Jeremi 28
28
Koi Hanania, ngekelta kɨngom
1Oo kam ɓalat'n non, mbagɨr kõɓe lo Sedekias, ngar kɨ Juda, kam naht kɨkõmi kɨ ɓal kɨkõsɔɔ, Hanania ngon Ajur, ngekelta kɨta Luwaht in ndɨ ɓebot kɨ Gabaõ, elɨm ta kam kujt lo Bɨraɓe takum ngejanyamosɨt kɨ deg tube, an: 2Titbe takel Bɨraɓe Ngekoosɨg, Luwah lo Israel; M'tet jug lo ngar kɨ Babilon kɔ. 3Nãi ɓal joo ɓaitɔ a ne, m'a m'tel kɨ nyaɗakɨlag tube kɨ kam kujt lo Bɨraɓe ĩgɨn Nebukadnesar, ngar kɨ Babilon ɔid kam lot'n ɗan, awɨn Babilon. 4Bɨraɓe el an: M'a m'tel kɨ Jekonia ngon Jojakim ngar kɨ Juda, nat kɨ deg tube kɨ Juda ĩgɨn awɨn sed ɓert Babilon, kam lot'n ɗan gog kɨta m'a m'tet jug lo ngar kɨ Babilon kɔ.
5Jeremi ngekelta kɨta Luwaht tur el Hanania ngekelta kɨta Luwaht nõ ngejanyamosɨt kɨ deg tube ĩgɨn ɗan kam kujt lo Bɨraɓe. 6Jeremi ngekelta kɨta Luwaht el an: Ã kɨ Bɨraɓe ɗa titbe. Kɨ Bɨraɓe tɔlkon tag loi kɨ i el kad tel kɨ nyaɗakɨlag kɨ kam kujt lo Bɨraɓe kɨ kam lot'n ɗan kɨ tel kɨ deg tube ĩn awɨn sed ɓert Babilon. 7Na i oo dɔ ta kɨ m'ɗa m'el kɨ mbiit kɨ mbi degt tube. 8Ngekelta kɨta Luwaht kɨmaɗi nu, kete nomt kɨ nõit, elɨn ta dɔ dɔninggt kɨngang kɨ kõɓeg kɨbobo, ta dɔ ɗɔɔt kɨ nyakɨto kɨ yokoosɨ, 9na ĩla ngekelta kɨta Luwaht elta kɨdɔ lapiat a ne, lon tɔlɨn kon ta loa ye rota deg a gerɨn ta kad i ngekelta kɨta Luwaht'n Bɨraɓe laa.
10Kamla Hanania, ngekelta kɨta Luwaht ɔrr jug kɨ kɔ Jeremit, ngekelta kɨta Luwaht, hɔ tet kɔ, 11a Hanania el ta nõ degt tube an: Titbe takel Bɨraɓe: Nãi ɓal joo ɓaitɔ a ne, titbe m'a m'tet jug lo Nebukadnesar, ngar kɨ Babilon, ko girrdegt tube. Jeremi, ngekelta kɨta Luwaht, so ɗobo, aw. 12Goot'n Hanania, ngekelta kɨta Luwaht, hɔ jug kɔ Jeremit tet woi ye, ta lo Bɨraɓe ɗe ro Jeremit, ngekelta kɨta Luwaht, an: 13Aw el Hanania an: Tite takel Bɨraɓe; I tet jug kag na a i ngah Jug hand gan goota, 14kɨta titbe takel Bɨraɓe Ngekoosɨg, Luwah lo Israel: M'ndɨ m'la jug hand kɔ girrdegt tube kɨtakad ɗan kɨlaɓer adɨn Nebukadnesar, ngar kɨ Babilon. A ɗan kɨlaɓer adɨna. M'ada dãg kɨmut tɔ.
15Jeremi, ngekelta kɨta Luwaht, el Hanania, ngekelta kɨta Luwaht, an: Hanania, oo dɔ. Bɨraɓe lai al, i ɗa ad deg ndan kamd dɔ takɨbalt. 16Kɨtɔ 'nten, titbe takel Bɨraɓe: Oo, m'a m'tuɓai kɔ dɔningt, a i oi kam ɓalt'n ɗan kɨta i elta ndoorɨn Bɨraɓe. 17Hanania ngekelta kɨta Luwaht, oi kam ɓalat'n non kam naht kɨkõtanãimɨta.
Currently Selected:
Jeremi 28: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
