Jeremi 25
25
Juda a ɗa ɓer Babilont ɓal dɔtanãimɨta
1Ta'n ɗe ro Jeremit kɨta deg kɨ Juda tube ɓal kɨkõsɔɔ lo Jojakim ngon Josias; ngar kɨ Juda. I ɓal kɨdasa lo Nebukadnesar, ngar kɨ Babilon. 2Jeremi ngekelta kɨta Luwaht elta 'nten nõ degt kɨ Juda kɨ nõ ngéndɨ Jerusalem tube an:
3Mba gira ɓalt kɨ kõkɨlah gidaimɨta lo Josias, ngar kɨ Juda, mbã ɓola i bal dɔjoo gidaimɨta la ta lo Bɨraɓe ɗe romt, m'elsɨ ta kɨkanj nya ta na i oon dɔ al. 4Bɨraɓe la ɓerg lon, ngekelta kɨtant, kɨrosɨt tube kɨkanj nya ta na i oon dɔ al, i nelɨn mbisɨ kad oon ne ta al tɔ. 5Elɨn titbe: I telɨn, dekɨɗen kusɨt, nya ɗob lon kɨmajal kɔ kad nyàgo kɨla ɗan kɨmajal na a i ndɨ kam dɔningt'n Bɨraɓe adsɨ kɨ bɔwsɨg maɗi mbãkɨnõt. 6Ot kawɨn go yogt kad i ɗan ɓer lod, ke kad ɔsɨn dɔsɨ ber nõdt kad sokɨn wong lom kɨtakul kilaɗa jisɨ na ɓeta m'ɗasɨ majal. 7Na i oon dɔ ta lom al.
Titbe la i takel Bɨraɓe ye.
Ad m'ba wong kɨta kɨlaɗa jisɨ, ɗe kɨ majal do sit. 8Kɨtɔ 'nten, titbe takel Bɨraɓe Ngekoosɨg: Tit'n i oon dɔ ta lom al, 9oon, m'a m'la m'kun girrdeg tube kɨko jigel.
Titbe la i takel Bɨraɓe ye.
M'a m'la m'kun Nebukadnesar, ngar kɨ Babilon, ɓer lom, m'a m'ada ɗe ro dɔning'n ɗan kɨ ngéndɨt kɨ girrdeg tubeg'n gugɨn dɔd. M'a m'nujd kɔ, m'a m'teld nya kɨya kɨ nya godɔt kɨ nya kɨtuj mbãkɨnõt. 10M'a mad ndɨ ko ronel kɨ kamnda kɨ ndɨ ngetaa dekɨdẽ kij kɨ ndɨ ngetaangaw kij kɨ kah mbal kusɨnya kɨ kunj lamba goton. 11Dɔning'n ɗan a tel nya kɨtuj kɨ gootɓe kɨtaagbe na girrdeg'n ɗan a ɗan ɓer lo ngar kɨ Babilon ɓal dɔtanãimɨta.
12Lon bal kɨdɔtanãimɨta tɨga woi ye m'a m'gangta dɔ ngart kɨ Babilon kɨ girrdeg'n non.
Titbe la i takel Bɨraɓe ye.
Kɨta ɗagootal lod m'a m'gangta dɔ dɔning Kaldeat, m'a m'tela gootɓe mbãkɨnõt. 13M'a m'ɗe kɨ nyag tube'n m'eltaa dɔ dɔningt'n non, nyag tube'n ndangɨn kam maktubt 'nten, nya'n Jeremi el kɨdɔ girrdegt tube. 14Kɨtɔ girrdeg kɨ dang dang ngãibe kɨ ngarg kɨbobo a telɨnd ɓert na m'a m'ɓad kɨgo kɨlaɗadt kɨ kɨgo kɨlaɗa jid tɔ.
Bɨraɓe a nda ngɨra dɔ girrdegt
15Titbe Bɨraɓe Luwah elɨm an: I ta kop wong kɨ ɗoosɨ kɨ kasɨnduu jimt ad girrdeg tube'n m'ndɨ m'lai kɨrodt ãin. 16A ãin kad ɗad ad ndian jibjib, a ĩn tit deg kɨ nya hand be kɨta kiyaɗɔɔ in m'ndɨ m'la kudt. 17Titbe m'ta kop ji Bɨraɓet mad girrdeg tube ãin ĩgɨn Bɨraɓe lam kɨ rodt; 18Jerusalem kɨ ɓebog kɨ Juda ngarg kɨ mbaiɓeg kɨta nujd ad telɨn gootɓe kɨ nya kɨtuj kɨ nya godɔt kɨ ndɔl tit'n ĩn ne ɓone. 19Paraõ, ngar kɨ Ejipt kɨ ɓerg loa kɨ mbaiɓeg loa kɨ deg loa tube 20kɨ mbahg ngéndɨ dandt, kɨ ngarg kɨ dɔning Uts tube, kɨ ngarg kɨ dɔning Pilistiat tube, ad i Askalon, Gaja kɨ Ekrõ kɨ ndeg deg kɨ nãin kam Asdodt. 21Edom, Moab kɨ Amoniag, 22kɨ ngarg kɨ Tir tube, kɨ ngarg kɨ Sidõ tube kɨ ngarg kɨ doorlogt kɨ gid bahbot. 23Dedan, Tema kɨ Buj kɨ deg tube'n jan mbaitad, 24kɨ ngarg kɨ dɔning Arabi tube kɨ ngarg lo Arabg tube'n ndɨn kam mut 25kɨ ngarg kɨ Jimri tube, kɨ ngarg kɨ Elam tube, kɨ ngarg kɨ Medɨ tube, 26kɨ ngarg tube kɨjigel kɨnderbe kɨ kɨ sãi kɨɗa kɨɗa kɨ kõɓeg tube kɨdɔningt. Ngar kɨ Babilon a ãi kop utɨn god. 27Kamla a i eld an: Titbe kel Bɨraɓe Ngekoosɨg. Luwah lo Israel: Ãin kad ɗasɨ, i tomɨn na son kɨkanj ɓai dõ kɨta kiyaɗɔɔ in m'lan kusɨt. 28Ĩla mbet tan kop jiit kad ãin lon i eld an: Titbe takel Bɨraɓe Ngekoosɨg; Rota, sumba kad i ãin. 29A i eld an: Oon, kam ɓebot in kunɨn tɔm dɔt la m'mbagirr ɗa majal na ĩn, a i ndin kɨkanj takɨ gang a? Ã ã, a i ndin kɨkanj takɨ gang al kɨta oon, m'ndɨ m'kun kiyaɗɔɔ kɨdɔ ngéndɨ dɔningt tube.
Titbe i takel Bɨraɓe Ngekoosɨg.
30Ĩ taa, a i eld ta 'nten tube, a i eld an:
Bɨraɓe a ko kɨ ndin kɨbobe ko dõ,
ko kam londiat kɨkunjɗang a la ndin,
ko'n a ko kɨ ndin kɨbobe kɨdɔ londɨnt,
a ko kɨdɔ ngéndɨ dɔningt tube
tit'n ngéɓa kand nduu a kon ne.
31Kah ko a aw mbã dɔngoi dɔning
kɨta Bɨraɓe aw kɨ ta dɔ girrdegt,
a gangta dɔ dãrot kɨɗen,
a tɔl ngéɗamajalg kɨ kiyaɗɔɔ.
Titbe la i takel Bɨraɓe ye.
32Titbe takel Bɨraɓe Ngekoosɨg:
Oo, nya kɨmajal ndɨ tee kɨro girrdegt mad aw kɨdɔ kɨmadt.
Nel barwãi kɨbobe ndɨ ɓai dɔngoi dɔningt.
33Ndɔt'n non ĩgɨn Bɨraɓe a tɔld a ũ nind ko dɔngoi dɔningt mbã kɨmadt. De a nõd ke kawd kɨnat kad dubɨnd al. A ĩn tit ɓirɓit be dɔ dɔningt. 34Ngengombatg, i tõn ɗusɨɗusɨ, i kon, ngekɔrrta ɗob ɓut nyakulg, i ndurɨn rosɨ kam buhoort kɨta ndog losɨ asɨ woi kad tɔlsɨn. M'a m'tɔsɨ kɔsɨkɔsɨ, a i son tit jo kɨmaj dum be. 35Loyaro kɨta ngéngombatg a goto
kaj kɨta ngekɔrrta ɗob ɓut nyakulg goto.
36Deg a oon dɔ ndi ngéngombatg
kɨ tõ ɗusɨɗusɨ lo ngékɔrrta ɗob ɓut nyakulg.
Kɨta Bɨraɓe ndɨ nuj lo kulnyag lod.
37Kam ndɔɔgt lo to king
kɨta wong kɨtɨngabil lo Bɨraɓe.
38Nya londɨn tit basa tubo nyan loto'n ye be
kɨta dɔning lod tel gotlo
kɨta kiyaɗɔɔ lo ngenuj
nya kɨ wong loa kɨtɔlsɔkɨr.
Currently Selected:
Jeremi 25: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
