Jeremi 26
26
Hɔn Jeremi kamla nyana dõ
1Mbagɨr kõɓe lo Jojakim ngon Josias, ngar kɨ Juda ta 'nten ɗe kokɨro Bɨraɓet, an:
2Titbe takel Bɨraɓe; I ɓai ɗa dõ kam natlot lo kuj lo Bɨraɓe, i el deg kɨ ɓebogt kɨ Juda ĩgɨn ɗen kɔsɨ dɔd ber kam kujt lo Bɨraɓe, eld tag tube'n m'ndai mbera, ot nya ta mad kɨɗa kɔ. 3Maj a ne, a oon dɔ ad telɨn kɨromt kad dekɨɗen nya ɗob lon kɨmajal, kamla m'a m'nya ta majal'n m'ɔj kammt kad m'ɗa sed kɨta kɨlaɗad kɨmajal. 4A i eld an: Titbe takel Bɨraɓe: Ĩla i oon dɔ ta lom al, ĩla i telɨn rosɨ go mberkɨndat in m'nda nõsɨt al 5kɨ oon dɔ tag lo ngekɨlaɓer lom, ngekelta kɨtamt al, ĩgɨn m'lad kɨrosɨt kɨkanj nya ta, na i oon dɔ tag lod al. 6Kamla m'a m'tel kuj'n ɗan tit'n m'ɗan kɨ Silo be, m'a m'tel ɓebo'n ɗan nya kɨndɔl kɨro girrdegt kɨdɔningt tube.
7Ngejanyamosɨ kɨ ngekelta kɨta Luwaht kɨ deg tube oon dɔ ta 'nten ĩ Jeremi el kam kujt lo Bɨraɓe, 8na lon Jeremi elta lo Bɨraɓe in ndaa mbera kɨ el deg tube ye, ngejanyamosɨ kɨ ngekelta kɨta Luwaht kɨ deg tube hɔna, elɨna anan: A i oi. 9Kɨtɔɗi i elta kam tɔ Bɨraɓet an: Kuj'n ɗan a tel tit'n Silo, ɓebo'n ɗan to a tel gootɓe kɨ de gotot a? Deg tube lan na gugɨn dɔ Jeremi kam kurjt lo Bɨraɓe. 10Lon mbaiɓeg kɨ Juda oon dɔ ta 'nten ye, ɓain kuju lo ngar, awɨn kuj lo Bɨraɓe na ndin tabit't kɨkij lo kuj lo Bɨraɓe. 11Kamla ngéjanyamosɨ kɨ ngekelta kɨta Luwaht elɨn mbaiɓeg kɨ deg tube anan: De'n ɗan asɨ koi kɨta elta kɨmajal dɔ ɓebot'n ɗan tit'n i ndɨ oon ne dɔ taa kɨ mbisɨ. 12Jeremi el mbaiɓeg tube kɨ deg tube an: Bɨraɓe lam kad m'elta loa dɔ kujt'n ɗan kɨ ɓebo'n ɗan in i oon dɔ. 13Tajigla i mbelɨn ɗobg losɨ kɨ kɨlaɗasɨ, oon dɔ ta lo Bɨraɓe Luwah losɨ, na Bɨraɓe a nyàgo majal'n eltaa dɔsɨt. 14Mĩ ta, oon, mĩ kam jisɨt. I ɗan sem nya'n i kɨmaj kɨ kɨdene takumsɨt kad i ɗan. 15Nya kɨɗabe kad i gerɨn maj, kan ĩla i tɔlmɨn a ne, ta mosɨ kɨkanj ta a i dɔsɨt, ĩn ho, ɓebo'n ɗan kɨ ngéndɨt kɨta rota, Bɨraɓe lam kɨrosɨt kɨ m'elta 'nten tube kɨ mbisɨt.
16Mbaiɓeg kɨ deg tube elɨn ngejanyamosɨ kɨ ngekelta kɨta Luwaht anan: De'n ɗan asɨ koi al kɨta elj ta kam tɔ Bɨraɓe Luwaht loj. 17Na kɨmadg dan kɨbogt kɨ dɔningt'n non ɓain, elɨn ngékawna tube anan: 18Mika in ɓe loa i Moreset i ngekelta kɨta Luwaht kaglot lo Ejekias, ngar kɨ Juda, na el deg kɨ Juda tube an: Titbe takel Bɨraɓe Ngekoosɨg; A gan ɓebo Siõ tit ndɔɔ be, ɓebo Jerusalem a tel dub mbal na mbalbo kɨ kuj ndub Luwah i dɔt a tel doorlo kam kut.
19Kɨtɔ ta 'nten la Ejekias ngar kɨ Juda kɨ de kɨ Juda tube tɔlɨn ne Mika a? Ejekias ɓool Bɨraɓe ale? Nõ kɨdɔ Bɨraɓet kɨtakad Bɨraɓe nyàgo nyakɨto'n ɔj kad n'ɗa sed al e? Jĩ j'a kɨ ɗa majal kɨbobe 'nten kɨ ndoorɨn roj a?
Jojakim tɔl Uri
20De mad kɨɗang elta kam tɔ Bɨraɓet tɔ. Ad i Uri, ngon Semaja kɨ Kirjat Jearim. El kɨdɔ ɓebot'n ɗan kɨ dɔning'n ɗan tit tag tube'n Jeremi el. 21Ngar Jojakim kɨ gõɗɔɔg loa tube, kɨ mbaiɓeg loa tube, oon dɔ ta loa na ngar sah ɗob tɔl Uri. Ɔrrɨn hoia Uri, ĩ tɔ ɓool, ad ãi aw dɔning Ejipt. 22Ngar Jojakim la deg Ejipt't, ad i Elnatan ngon Akbor kɨ deg madg nat sia Ejipt. 23Ɔrrɨn Uri Ejipt, teen sia awɨn sia ro ngar Jojakim, ad tɔla kɨ kiyaɗɔɔ, la nina kam ɓadt lo deg kɨdangtg.
24Be kaa ji Ahikam ngon Sapan i nat kɨ Jeremi, ngoma maj ad so ji degt kad tɔlɨna al.
Currently Selected:
Jeremi 26: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
