɨn Bɨraɓe.
Currently Selected:
Jeremi 29: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
